¹ Tiopilus,a buk iau a herea hosi,iau a tata na maka maki e Isu i vakabubu a leho i tovo e huriki, ² i vano na parava e Deo i bolea i sike meli.Ra hini nga i bele muri na hini ia i haba ngava tora turana Hanu Kiripiripi i lakea ne hurikia voravora ia i pasi ria pali. ³ Muri ia biri pesirike mule na ni mate,ia biri bele kavakava biri vakasiri mulea ne hurika tara.Na parava i ravulu va,ia i bele kavakava ne ria,ia i tata na harikinga ne Deo. ⁴ Na tahuna ia i made turane ria i taki ria nahani rigi pea e Jerusalem,pali rigi davea nita gamai ne Tata,na hini nga,ia i ta maea,"Mua mu longo ne nau., ⁵ Manga e Jon i haba baptais na naru,pali mua bara mu baptais na Hanu Kiripiripi na parava muri ma. ⁶ Tuhuna ri vapopo palupu ri nana maea ia,,"ViriDagi,na tahuna ngane ioe boro vakabele mulea Harikinga na Israel?" ⁷ Lakea ia i taki maea ria,ia kama maki mua ia biri lohoka na tahuna na parava e Tata ia i pasia.Ia kunana i lohoka. ⁸ Pali mua bara mu bole a ni tora,tuhuna a Hanu Kiripiripi bari puru valai ne mua,lakea bara mu bele manga ni vakasiri nau iea o Jerusalem,na tabekena hini lobo iea o Judia turane Samaria i lakea liu na ni lobona malala. ⁹ Tahuna e Isu ia i rata maka ngava nga ia i rike,ria lobo ri matanono lakea tara bubu i valai i kapikaria kama ri matai tubua. ¹⁰ Ri matanono ara hini lakea vona,i laviriri hateka a bakovi rua ru rodo a varikia keakea ru valai ru pesi tabukoi ne ria. ¹¹ Rua ru ta,"Mua e hurika bakovi iea o Galili,navai mu pesi mu matarike na hunu?Re Isu,Deo i bole mulea ne mua ia i lakea na hunu.Ia bari hamule valai tabu na naro i palupu manga hini mu masia i vano turana varikia keakea na hunu. ¹² Pali ri laho a parava i taku ni pea a lolo e Oliv ni laho valai o Jerusalem,Lolo e Oliv ia i tabukoi iea o Jerusalem. ¹³ Tahuna ri valai ri bele,ri rike na tabekena ruma ria ri made vona.A rane ria e Pita,Jon,Jems,Andru,Filip,Tomas,Batolomyu,Matyu,Jems tune Alfus turane Saimon a bakovi na tara ne Salot, Judas tune Jems. ¹⁴ Ri vapopo palupu ri vasileki hateka,hurika ngatavine turane Maria kinane Isu turane hurika turana ranga. ¹⁵ Na tahuna iea Pita i pesi na palane hurika bakovi ri luhoi tora,ni gi ria ri bele maea 120 lakea ia i ta maea, ¹⁶ "Hurika turagu,i kamumu maea,ngava i tabuli na buk e Deo bari bele kavakava,hosi a Hanu Kiripiripi i takia na ngavane Devit lakea i takia ne Judas tara ngava,ia i ta maea,ra bakovi iea bari vakasiri e hurika bakovi ni nugutatea e Isu. ¹⁷ erei a tara mia ia i kara ni rata leho i palupu manga mia mi rata, ¹⁸ (Ngane ra bakovi i kona malala na moni ia i bolea na naro hale vona,muri ia i boru na gina i puru na malala,lakea i makudu a tamudina i pagitala. ¹⁹ Hurika bakovi a ngatavine iea o Jerusalem ri lohoka vona hini nga,na nitane ria,ri galea ra malala iea e Alkeldama a vuhuna ngava iea maea a malala i tahoka dara.) ²⁰ Manga nitane Deo i tabuli na buk ne Song,ru e virika maki vona biri lobo,nahani rua tara ge tabuli.Ge lakea tara bakovi ge bolea pede a leho vona. ²¹ Ia i kamumu maea,tara bakovi ia i made turane teu na parava vakaroro.E ViriDagi ne teu e Isu Kristo ia i made na palane hita, ²² na tahuna e Jon i bole a baptais i valai na parava e Deo bari bole mulea ne teu,ia bari takitala ni mahuri mule vona.Ri pasi a bakovi i ala rua,Josep ri galea e Barsabas a ranga tara e Jastus turane Matias. ²⁴ Lakea ri vasileki ri ta maea,Ioe e ViriDagi,"Ioe o lohoka vona tamudine hurika bakovi a ngatavine,ioe o ru kavatalea tara ne rua ra bakovi nga ioe o pasi." ²⁵ Lakea ri tahoka leho ni rata leho na murimuri bole a murine Judas.Ia i pea i lakea na tanga ia i ngaru ni made vona. ²⁶ Lakea ri voro a habulo ne rua ni pasi erei ge ratea ra leho iea,lakea ri pasia e Matias,lakea ia i dili turana a murimuri ri ala ravulu a polona i taku.