¹ Ampat ka Paulus ba Timotius, hambo Yesus Kristus, ka samuo urokng kudus, ka doop Kristus Yesus nang ado ka filipi, ba ka samuo pangurus jemaat ba kapalo jemaat ² Pamare' ba idup nyaman, idup ringokng ampat ka Allah, bapo' diri', ba Tuhan Yesus Kristus, maragei' diri'! Bakato' sukur ba sampokng Paulus yak jemaat nang ado ka koto Filipi ³ Aku basukur ka Allahku tiap kai aku ingat ka kau. ⁴ Ka doopm sampakngku yak kito' samuo, aku tarus basampokng barepo-repo ⁵ soale karajo sabayo-bayo nang kito' mare'ot doopm maritoot injil mulai' ari sete' sampe kanio' ⁶ aku batol-batol yakin, kade Io nang dah mulai pakarajaan nang baik ka antaro kito', Io ugo' nang mao' sampurnaot io sampe ka ari Yesus Kristus ⁷ Dah sapatute aku masaro angayo nyian ka kito' soale kito' samuo ado ka atiku. Baik waktu aku kapinjaro mao' pun waktu aku mare'ot pambelaan ba natapot injil, kito' samuo dah jaji ayukng basabayaku doopm pamare Allah. ⁸ Allah koo sakse, kade' aku nyian ale ka kito' samuo doopm kasih Yesus kristus. ⁹ Nyianlah sampakngku : Kirae kasihngu mangkin batamboh-tamboh ba ilmu ba sigalo akal ¹⁰ koolah kau biso milih dameo nang paling baik; biar diri'ngu tulus ano' bacacat waktu ari Kristus; ¹¹ ba dinginsi ba buoh-buoh kabanarot nang atokng ngalalui Kristus Yesus Ayak kamulioot ba pujiot ka Allah. Kasusohot Paulus yak majuot barito injil ¹² Kamaru' page warisku, aku mao kau nahui' dameo nang dah tajaji ka aku, makae biso nabanan injil ¹³ jaji maju, ngamuat saluruh pangawal istana samuo urokng lain nahui' kade' aku diminjaro onto' Kristus. ¹⁴ Labih manyak kamaru sapage nang saiman nang mangkin picayo' ka Tuhan, soal aku diminjaro nyian, jaji labih barani agi maritoot Firman Allah ano' maraso gai'. ¹⁵ Memang, ado urokng-urokng nang maritoot Kristus karamo dangki ba basaing, tapi, adobugo' nang bamaksud baik. ¹⁶ ne'ido' nang bamaksud baik ngarajaan io ba kasih soale ne'ido' nahui' kade' aku nyoan dinampatotn ka sio yak manangan injil. ¹⁷ bagi nang bamaksud ano' baik,ne'ido' ngarajaan io samao'-mao' atie sorog, ano' batol-batol, ako' koo ano' bapikir io biso namahi' kasusahatnku salamo aku ka pinjaro. ¹⁸ ako' koo dameo asile? nang panting bacaro dameapun, baik bamaksud puro'-puro' mao' pun maksudte sidi, Kristus dibaritoot, koolah aku biso barepo-repo. au', aku mao' barepo-repo tarus, ¹⁹ soale aku nahui' kade' ngalalui' sampakng-sampakngngu bapanolongan roh Kristus Yesus dameo nang dah ku ngarasai' koolah nang mo ngamuat aku dingapasotn. ²⁰ Arapatn nang ku nyidi i', aku ano' samo sakai namu supot. sabalike,aku namu kabaranian nang marinsi ka Kristus, baik kanio' sampe kamie pun, dimulioot ka doopm tubuhku, baik doopm kadaan idup mao'pun mati. ²¹ jukut bagiku idup koo Kristus mati koo kauntunan. ²² Tapi, kade aku tatap idup kadoopm tubuh nyian,baarti aku mao bakarajo ngaselot buoh. ako' koo mae nang arus ku milih, aku ano' nahui'. ²³ Aku tasarapet ka ataro duo pilihan koo. Kamaoanku koo ningoot idup nyian, lalu sabayo-bayo ba Kristus, jukut nyian nang labih baik. ²⁴ Tapi, onto' kito', biso labih baguno kade' aku tatap idup ka doopm tubuh nyian. ²⁵ ba kayakinan nyian, aku nahui' aku mao' diopm sabayo-bayo ba kito' samuo onto' kamajuan barepo-repongu kadoopm iman. ²⁶ kade aku puokng agi ka kau, koolah, kau biso batamoh repo jaji panuno' Yesus Kristus baranga' aku BASABAYO-SABAYOLAH AKO' KOO TATAPLAH BAJUANG. ²⁷ Tapi, iduplah ba caro nang patut sasuai injil Kristus, nano aso aku atokng biso batamu ba kau, aso aku ano' atokng, aku muih nangar kade' kau tatap batol-batol yakin ka doopm sete' sumangat, ba sete' pikiran, yak bajuang sabayo-bayo onto' iman ampat ka injil. ²⁸ Ame biarot kau dipagai' i' ba lawan- lawanngu, jukut koolah tando nang jalas ne'ido' bakal ancur, tapi sunio bagi kito', ako' koo tando koo pun ampat ka Tuhan. ²⁹ Soale demi Kristuslah kito' dah dimare' buke' kahe onto' picayo' ka-Io, tapi onto' jaji sasusohot ba Io, ³⁰ koolah makae kito' ngadapi' masalah nang sabayo andayo nang kito nanang aku ngadapi', ba nang kanio' kito' nangar nang masih aku ngarasai'