¹ Ifundo yabwandilo yiyo ngasimba, Teyofilasi, akayugha shoshi shisho u Yesu akanda pakubomba nukumanyisha, ² Mbaka pishiku lilyo akeghiwa kumwanya, bwo abapa ululaghilo ukwendela mwa mbepo mwikemokubatumiwa babo bakasaliwa. ³ Mwo akabalilo kakutamiwa kapululila, akisa alangisha mwene ukuba mwumi kubabo ukwendela mufyakushimikisha ifyingi. Lole akabonekela kukwabo pamashiku fote nukuyugha isha ubumwene bwa Chala. ⁴ Mwo akukomana pamupene nabo, akabalaghila ukuti manyi bafumaghemwo mu Yelusalemu, lole balindilile ilaghano ilya Tata, lilyo akayugha, "Mupulikite ukufuma kukwangu ⁵ ukuti u Yohani naloli akoshanga namishi, lole pamashiku ghalululu timwise mwoshiwange nu mbepo mwikemo." ⁶ Mwo babungana pamupene bakamubushikisha, "Mwene, ngimba akabalilo aka koko ungapa ubumwene kuba Isilayeli?" ⁷ Akayugha kukwabo, "Shitabaghile umwe ukuti mumanye isha kabalilo pamu utubalilo tutwo u Tata atubikite mubulaghili bwake. ⁸ Lole mukwisa kupokela amaka linga umbepo mwikemo isa pa[inyu, po mukwisa kuba mwe bakamboni bangu ukwandila mu Yelusalemu namu Yudeya namu Samaliya, po mbaka ku bumalilo bwa chisu. ⁹ Mwo umwene u Yesu ayugha ifindu ifi, mwo bakali bakutesha kumwanya, akisa anyamuliwa, po ibingu likisa lyamufifa mumaso ghabo. ¹⁰ Mwo bakutesha umwakulolotela kumwanya bwo akubuka, papapo napapap, abandu babili bakisa bimilila papipi nabo babo bakafwala imyenda imyelu. ¹¹ Bakati, "Mwe bandu bamu Galileya chonin chicho mwimilile panu mutesha kumwanya? U Yesu uyu yuyo eghiwa ukufuma kukwinyu ukuya kumwanya, akuya kwisa sona isa mumwo mwamuteshekesha akabuka kumwanya." ¹² Po bakanyokela ukuya ku Yelusalemu ukufuma kwighamba ilya Olivazi, lilyo lili kupipi ni Yelusalemu, bakuba balendo ba pasabata. ¹³ Mwo bafika, bakaba kuchipinda ichakwighulu, kuko bakikalagha. Pakaba u Peteli, Yohani, Yakobo, Andileya, Filipu, Tomasi, Batolomewu, Matayi, Yakobo umwana wa Alufeyo, Simoni uwa Zeloti, nu Yuda umwana wa Yakobo. ¹⁴ Boshi bakipa nindumbua yimuyene munyiputo, pamupene nabakolo, numaliya ung'ina wa Yesu, nabobamwabo. ¹⁵ Amashiku ghalaghala u Peteli akimilila pakati pa bowamwabo, pamupene wakaba 120 abandu, po akati, ¹⁶ "Bo wamwitu, chibaghile ukuti amasimbo ghakwanishiwe, ukuti umbepo mwikimo akayugha nganila mumulomo wa Davidi ukufyana nisha Yuda, yuyo akabalongoshanga babo bakamukolagha u Yesu. ¹⁷ Papo akaba wa bamu mukati mwitu yuyo tukabombelanagha pamupene imbombo." ¹⁸ (Po umundu uyu akaghula umughunda nindalama shisho akapokela ukufuma mububibi, po palapala akisa awila umutu, po umubili wake ghukisa wa punda, po fyoshi ifya mukati fikisa fyafumila kuse. ¹⁹ Bosi babo bakikalagha mu Yelusalemu bakisa bapulika ishi, po umughunda ghula bakaghupa ingamu yiyo munjugha yabo bakati "Akeldama," chicho chikusanusha, "Mughunda wa libanda.") ²⁰ "Papo shisimbiwe mwibuku lya Masimbo, 'Leke umughunda wake ghushale chitengele, sona mutakitikishe ukuti umundu yumo ikalaghemo'; 'Sagha yumo eghe ubuyo bwake ubwabulongoshi.' ²¹ Chindu chakwenelela, ukuyana nukuti, yumo uwa bandu babo twababanga pamupene akabalilo koshi kako umwene u Yesu akingilagha nukufuma mu mwitu, ²² Ukwanda pakabalilo ka lwosho lwa Yohani ukwisa kufika pishiku lilyo akeghiwanga ukufuma papitu, yoyo abe wikamboni pamupene nutwe mushakushuka." ²³ Bakabatangisha abandu babili, u Yosefe yuyo bakamwitishanga Banabasi yuyo akakoleliwanga sona nilya kuti Jasitasi nu Matiyasi. ²⁴ Bakiputa nukuti, "umwe, Malafyale, umenye indumbula sha bandu boshi, po tufumbulile babo baliko pakati pa babili aba babo ubasalite ²⁵ ukuti beghe ubuyo bwa mbombo nubutumiwa bubwo u Yudasi akabuleka nukubuka kubuyo ubwake." ²⁶ Bakapanga ubulaghushi papabo, po ubulaghushi bukamuwila u Matiyasi, po akisa abikiwa pachibukutila cha batumiwa leveni.