¹ Paoly, Silasy, draiky Timoty namangy Eglizindrô Tesaloniana amin'ny Zagnahary Baba dariky Jesosy Kristy Tompo. Ho aminarô ao ane ny fihadanagna draiky fahasoavagna. [Fagnambaragna ely: Irô dikany volagna sasany taloha tiô igny zegny mivavaka hoe: "Ho aminarô ane ny fahasoavagna daraiky fiadanagna baka amin'ny Zagnahary Baba drai Jesosy Kristy Tompo."] ² Magnamia fisôragna Zagnahary mandrakizay izahay aminarô jiaby, kai manognono anarô amin'ny vavakanay. ³ Izahay zegny tsy mijanogno ary tsy maintsy mahatsiaro anarô agnatraihan-dRagnahary Babatsika ny asan'ny finoagnanarô, ny asan'ny fitiavanarô, ary fahatokisanarô mahadigny amin'ny ho avy amin'ny Jesosy Kristy Tompontsika. ⁴ Ry avako aby tian-dRagnahary, hanay fa Izy zegny efa nifidy anarô, ⁵ fôtony ny volagna Zagnahary zegny navy taminarô tsy tsy tamin'ny volagna fo, fa tamin'ny hery, Fanahy Masigny, draiky fahatokisagna maventy koa. Mitovy amizegny, anarô fo koa ane mba mahay olo karakôry izahay taminarô tiô karaha taminarô. ⁶ Nanjary nangala tahaka zahay draiky Zagnahary anaro, tamin'ny nazahoanarô volagna tamin'ny ady sarotro maventy dariky tamin'ny fifaliagna boaka amin'ny fagnahy Masigny. ⁷ Vokatr'izegny, anjary ohatra tamin'olo jiaby izay mino tao Makedonia draiky Akaia zegny anarô. ⁸ Fa navy taminarô ane narignesandrô volagna ny Tompo, sady tsy ta Makedonia draiky Akaia fo koa zegny. Fa kanefa, tamin'ny toeragna jiaby koa nampihegny finoanarô Zagnahary. Vokatr'izegny, tsy mila mivolagna na ino na ino atsika. ⁹ Fa irô io fo koa ane hivolagna fifankazahoagna nazonay taminarô. Irô ane nivolagna nyb fomba jiaby nampiova anarô nandeha nanompo Zagnahary sady niala tamin'ny sampy mba hanompo Zagnahary margny sady velogno. ¹⁰ Irô koa ny nagnano tatitry fa anarô zegny miambigny ny Zanany boaka an-dagnitry agny, araiky natsangany tamin'ny maty. Jesosy zegny, araiky manadoso atsika amin'ny heloko jiaby na ny bala ho avy.