¹ Izy koa Zagnahary zegny no nampitsangagna anarô niaraka tamin'i Kristy, mitadiava raha agnabo agny anarô, izay ipitrahan'i Kristy an-tagnan-kavanan-dRagnahary. ² Mieritrereta raha ambony agny anarô, fa tsy raha eto an-tany eto. ³ Fa efa maty anarô , abôko, ny fiainanarô koa misitriky miaraka amin'i Kristy ao amin-dRagnahary. ⁴ Kristy izay fiainanarô kofa miboaka amin'ny rondro, anarô koa hiaraka hiboaka aminany amin'ny voninahitra. [Fagnamarihagna egny ambanin'ny pejy : Irô dikan-teny taloha sasany irô mivolagna hoe: " Izy kofa miboaka amin'ny rondro i Kristy, izay fiainanarô, anarô koa hiaraka hiboaka aminany amin'ny voninahitra.] ⁵ Vonenarô ny mahakasika ny tegnanarô izay aty an-tany aty: ny filan-dratsy, ny fahalotoagna, firihetan'ny filàgna, fagnirian-dratsy, ny fahatendàgna, izay fanompoan-tsampy. ⁶ Navy baka amininirô raha aby irô no avian'ny helokon-dRagnahary aminirô zanaky ny tsy fankatoavagna. [ Fagnamarihagna egny ambanin'ny pejy: Ny dikan-teny taloha sasany vakigny hoe: " Navy baka amin'irô raha aby irô no avian'ny helokon-dragnahary."] ⁷ Izegny koa no nandihananarô taloha taminarô mbola velogno taminany. ⁸ Amin'iziô ty, adosoanarô raha jiaby reto : heloko, fahasosoragna, irô fikasagna ratsy, fanevatevagna, ndraiky teny fanevatevagna avy amin'ny vavanarô. ⁹ Aza mifampavandy, fa efa narianarô ny toetranarô taloha miaraka amin'ny fagnanaovanarô izy. ¹⁰ Efa nisikininarô ny toetra vaovao izay navaozigny ao amin'ny fahalalagna tsara karaha endrik'ilay namorogno izy. ¹¹ Kay aminjegny, tsisy Grika ndraiky Jiosy na voavositry ndraiky tsy voavositry, barbariana, Skytiana, andevo, olon' afaka, fa Kristy no raha jiaby sady amin'olo jiaby. ¹² Misikina famindram-po, hatsaram-pagnahy, fagnetren-tegna, fahalemem-pagnahy ndraiky faharetagna, amin'ny maha olom-boafidin-dRagnahary anarô, sady masigny no tiany. ¹³ Mifampitondra tsara anarô. Mifamelà. Izy kô misy olo araiky managna fitaraignagna mikasiky olo hafa, mamelà karaha namelan'ny Tompo anarô. ¹⁴ Ambonin'ny raha jiaby zegny, manàgna fitiavagna izay mamehy atsika amin'ny fahatanterahagna. ¹⁵ Ambilà ny fiadagnan'i Kristy hanapaka amin'ny fonarô. Fa avy baka aminjegny fiadanagna zegny no nikaiagna anarô ho vatagna araiky fo. Abôko, mankasitraha. ¹⁶ Ambilà ny tenin'ny Kristy hipetraka maro aminarô amin'ny fahendrena jiaby, abôko, mifampianara ary mifagnanara amin'ny salamo, ndraiky amin'ny fihiragna, ndraiky amin'ny tonon-kiram-pagnahy, mihirà amin'ny fahasoavagna ao am-ponarô ho an-dRagnahary. ¹⁷ Na ino na ino raha ataonarô, na amin'ny volagnagna na amin'ny asa, ataovanarô amin'ny agnaran'ny Tompo Jesosy raha jiaby. Magnamaiza fankasitrahagna ho an-dRagnahary amin'ny alalany. ¹⁸ Anarô magnangy, magnikia vadinarô, fa zegny no mety ao amin'ny Tompo. ¹⁹ Anarô lelahy, tiavà ny vadinarô, ary aza masiaka amindrô. ²⁰ Anarô zanaka, magnikia ray aman-dreninarô amin'ny raha jiaby fa zegny no ankasitrahigny ao amin'ny Tompo. ²¹ Anarô baba, aza magnano raha mampalahelo zanakarô baiky irô tsy ho kivy. ²² Anarô andevo, magnikia ny tomponarô amin'ny raha jiaby amin'ny maha olo, tsy amin'ny asa ataonarô alohanany baiky hahazoanarô fankasitrahagna fo fa amin'ny fo tsotra. Matahora ny Tompo. ²³ Na ino na ino ataonarô, ataovanarô amin'ny fo, karaha ny ho an'ny Tompo fa tsy ho an'olo. ²⁴ Satria hainarô tsara fa avy baka amin'ny Tompo no hazahoanarô valisoan'ny lova ho anarô. Izy no Kristy izay Tompoinarô. ²⁵ Fa olo jiaby izay magnano tsy fahamarinagna, tsy maintsy hahazo sazy baka avy amin'ny tsy fahamarinagna izay nataony, ary tsy misy fizahagna tarehin'olo.