¹ Ino Jesu nakabona mbunga, wakatanta acilundu. Naka kala ansi, basikwiya bakwe bakaza kuli nguwe. ² Wakajula mulomo wakwe oku bayisya, kuti, ³ ''Balilelekidwe bapengide mumuya, kambo bwami boku julu mbubwabo. ⁴ Balilelekidwe abo balila, kambo bayo umbulizigwa. ⁵ Balilelekidwe abo babombe, kambo bayo vuba nyika. ⁶ Balilelekidwe abo bafwa nzala e nyota yo bululami, kambo bayo kuta. ⁷ Balilelekidwe abo bali o luse, kambo bayojana luse. ⁸ Balilelekidwe abo basalala mumoyo, kambo bazo mubona Leza. ⁹ Balilelekidwe abo beeta lumuno, kambo bayoitwa kuti bana ba Leza. ¹⁰ Balilelekidwe abo bapenzigwa akambo ko bululami, kambo mbubwabo bwami bo kujulu. ¹¹ ''Mulilelekidwe nywebo ciindi bantu niba mutukaika oku mupenzya nikuba kwamba zintu zibi alinywebo zyokumutambikizya akambo kangu. ¹² Amusekelele oku nonenwa, kambo bulumbu bwenu mbupati ku julu. Kambo monya namuya bantu baka penzya basinsimi bakapona kunembo lyenu. ¹³ ''Ndinywe munyo we nyika. Kuti na munyo wasampuka, ino ape ninga waba buti munyo? Taucikwe mulimo ulasoigwa oku lyatokwa amaulu abantu. ¹⁴ Ndinywe mumuni we nyika. Munzi uyakidwe atala e cilundu tukonzi kusiswa. ¹⁵ Bantu takwe niba munika lambi okulibika kunsi ecisuwo, kono balibika achimino, ponya lila munikila boonse bali mu ng'anda. ¹⁶ Amuleke mumuni wenu umunike kunembo lya bantu mane kuti ba bone micito yenu mibotu okutembaula Tata wenu uli ku julu. ¹⁷ ''Mutayeyi anga ndaza kuzo nyonyona mulawo na basinsimi. Takwe nindakazida kuzozimwaya, kono kuzo yizuzikizya. ¹⁸ Kasimpe ndamwambila kuti mane julu e nyika zikamane, pele takwe kabbala olo kwisya kuyoinda anze o mulawo, mane kusikila zyeense zikazulile. ¹⁹ Ino kufumbwa utyola nuuba munini we milawo eyi okwisya bamwi kucita namu, uyotegwa munini mubwami bo kujulu. Pele kufumbwa uyoubamba oku bayisya, uyoitwa kuti mupati mubwami bo kujulu. ²⁰ Ndamwambila kuteti ati buyo bululami bwenu bukainde bululami bwa balembi ama Farisi, nimuyonjila mu bwami bo kujulu. ²¹ ''Mwakamvwa kuti cakambwa kuli mbabo muziindi zyeciindi, 'Utajayi,' ape, 'Kufumbwa ujaya uyoba o buyumu yumu bo lubeta.' ²² Kono ndamwambila kuti, kufumbwa unyemena muzyalwanyina uyoba o buyumu yumu bo kubetekwa; kufumbwa oyo usampola muzyalwanyina uyoba mu buyumu yumu bwenkuta mpati; ape kufumbwa waamba tegwa, 'Yebo ocifuba!' uyoba obuyumu yumu bo mulilo utazimi. ²³ Ino wanopa cipo chako acipaililo ponya wayeya kuti muzyalwanyoko ulakambo ayibo, ²⁴ siya cipo chako kunembo lye cipaililo, okwinka. Sanguna mulekelelane omwananyoko, ponya wamana uze okupa cipo cako. ²⁵ Amuzumizyanye omulwani nyoko muku fwambana nimucili anguwe munzila yoku nkuta, kambo sinkondonyoko ulakonzya kukutola kumubetesi ape mubetesi ulakonzya kukutola kumulindizi, ponya ninga wasowelwa muntolongo. ²⁶ Nconzyo ndamwambila kuti, takwe noyozwa muya kusikila mane ukabbadele kamali kasyede. ²⁷ ''Mwakamvwa kuti kwakambwa, 'utaciti bumambe.' ²⁸ Kono ndamwambila kuti kufumbwa ulangisisya amwanakazi oku munyomenena kokuti wacita kale bumambe anguwe mumoyo wakwe. ²⁹ Kuti na linso lyako lye cilisya likwetelezya kuti ubisye, ligwisye okuli sowa kuzwa kuli yebo. Kambo kubotu kuli nywebo kuti cibela comwi comubili wenu cha nyonyoka kwinda kuti mubili wako woonse uka sowelwe mumulilo utazimi. ³⁰ Kuti na janza lyako lyecilisya likwetelezya kuti ubisye, litimbule lizwe kuli yebo. Kambo kubotu kuli yebo kuti cibela comubili comwi chanyonyoka kwinda kuti mubili woonse ukainke mu mulilo utazumi. ³¹ Ape calinonga cambwa kuti, 'Kufumbwa utanda mwanakazi wakwe, welede kumupa lugwalo lokumuleka.' ³² Kono ndamwambila kuti kufumbwa uleka mwanakazi wakwe, watacita bumambe, nkokuti wamucita bumambe. Kufumbwa umukwata kali wakalekwa kokuti wacita bumambe. ³³ ''Ape, mwakamvwa kuti cakambwa muciindi cabensiku besu, 'Utakonki cikonke co bubeji, pele ucitile Leza mbuli mwakonka.' ³⁴ Kono ndamwambila, utakonki nikuba kanini, nokuba kujulu, kambo ce cibbula ca Leza; ³⁵ nokuba ansi, kambo ce cilyatilo ca maulu akwe; nanga ku Jerusalema, kambo ngo munzi O Mwami mupati. ³⁶ Nokuba kukonka omutwe wako, kambo tokonzi kusandula kasusu kuti katube na kasiye. ³⁷ Pele kwamba kwenu akube 'Iyi, iyi,' na 'nee, nee.' Kufumbwa cindilila kuzwa ali eci cizwa ku mubi. ³⁸ ''Mwakamvwa cakambwa kuti, 'Linso ku linso, ape E lino ku lino.' ³⁹ Ino ndamwambila kuti, mutapilusyi cibi ku mubi. Pele, kufumbwa oyo ukuma kutama lyo lulyo musandwide limwi ape. ⁴⁰ Kuti na umwi uyanda ku kuzingila nkani okukunyanga cibaki cako, umuleke atolelezye e jansi lyako. ⁴¹ Kufumbwa ukusongelezya kwenda musinzo we maile lyomwi, inka anguwe ma maile obile. ⁴² Amupe kufumbwa kuli oyo umukumbila, ape mutafutatili kuli umwi uyanda kukolota kuli yebo. ⁴³ ''Mwakamvwa cakambwa kuti, 'Welede kuyanda mwenzinyoko oku sula mulwaninyoko.' ⁴⁴ Pele ndamwambila kuti, yanda mulwaninyoko oku bakombela abo bakupenzya, leleka bakutuka, oku bacitila zibotu abo baku sula, ⁴⁵ kutegwa mube bana ba Uso uli kujulu. Kambo inguwe ngucita kuti zuba lizwide babi ababotu, okutuma mvula ababotu ababi. ⁴⁶ Nkambo kuti mwayanda abo bamuyanda, ino mujana mpindu nzi? Kokuteti abo basimitelo tabaciti cintu comwi na? ⁴⁷ Ape kuti kamulumelesya buyo bazyalwanyoko, cinzi cimucita kwinda bamwi? Basimasi tabaciti cintu comwi na? ⁴⁸ Mpoonya nywebo mwelede kusalala moonya mbuli Uso uli kujulu mbwasalala.