¹ Mivolagna zaho fa irô mpandova, raha mbala tsaiky izy, mitovy amin'ny andevo, na izy tompiny raha jiaby. ² Nefa ndraiky izy, eo ambaniny fifehezagna ndrô mpiambigny ndraiky irô mpikajy raha misy valaira mandra-pahaviany daty izay napetraky ny baba. ³ Ka karazegny koa atsika mbala tsaiky, nandevozin'ny lalàgna fitsipi-pianaran'izao tontolo izao. ⁴ Nefa ndraiky, ka fa navy fahafenoan'ny fotoagna, nandaifa zanakanany Zagnahary, izay natera-biavy, natairaka tao ambanin'ny lalàgna. ⁵ Nagnano izegny Izy mba hanavotagna irô izay ambanin'ny lalàgna, mba hafantsika mandray ny fanaganagna ho zanaka. ⁶ Satria anarô efa zanaka, nirahin-dRagnahary ho agnaty ny Fagnahin'ny Zanakanany, izay mikaiky hoe: "Aba, Ray." ⁷ Kay noho zegny, tsy andevo eky anarô, fa zanaka, raha zanaka anarô, mpandova amin'ny alalan-dRagnahary koa. ⁸ Fa tamin'ny zegny fotoagna zegny, tamin'narô tsy nahay an-dRagnahary, natao ho andevon'ndrô, amin'ny angovo voajanahary, tsy ho zagnahary fekiny na karakory. ⁹ Fa amiziô ndraiky, anarô efa lasa mahay an-dRagnahary, avy iô koa, anarô efa hain-dRagnahary, fa nagnino ndraiky hipodiananarô amin'ny abidim-pianarana malimy sady tsisy dikany? Te ho andevozigny indraiky ma anarô? ¹⁰ Mandinika irô andra ndraiky irô fandrava avy iô irô vanim-potoagna ndraiky irô tôgnonarô! ¹¹ Hatahôrako ny aminarô ai, sao ndraiky ho zava-poana ny asako teo aminarô. ¹² Miangavy anarô zaho, ry rahalahy, magnanova karaha zaho, satria na zaho efa itady kara narô koa. Tsy nagnano ratsy tamiko anarô. ¹³ Nefa hainarô fa noho aretim-batako no nagnambaraiko anarô filazantsara tamin'ny voalohany. ¹⁴ Na zaho nitondra anarô tamin'ny fakam-pagnahy aza, ny toe-batako, anarô tsy nagnano tsinontsinona na nagnilika zaho. Fa nalaihinarô kara fa anjelin-dRagnahary ny fandraisanarô zaho, kara fa izaho igny no Kristy Jesosy. ¹⁵ Aìa zegny fahasoavagnanarô amiziô? fa zaho ndraiky itsagana ivolagna vavolombelogno aminarô fa raha azonarô atao, adosonarô eo masonarô ndraiky namaizanarô zaho izegny. ¹⁶ Kay noho zegny, efa nanjary nataonarô fahavalonarô zaho, fotony nagnambara raha marigny aminarô? ¹⁷ Irô mazoto hitaogno anarô, fa tsy amin'ny tsara. Fa irô ty hampigadra anarô agny antany, mba hampazoto anarô hitady fitia amin'ndrô. ¹⁸ Tsara fo managna zotom-po amin'ny tanjogno tsara, na sendra tsy iô aminarô zaho. ¹⁹ Zanakô ô! mbola mijaly amin'ny hôtsonko fiterahagna ho anarô indraiky zaho zisika hiforônin'i Kristy ao aminarô. ²⁰ Magniry zaho amin'iziô mba afaka miaraka aminarô hagnova feoko, fôtony miasa loha aminarô zaho. ²¹ Ambara zaho, hoanarô zegniny ty ho ambanin'ny lalàgna, tsy regninarô mba nambarany lalàgna? ²² Fotony voasoratra fa i Abrahama nisy zanaka aroe lahy, araiky baka amin'ny andevo vavy bakô araiky baka amin'ny viavy tsy andevo. ²³ Araiky nateraky andevo vavy ara-batagna, fa araiky hafa nateraky viavy tsy andevo tamin'ny volagna fampanantenagna. ²⁴ Irô raha jiaby iô azo raisigny fagnoharagna, fôtony irô viavy aroe iô, magnabara fagnekegna aroe; Araiky aminn'ndrô baka agny amin'ny bongon'i Sinay niteraka tsaiky ho amin'ny fahandevozagna, I Hagara izegny. ²⁵ I Hagara zegny magnambara bongon'i Sinay agny Arabia, mifamaly amin'i Jerosalema amin'iziô, fôtony izy andevo mba ny zanany. ²⁶ Fa i Jerosalema ndraiky agnambony, avy iô regnitsika irô tsy agnisany andevo. ²⁷ Fôtony voasoratra: "Miravoa ianao ry momba tsy miteraka. Mikaikahia mafy, ndraiky magnanaova rontondrontognon'olo ravoravo, ianao zegny tsy mijaly amin'ny hôtsonkôtsonko fiterahagna. Fôtony irô zanaky viavy nafoe maromaron'irô viavy manambady." ²⁸ Fa anarô rahalahy, kara Isaka, zanaky fampanantenana. ²⁹ Tamin'ny fotoagna zegny olo teraka ara-batagna nagnenjiky irô teraka araka Fagnahy. kara izegny iziô. ³⁰ Kanaifa ino ambaran'ny soratra masigny? "Alefasa andevo agny vavy ndraiky zanany lahy. Zanaka lahin'ny andevo vavy tsy handrasa lova miaraka anin'ny zanaka lahin'ny viavy tsy andevo." ³¹ Dikan'izegny, ralahy, tsy zanaka andevo vavy atsika, fa zanaka viavy tsy andevo.