¹ Navy tantety amzay irô, amin' ny faritr'i Gerasena tao. ² Koa fa niala tagnaty lakana zegny i Jesosy, nisy lelahy araiky misy setoany nagnatogno Izy boaka tamin' i fasagna tagny. ³ Nipetraka tamin'ny fasagna zegny lelahy io. Tsisy olo navoatana izy na tamin'ny silisily zegny. ⁴ Sady fa matetiky fihezigny silisily izy fa mbala tapatapaka fo jiaby zegny.Tsisy olo managna ra matana izy. ⁵ Isaka aligny draiky isan' andra vaky Jagnahary, amin'ny fasagna agnabo bongo agny izy mihiakiaka sady ratraratraviny foeky haigninany jiaby. ⁶ Izikoa fa nahita Jesosy boaka lavitry tary zegny izy diraikity nilomay nagnatogno sady nihôdriky taminazy tiô izy. ⁷ Sady nivolagniny maré hoe: "Ino ma raha ifandraisako aminao Jesosy Zanaka Zagnahary taigna agnabo? Mangataka rady aminao za amn'ny agnaran' i Zagnahary, za mba kaza ampijalegna". ⁸ Navaliny boaka tao: " Mialaha amin'ny lelahy io anao setoany tsy manjary io." ⁹ Avio Izy nagnontany hoe: " Azovy ma agnaranao?" Nivaliny boaka tao amzay: " Agnaragna naka Legiona, fôtony maro zegny zahay io." ¹⁰ Sady nanambitamby izy beka mba tsy roasigny miala amin'ny tanàna iô. ¹¹ Nisy kamankory aby zaigny koa baka nijotso boaka tamy bongo tagny, ¹² kay nihangavy Taminany koa zegny irô nivolagna fa: "Mba alifasa amindrô komankory aby igny zahay; ambila zahay ipetraka am-drô iry". ¹³ Kay nambèlany zegny iro; sady niboaka koa zegny irô setoany igny kay nihidriky tamin-drô komankory aby diraikity nitsambokiny tagnaty ranomasigny tagny iro jiaby. Na komankory mandeha arivo maty tagnaty rano tagny. ¹⁴ Nahita zigny irô mpagnamia anigny komankory aby igny, diraikity nilefa sady nandeha nitantara tamin'olo tan-tanàna irô sady naro koa olo navy boaka tagny andeha iza raha nandalo. ¹⁵ Navy tiô irô igny, nagnantogno Jesosy sady itan-drô tiô koa lelahy araiky nisazoan' ny setoany legiona igny nipetreka tiô, misikiny sady salama tsara; kay navozo zegny irô. ¹⁶ Irô olo zaigny nahita raha nandalo tamin'ny lelahy nisazôhan' ny setoany draiky komankory aby tiô igny nitantara sady nagnambara tamindrô olo zay voavy tamin' ny antsipipriany. ¹⁷ Nanomboko nitambitamby Izy irô mba hialany amin'ny tànana io. ¹⁸ Izy koa fa hiaondragna lakana Jesosy, nangataka tamininany lelahy araiky nidiran' ny setoany igny sady nangataka hiaraka amindrô. ¹⁹ Kanefa, tsy nimboany Jesosy izy fa nivolagniny hoe: " Alô anao mandaiha mody amin'ny havanao agny kay tantara amindrô agny raha jiaby nataon' Tompo taminao draiky fitiavany anao!" ²⁰ Rôso zegny izy nandaiha nody sady efa nanomboko nitantara raha maventy zay nataon' ny Jesosy taminany tagny Dekapolisy, sady nahagaga olo jaby. ²¹ Navy tamin'ny tànana ambadiky ranomasigny tagny koa zegny Jesosy, nisy olo maro be zegny nivorivory nagnodidigny Izy tiô tamin'ny sisin-dranomasigny tiô. ²² Aviô amizay zaigny nisy olo araiky tamin-drô mpitariky synagoga aby tiô atao hoe Jairo, koa fa nahita Izy igny zegny diraikity nantopy tamin'ny vitiny tiô. ²³ Nitaraingny fo zegny izy tao sady nivolagna fa: " Marary mare zanako viavy ao, karaha fa ho faty foeky. Mangataka Aminao za, amitraha tagnana izy baika janga sady velogno." ²⁴ Kay lôso Izy niaraka taminany sady maro koa zegny olo nagnaraka no mbala nanery olo nagnodidigny Izy. ²⁵ Nisy magnangy araiky koa zegny, mandeha lio, tagnatiny roambinifolo taogno. ²⁶ Naharegny nijaly izy tagnatiny zegny sady efa nitety olo mahay raha jiaby fa tsy nety nisy fiovany, fa kara nahay ratsy fo draiky. ²⁷ Kay izikoa izy fa naharegny lazan' ny Jesosy zegny, nagnaraka tafaranany tao izy tagnivon' olo maro tao izy sady nitosy lambany. ²⁸ Fôtony zegny izy nivolagna fa: " Za koa fa tafikasiky lambanany fo efa janga edy". ²⁹ Izikoa fa nahakasiky lambanany zegny izy, efa nijanogno edy fandianan' ny lio nazy sady regniny koa fa nafaka aretigny nazy igny. ³⁰ Niaraka tamin' igny diraikity hain' i Jesosy fa nisy gôvo niala Taminany. Niherigny tamn' ny vahoaka tafaranany tao Izy sady nagnontany hoe: "Azôvy nikasiky lambako tiô igny?". ³¹ Namaly zegny iro mpianatranany nivolagna: " Itanao irô olo marobe aby magnaraka afaranao aby io, kay anao mbala magnaontany fa: " Azovy nitana za tiô." ³² Fa nizavan' ny Jesosy fo zegny nagnodidigny Izy tiô baika ahaizany olo nagnano zegny. ³³ I magnangy igny, nahay raha nahazo izy, ka navozo sady nangôrohôro. Nandè nandohaliky talohan'i Jesosy tiô, nangnambara raha nandalo jiaby. ³⁴ Kay navalin' i Jesosy izy avy tiô : "Zanakôôôôô, finoagnanao nagnajanga anao. Mandiana am-pilaminagna fa ho janga aretigny nao jiaby." ³⁵ Izy mbala mivolagna iô fo, navy olo sasany boaka tagny amin' ny mpitariky ny synagoga nivolagna fa: "Efa maty kony zanakanao aii. Nagnino anao mbala manahiragna mpampianatra io fo?" ³⁶ Izikoa fa naregny zegny i Jesosy, nivolagna Izy tamin-drô mpitariky ny synagoga aby tiô fa: "Kaza mavozo anarô fa minoa fo." Nanomboko tiô zegny, efa tsisy olo ³⁷ nimboany nagnaraka Izy eky, izkoa tsy iry Petera, Jakoba draiky Johany rahalan' ny Jakoba. ³⁸ Navy tan-tragnon' ny mpitariky synagoga tao irô, nahita olo maro be nitomagny tio Izy. ³⁹ Izikoa fa tafidriky tan-tragno tao zegny Izy, kay nambarany irô fa: "Nagnino ma anarô mitabataba sady mitomagny ? Izo kony tsy maty fa madry fo aii." ⁴⁰ Nitokizandrô zegny Izy. Kanaifa naboakany tan-tany tagny akendriky zegny irô olo jiaby niaraka Taminany aby igny, ankoatra ny babany draiky renin' ny tsaiky io, igny Izy vo nihidriky tan-tragno misy tsaiky io. ⁴¹ Nalainy zegny tagnan' ny tsaiky io sady nivolagna Izy hoe: " Talita, komy!" Izikoa avadiky zegny, midika hoe: "Tsaiky magnangy, mivolagna aminao Za, mitsangàna." ⁴² Diraikity nitsangagna izy sady nandaiha (fôtony roambinifolo taogno izy). Gàga zegny irô jiaby tiô. ⁴³ Nifeperiny maré zegny irô tiô baika tsy hisy na azovy na azovy agnano ahay raha nandalo io. Aviô amizay zegny nirahiny nampinanigny tsaiky viavy igny.