¹ Ary nanomboko nampianatra tiô amin'ny sisin-dranomasigny Izy, ary nisy olo maro nagnodidigny Izy. Niditry tagnaty lakana amizay Izy, sady nimpetraka tao. Olo jiaby nijanogno tamin'ny sisin-dranomasigny tiô. ² Nampianatra irô raha maro Izy boaka fagnoharagna, ary tamin' ny fampianarany, kara ity raha nivolagniny tamindro. ³ "Tandrignesa, nisy mpamafy voa navy andeha hamafy voa. ⁴ koa namafy Izy nisy voa sasany niraraka tamin'ny lalagna, ka nagnoaniny vorogno zegny. ⁵ Nisy voa sasany niraraka tamin'ny tany feno vatovato, tsy nisy tany firy. Tonga dia naniry iro regny fotony tsy laligny loatra tany nisy izy. ⁶ Koa fa nanonga masoandra, nalazo irô, fôtony tsy nisy vahy irô, kay naiky. ⁷ Ny voa sasany niraraka tamin'ny tany feno fatsiky. Ka naniry sady nahay be irô fatsiky irô, nitery izy kay tsy namoha foeky. ⁸ Ny voa hafa niraraka tamin'ny tany tsara, ka nitombo sady namoha tsara, avio nisy voany nahay naro. Ary ny sasany nitombo avo telopolo eny, sasany tsotampolo, ary ny sasany zato." ⁹ Ary avio izy nivolagna hoe : " izay managna sofigny, mba hitandregny!" ¹⁰ Izy koa jesosy fa nipetraka nanokagna, nagnontany Izy momba iro fagnoragna iro olo nariny izy tiô draiky mpianatra nany aroe ambimy folo. ¹¹ Volagnin'ny tamin'ny dro: "Ho anaro nagnamezagna ny raha manitriky fanjakan'ny Dragnahary. Fa ankatran' arô, fagnoaragna aby, ¹² mba amin'ny fotoagna zahavan-drô, irô hiza, fa tsy hahita, ary amin'ny fotoagna mba hitandrignesan-drô, hitandregny irô, kanefa tsy hahay zegny, na koa hiodigny irô ka handefitry amin-drô Zagnahary." ¹³ Ary nivolagna tamin-drô izy hoe : "Tsy azo naro mba fagnoaragna zegny ? Ary karakory hahazoanaro iro fagnoragna jiaby igny ? ¹⁴ I mpamboly mamafy voa zegny, izy mpamafy volagna na hafatra. ¹⁵ Ireto aby iro niraraka tamin'ny làlagna, iro namafaizagna volagna, koa regnin-drô zegny, navy setoany, ary hagalatra iro volagna nafafy tamin-drô. ¹⁶ Ity draiky irô voafafy tamin'ny tany feno vatovato, koa fa nahazo volagna igny izy, nalainy an-karavoagna. ¹⁷ Tsisy nahadigny zegny irô, fa nihelagna fo. Nijaly sady fagniagnana nohony volagna, kai afaran-drô lavo foeky. ¹⁸ Irô voa afa nafafy tamin'ny tany feno fatsiky. Irô igny ny volagna, ¹⁹ fa fagnahy ny olo jiaby eto an-tany, fitaka ny fanagnana, ary filagna raha hafa ka tafiditry kay manery volagna, ka tsy namokatra zegny. Ary irô voafafy tamin'ny tany tsara zegny irô nahazo volagna ka nangala zegny, kai nisy vokatra irô_Telopolo, tsotampolo, nimpody ²⁰ in-jato irô nafafy." ²¹ Jesosy nivolagna tamin-drô hoe: "Indesinao an-tragno agny mba jiro beka atao ambany tôgnotôgno, na ambany kobany? Indesinao miditry izegny sady apetraka nao amin'ny pilasin' ny jiro. ²² Fa iô tsisy raha misitriky kai tsy hay, ary tsisy raha misitriky tsy hiboaka. ²³ Koa misy ny managna sofigny mitandregny, mba hitandregny ²⁴ Volagniny tamin-dro hoe : "Mitandrema amin'ny volagna regninaro, arakaraka fagnoragna anarô, agnoragna anarô, ary ho ampiagna aminarô zegny. ²⁵ Fotony, na azovy na azovy managna, ka amiagna maro koa izy, ka na azovy nazovy tsy managna, na raha anagnany mbola adoso aminazy." ²⁶ Ary hoy izy koa hoe : "Ny fanjakanan'ny dragnary mitovy amin'ny olo mamafy voany amin'ny tany. ²⁷ Mandry izy amin'ny aligny, ary mifoha izy marandraigny, ary voa maniry fa tsy hainy karakory. ²⁸ Tany mamoha amin'ny tegnany fo : voalohany rantsany, avio kakazony, ary ny voany matoe iô amin'ny kakazony. ²⁹ Koa fa matoe ny voany, izy hitondra vokatrany, fa navy fotoagnan'ny vokatrany." ³⁰ Ary hoy izy koa tamin-dro hoe : "Ino azon-tsika ampitovizagna amin'ny fanjakan-dragnahary, na koa ino fagnoharagna hampiasain-tsika agnazavagna zegny ? ³¹ Zegny mitovy amin'ny voatsinampy, koa hafafy izy tegna hely amin'ny voa jiaby, fa koa fa maniry izy no tegna maventy be amin'ny kakazo jiaby. ³² Ary magnamboaka ratsagna maventy, azony vorogno mitiligny anovany tragnony io amin'ny alokalokony." ³³ Ary fagnoaragna maro kara zegny, nagnambary volagna tamin-dro, araka fazahoan-dro izy, ³⁴ ary tsy nivolagna tamindro koa tsy tamin'ny fagnoaragna zegny. Fa koa fa mipetraka raiky izy, nazavainy tamin'ny mpianatra nazy manôkana raha jiaby. ³⁵ min'ny andra zegny, navy hariva, nivolagniny tamin-dro hoe : "Andeha hitsaka ambadiky ary atsika." ³⁶ Ka niala tamin-dro vahoaka aby tio iro, nintondra jesosy niaraka tamin-dro, igny izy tagnantiny lakana izy. Nisy lakana afa niaraka taminany. ³⁷ Ary avio nanomboka nisy tafio maresaka, ary daroban-dranomasigny magnafofo lakagna ka tsaiky feno rano lakana. ³⁸ Ary Jesosy raiky nandry tio ambodiny lakana, tagnambony ondagna. Nifohazin-do izy, nagnano hoe "Mpampianatra e! tsy mampagnino anao ho faty aty atsika ? ³⁹ Ary nifoha izy nivolagna tamin'ny tsiko, ary nivolagna tamin'ny ranomasigny hoe : "Mijanona, ary mimpetraha tsara!" ka nijanogno rivotro, tsy naresaka. ⁴⁰ Ary nivolagniny tamin-dro hoe : Nagnino anaro mavozo ? ⁴¹ Tegna navozo iro, ka nifampivolagna hoe : Azovy ma ty ? Na tsiko, na ranomasigny magneky izy.