¹ Pabwandilo pakaba ishu sona ishu likakaba nu Chala, sona ishu likaba wi Chala. ² Yuyuyu akaba pabwandilo nu Chala. ³ Ifindu Fyoshi fikapeliwa fikapeliwa ukwendela mumwake, sona kushita yuyo ngali nachimo chimo chipeliwe pafifyo fipeliwe. ⁴ Mumwake mukaba ubwumi, sona ubwumi bukaba bwelu bwa bundu. ⁵ Ubwelu bukubala muchisi, sona ichisi chitakabupota bubwo. ⁶ Pakabako umundu yuyo akatumiwa ukufuma kwa Chala, yuyo ingamu yake akaba wi Yohani. ⁷ Akisa ukuba wikamboni ukushimikisha isha bwelu, ukuti boshi babaghile basubalile ukwendela mumwake. ⁸ U Yohani atakaba wi bwelu, lole akisa ukuti ashimikishe isha bwelu. ⁹ Ubwelu ubwanaloli, bubwo bukubala ku bandu boshi, bukisagha ku chisu. ¹⁰ Akaba muchisu, sona ichisu chikapeliwa ukwendela mumwake, sona ichisu chitakamumanya. ¹¹ Akisa kubake, sona abake batakamwambilila yuyo. ¹² Lole kubingi babo bakamwambilila yuyo, babo bakasubalila mu ngamu yake, akabapa amaka kakubila bana wa Chala. ¹³ Aba batakapapiwa mwi banda, pamu mwibwighane bwa mubili, pamu mubwighane bwa mundu, lole bwa Chala. ¹⁴ Ishiku likisa lyaba mubili sona likikala pakati pitu. Twatesha ubughindikiwa bwake, ubughindikiwa isa bwa yumuyuwene bubo bwene bukufuma kwa Tata, bubo bwiswile nichisa sona ubwanaloli. ¹⁵ U Yohani akashimikisha isha yuyo sona akalila, akati, ''Uyu weyo yuyo ingayugha, 'Yuyo akuya ukwisa panyuma pane bapamwanya ukukinda une, pakuti akabapo mwo une indalipo.''' ¹⁶ Po pakuti ukufuma mubwisule bwake tweshi tupokelite ichisa chicho chikongite pa chisa. ¹⁷ Pakuti indaghilo shikapeliwa ukwendela mwa Mose. Ichisa nubwanaloli fikisa ukwendela mwa Yesu Kilisitu. ¹⁸ Nayumo yumo yuyo amubwenipo u Chala; u Chala mwene, yuyo ali kulubafu lwa Tata, yuyo amufumuhishe u Chala. ¹⁹ Ichi chishimikisho icha yohani mwo aba Yuda batuma abaputi sona u Levi kukwake ukufuma ku Yelusalemu ukumubushikisha, ''We wini?'' ²⁰ Akamula--atakakana, lole akamula--''Tane Kilisitu.'' ²¹ Po bakamubushikisha, ''Ka po we wini? Ka we Eliya?'' Akati, ''Ta nene.'' Bakati, ''Ka we mukunguluka?'' Akamula, ''Hagha.'' ²² Po bakati kukwake, ''We wini, ukuti tuye tubabushe babo batutumite utwe? Ukuyugha ukuti choni pawimwenene?'' ²³ Akati, ''Ne mashu, ghagho ghakulila mulungalangala: 'mupange isila iya Kilisitu iya kugholoka,' isa mumwo umukunguluka u Yesaya akayughila.'' ²⁴ Po bamu ukufuma mu bafalisayi bakatumiwa, ²⁵ sona bakamubushikisha nukuti kukwaker, ''Choni chicho ukubosha linga tawe Kilisitu pamu u Eliya pamu umukunguluka?'' ²⁶ U Yohani akabamula babo, ''Ngubosha namishi. Lole mukati mwinyu muli yuyo mutamumenye. ²⁷ Weyo akwisa munyuma mwangu, nutupinyilo utwa sanda shake indabaghile ukusatula.'' ²⁸ Ifindu ifi fikubombiwa mu Betaniya ku lubvafu ulungi ulwa Yolodani, kuko u Yohani akoshanga. ²⁹ Ishiku ilingi u Yohani akamobona u Yesu akwisa kukwake po akati, ''Tesha, pali akango'shi ka Chala kako kakunyamula imbibi sha chisu! ³⁰ Uyu weyuyo ingamuyughagha, 'Yuyo akwisa munyuma mumwangu angilite nune, papo akabako bwo nune ingali.' ³¹ Indakamumanya yuyo, lole shikaba bubu ukuti ifumbuliwe kuba Isilayeli ukuti ingisa pakosha namishi.'' ³² U Yohani akashimikishanga, akatingi, ''Nateshishe u mbepo akwilomoka ukufuma ku mwanya isa ngunda, sona yisile yikala papake. ³³ Indakamwaghanianga yuyo, lole yuyo akanduma pakosha mumishi akati kukwangu, 'Payuyo wisa watesha u mbepo akwilomoka sona nukwikala papake, bwo weyo akoshesha mwa mbepo mwikemo.' ³⁴ Indeshishe sona ishimikishishe ukuti uyu weyo Mwana wa Chala.'' ³⁵ Sona, ishiku ilingi, bwo u Yohani imilile na bafundiwa bake babili, ³⁶ bakamutesha u Yesu akwenda palubafu, sona u Yohani akati, ''Tesha, unang'oshi wa Chala!'' ³⁷ Abafundiwa bake babibi bakamupulika akuyugha shishishi po bakamukonga u Yesu. ³⁸ Po u Yesu akisa asanusa sona akabatesha bakumukonga po akati kukwabo, ''Mukulondaki?'' Bakamula, ''Rabbi'' (Chicho chikusanusha ukuti ''Mumanyishi''), ''Kwikala kughu?'' ³⁹ Akati kukwabo, ''Sagha muteshe.'' Po bakisa nukutesha po akikalagha; bakikala nawe ishiku lilalila papo kakapalamilagha akabalilo aka folo okoloko. ⁴⁰ Yumo mubabili yuyo akapulika u Yohani akuyugha sona po akamukonga u Yesu akaba wi Andileya, uwamwabo wa Simoni Peteli. ⁴¹ Akamwagha tashi ubamwabo u Simoni po akamubusha akati, ''Twamwagha u Mesiya''(lilyo likusanusha ukuti Kilisitu). ⁴² Akisa nawe kwa Yesu, sona u Yesu akatesha kukwake nukuti, ''We Simoni umwana wa Yohani. Tiukoliwange nilya Kefasi'' (lilyo likusanushiwa Peteli). ⁴³ Pishiku ilingi, po u Yesu akalondagha ukutila ukubuka ku Galileya, akamwagha u Filipu sona akati kukwake, ''Ngongaghe une.'' ⁴⁴ Po u Filipu akaba wakufuma mu Betisayida mukaya ka Andeleya nu Peteli. ⁴⁵ U Filipu akamwagha u Nataniyeli sona akati kukwake, ''Yula yuyo u Mose akasimba mundaghilo, sona nabakunguluka, twamwagha: Yesu u mwana wa Yoseph, ukufuma ku Nazaleti.'' ⁴⁶ u Nataliyeli akati kukwake, ''Ngimba ichindu ichisa chimo chingafuma mu Nazaleti?'' u Filipu akati kukwake, ''sagha uteshe.'' ⁴⁷ U Yesu akamutesha u Nataliyeti akwisa kukwake sona akayugha nisha yuyo, ''Tesha, uwa Isilayeli uwa naloli, yuyo mumwake mutalimo ubu yanja!'' U ⁴⁸ Nataliyeti akati kukwake, ''wamanya bulele une?'' U Yesu akamula nukuti kukwake, ''Bwo u Filipi akali ukukwitisha, po ukaba mundende mwikokwe ilya mukuyu ingakubona.'' ⁴⁹ U Nataliyeti akamula, ''Mumanyishi, we Mwana wa Chala! We Mwene wa Isilayeli!'' ⁵⁰ U Yesu akamula nukuti kukwake, "Papo natili kukwako, 'Nakubweni mundende mwikokwe ilya mukuyu,' ka ukusubila? Tise uteshe ifindu ifikulu ukukinda nifi.'' ⁵¹ Po akati, ''Naloli, naloli, ngubabula umwe, tise muteshange kumwanya kukwighuka, sona abandumi awa Chala bakwilomoka nukukwela pamwanya pa Mwana wa Chala.''