¹ Pikiran Andayo Kristus Jaji kade' ka doopm kristus kamaoan nang koat, panghiburan kasih pakumpulot sumangat, kasih sayang, kasihotn sidi, ² sampurnaanlah repoku ba ati sapikir, nang ado kasih sayang nang sabayo, dinyatuot kadoopm sumangat, ba sete' maksud. ³ Dameo pun Ame dikarajaan kamaoan nang koat ba paham diri' sandiri' mao pun sombong nang ano' ba arti; tapi ati nang pangaloh, anggap urokng lain labih baarti dari pado diri' sandiri'. ⁴ Amelah kito masing-masing kahe nanang ka kaparluan ngu sorog, tapi bakaparluan urokng lain gae'. ⁵ Maejare pikiran nyian ado ka antaro kito', jakoo gae' nang ado ka Yesus kristus. ⁶ nang ado rupo Allah, Io ano' nganggap ka sabayaat-Ne ba Allah koo jukut nang arus ame dibuokng. ⁷ Sabakike, Io ngamuat diri'-E ano' ado damea-dameae, Io ngamuat diri'-E andayo budak yak jaji sarupo ba manusio, ⁸ memang Io nyarupo jaji manusio, Io mabohot diri'-E buktie Io taat sampe mati, matie pun dingukum kaatas kayu salib. ⁹ Nyianlah alasane, Io paling Allah ninggiot ba pamare' ka Io namo ka atas sagalo namo, ¹⁰ kade' ka doop namo Yesus, samuo tu'ut diratoot ba lante baik nang ado ka angit, nang ado ka dunio, sampe nanga ado kababoh dunio, ¹¹ ba samuo jioh ngako' kade' Yesus kristus koo Tuhan, yak kabanarot Allah, sete'-sete'-E bapo'! Allah bakarajo ka doopm diri' ¹² Koolah kamaru'-kamaru'ku nang ku ngasihi' ayamae ugo' kito' taat tarus, buke kahe waktu aku ado bakito' labih- labih kanio' waktu aku ano' sabayo-bayo ba kito' karajaan kasunioot ba gai' ka Allah. ¹³ Soale, Allah nang bakarajo kadoopm kito' baik onto' maoan maopun onto' ngarajaan dameo nang nyamani' Io. ¹⁴ Amuatlah samuo koo ame badimauh ba ame dibantoh ¹⁵ biar kau ano' bacacat ano' ugo' basaloh, jaji anak Tuhan nang ano' disalohotn ka tangoh-tangoh angkatan nang bengkok atie ba nang sasat nyian nang ngamuat kau basinar ka antaro ne'ido' jaji tarokng ka dunio. ¹⁶ mampautlah koat-koat ka Firman kaidupotn kade waktu ari Kristus aku ado ba alasan yak ninggiot diri' kade' aku ano batalamo' paracomo ba bakarajo karas ano' paracomo. ¹⁷ Kade' pun aku arus ditontongan andayo apar pabuisotn ka atas antotn ba palayanan iman ngu aku barepo-repo ba suko-suko ba kito' samuo. ¹⁸ ayakoo gae kau ba alasan nang sabayo, barepo-repo ngan basuko-suko sabayo-bayo ngan aku. PAULUS NYURUH TIMOTIUS BA EPAFRODITUS ¹⁹ Ka doop Tuhan Yesus, aku ba arap biso gancang-gancang nyuruh Timotius atokng ka kau biar aku maraso tahibur waktu nangar kabar ngu. ²⁰ Soale, aku ano' baurokng lain angayo io nang batol- batol madulian kacukupatn ngu. ²¹ Soale, nang lain kahe sibuk madulian kapararuane sorog, buke' kapararuot Kristus Yesus. ²² Angayo dah kau nahui' Timotius dah ako' mare' bukti kade diri'e koo barago Io jaji pajajokng sabayo-bayo ba aku onto majut barito inji angayo kamudo' ka bapa'e. ²³ koolah makae, aku baarap biso nyuruh io kanio ihan baru' aku nahui dameo nang bakal tajaji ka aku. ²⁴ Akupun picayo' ka Tuhan kade' aku sorog mo atakngo ka kakau ²⁵ Tapi, aku bapikir pararu ga'e nyuruh Epafrodetus ampus namui' kau, Io koo kamaru' ku, ayukny sapajajokng ku, sapajuanganku ba urokng nang nabanan pasotn kakau ba nang madulian kaparluan ku. ²⁶ soale, io dah ka aleot sidi ka kito' samuo, atie pun susoh sidi, soale nangar io rongko'. ²⁷ memang, de'e io rongko' paroh ampir mati, tapi Allah nojokotn kasihatne ka io, buke' kahe ka io, tapi ka aku gae' biar kasusahatnku ano' batumpuk tumpuk. ²⁸ karomo koo, aku jaji makin taniti nyuruhotno io puokng kakau biar kau biso barepo-repo waktu nanang io agi bakuranglah kagaiananku. ²⁹ sambut sajo' Efaproditus doopm Tuhan sambil barepo-repo, patabe'ot ga'e urokng angayo io ³⁰ soale io ampir mati onto' pakarajaan Kristus; io bataroh nyawae yak ngantio' patuukngan' nang ano' muih kau bare'ot ka aku.