19

¹ Nang gabing iyon, dumating sa Sodoma ang dalawang anghel. Nakaupo si Lot sa pintuang daan ng lungsod. Nang makita niya sila, tumayo siya para batiin sila at nagpatirapa siya nang nakasayad ang kanyang mukha sa lupa. ² Sinabi niya sa kanila, "Mga Ginoo, pakiusap manatili muna kayo sa aking bahay ngayong gabi. Maaari ninyong hugasan ang inyong mga paa at bukas ng umaga maaari niyo ng ipagpatuloy ang inyong paglalakbay." Pero ang sinabi nila, "Hindi, sa liwasan na lang kami ng bayan matutulog. ³ Pero pinagpilitan nang husto ni Lot na matulog sila sa kanyang bahay. Kaya pumasok sila sa kaniyang bahay kasama siya at naghanda siya ng pagkain para sa kanila. Naghurno siya ng ilang tinapay na walang lebadura at kinain nila ito. ⁴ Pagkatapos nilang kumain, bago sila pumunta sa higaan, ang mga lalaki sa lungsod ng Sodoma, lahat sila, magmula sa mga bata hanggang sa matatanda, ay pinalibutan ang bahay. ⁵ Tinawag nila si Lot at sinabing, "Nasaan ang mga lalaki na pumasok sa bahay mo ngayong gabi? Ilabas niyo sila para masipingan namin sila!" ⁶ Lumabas ng bahay si Lot at kanyang sinarado ang pintuan sa likod niya para hindi sila makapasok sa loob. ⁷ Sinabi niya sa kanila, "Mga kaibigan, huwag kayong gumawa ng ganyang kasamaan! ⁸ Pakinggan ninyo ako. Mayroon akong dalawang anak na babae na wala pang sinumang lalaki na sumiping sa kanila. Hayaan ninyo na ilabas ko sila ngayon at maaari niyong gawin sa kanila ang anumang makapagpaligaya sa inyo. Pero huwag kayong gagawa ng anumang bagay sa mga lalaking ito, dahil mga panauhin ko sila na nasa loob ng aking bahay kaya dapat ko silang pangalagaan!" ⁹ Pero sumagot sila, "Umalis ka sa aming daanan! Ikaw ay isang dayuhan; kaya wala kang karapatan na sabihin sa amin kung ano ang tama! Gagawa kami ng higit na masasamang bagay sa iyo kaysa sa gagawin namin sa kanila!" Kaya sinugod nila si Lot at sinubukang pilitin na sirain ang pintuan. ¹⁰ Pero maingat na binuksan ng dalawang anghel ang pintuan at inabot nila ang kanilang mga kamay at hinila si Lot papasok ng bahay. Pagkatapos, mabilis nilang isinara ang pintuan. ¹¹ Pagkatapos, binulag nila ang mga lalaki na nasa labas ng bahay, bata at matanda, para hindi nila makita ang pintuan.

¹² Kaya sinabi ng dalawang anghel kay Lot, "Sino pa ang kasama mo rito? Kung mayroon kang mga anak na lalaki o mga manugang o mga anak na babae o iba pang may kaugnayan sa iyo na narito sa loob ng lungsod, ilabas mo na sila rito, ¹³ dahil wawasakin namin ang lugar na ito. Narinig ni Yahweh ang mga kasamaang sinasabi ng karamihan sa mga tao rito tungkol sa lungsod na ito at ipinadala niya kami para wasakin ito. ¹⁴ Kaya lumabas si Lot at kinausap ang mga lalaki na nangakong pakakasalan ang kanyang dalawang anak na babae. Sinabi niya sa kanila, "Bilisan ninyo! Umalis na kayo sa lungsod na ito dahil wawasakin na ito ni Yahweh. Pero inisip ng mga manugang niya na nagbibiro lamang si Lot. ¹⁵ Nang mag-uumaga na, hinimok ng dalawang anghel si Lot at sinabing, "Bilisan mong bumangon! Kunin mo ang iyong asawa at dalawang anak na babae na kasama mo at umalis na kayo! Kung hindi ninyo ito gagawin, mapapahamak kayo kapag winasak na namin ang lungsod na ito!" ¹⁶ Nang mag-alinlangan si Lot, hinila ng mga anghel ang kanyang kamay, ang kamay ng kanyang asawa at ang mga kamay ng kanyang dalawang anak na babae. Sila ay pinangunahan nila nang ligtas sa labas ng lungsod. Ginawa ito ng mga anghel dahil mahabagin si Yahweh sa kanila. ¹⁷ Nang nasa labas na sila ng lungsod, sinabi ng isa sa mga anghel, "Kung gusto ninyong manatiling buhay, tumakbo kayo nang mabilis! Huwag kayong lilingon! At huwag kayong hihinto kahit saan sa kapatagan! Tumakas kayo sa mga bundok! Kung hindi, mamamatay kayo!" ¹⁸ Pero sinabi ni Lot sa isa sa kanila, "Hindi, ginoo, huwag mong hayaang gawin ko iyan! ¹⁹ Pakiusap, makinig ka. Naging katanggap-tanggap ako sa inyo at naging napakabait ninyo sa akin at iniligtas ang aking buhay. Pero hindi ako makakatakas sa bundok. Kung susubukan kong gawin iyan, mamamatay din ako sa sakuna. ²⁰ Pakinggan ninyo ako. Mayroong bayan na malapit dito. Hayaan ninyo akong tumakbo papunta roon ngayon. Maliit lamang ang bayan na ito, at kung hindi ninyo ito wawasakin, maliligtas ang buhay namin kung pupunta kami roon." ²¹ Sinabi ng isa sa mga anghel kay Lot, "Papayagan kita na gawin kung ano ang iyong kahilingan. At hindi ko rin wawasakin ang bayan na iyong nabanggit. ²² Pero magmadali kayo! Tumakbo na kayo roon, dahil hindi ko mawawasak ang anumang bagay hangga't hindi kayo nakararating doon." Hindi nagtagal tinawag ng mga tao na Zoar ang bayan na ito na ang ibig sabihin ay 'maliit,' dahil sabi ni Lot na maliit lang ang bayan na ito.

²³ Habang sumisikat ang araw, dumating si Lot at ang kanyang pamilya ay dumating sa bayan na tinawag ngayon na Zoar. ²⁴ Pagkatapos, hinayaan ni Yahweh na bumagsak ang apoy at nasusunog na asupre sa Sodoma at Gomorah na parang ulan mula sa langit. ²⁵ Sa ganoong paraan, winasak niya ang mga lungsod na iyon at lahat ng tao na nakatira sa mga lungsod na iyon. Winasak rin niya ang lahat ng bagay sa kapatagan kasama na ang lahat ng mga pananim. ²⁶ Pero huminto at lumingon ang asawa ni Lot para tingnan kung ano ang nangyayari, kaya namatay siya at hindi nagtagal ang kanyang katawan ay naging isang posteng asin.

²⁷ Sa umagang iyon, tumayo si Abraham at nagpunta sa lugar kung saan siya tumayo sa harapan ni Yahweh. ²⁸ Tumingin siya pababa patungo sa Sodoma at Gomora at nagulat siya sa nakita niya sa buong kapatagan, pumapaitaas ang usok tulad ng malawak na usok sa isang napakalaking pugon.

²⁹ Kaya nang wasakin ng Diyos ang mga lungsod na iyon sa kapatagan, hindi niya nakalimutang tulungan si Abraham, at iniligtas niya si Lot mula sa sakuna na nangyari sa loob ng mga lungsod kung saan nanirahan si Lot.

³⁰ Natakot si Lot na manatili sa Zoar, kaya umalis siya roon at nagtungo kasama ang kanyang dalawang anak na babae sa bundok at doon sila nanirahan sa isang kuweba. ³¹ Isang araw, sinabi ng nakakatandang anak na babae sa kanyang kapatid na nakababata, "Matanda na ang ating ama at wala ng lalaki sa lugar na ito na sisiping sa atin katulad ng ginagawa ng mga tao sa buong mundo. ³² Painumin natin ng alak ang ating ama hanggang malasing siya. Pagkatapos maaari tayong sumiping sa kanya nang hindi niya namamalayan. Sa ganoong paraan mabubuntis niya tayo at magsisilang ng mga anak na magiging kaapu-apuhan ng ating ama. ³³ Kaya nang gabing iyon, hinayaan nilang malasing ang kanilang ama. At ang nakakatandang anak na babae ay pumasok at sinipingan ang kanyang ama, pero sa sobrang kalasingan hindi niya alam kung kailan siya humiga kasama siya o kung kailan siya tumayo. ³⁴ Nang sumunod na araw, sinabi ng kanyang nakakatandang anak na babae sa kapatid niyang nakababata. "Makinig ka sa akin. Sinipingan ko kagabi ang ating ama. Hayaan nating malasing ulit siya ngayong gabi! Sa pagkakataong ito, ikaw naman ngayon ang pupunta at sisiping sa kanya. Kung sisiping siya sa iyo, mabubuntis ka at sa ganoong paraan magkakaroon ka rin ng isang anak. ³⁵ Kaya nang gabing iyon, hinayaan nilang malasing ulit sa alak ang kanilang ama at pagkatapos pumasok ang kanyang nakababatang anak na babae at sinipingan ang kanyang ama. Dahil sa sobrang kalasingan, hindi niya ulit nalaman kung kailan siya humiga kasama siya o kung kailan siya tumayo. ³⁶ Kaya si Lot ang naging dahilan para mabuntis ang kanyang dalawang anak na babae. ³⁷ Hindi nagtagal ang nakatatandang anak ay nagsilang ng isang anak na lalaki na pinangalanan niyang Moab. Naging ninuno siya ng lipi ng mga tao ng Moab. ³⁸ Ang nakababatang kapatid na babae naman ay nagsilang din ng isang anak na lalaki na pinangalanan niyang Ben Ammi. Naging ninuno siya ngayon ng mga tao na tinawag na lipi ng mga Amnon.