¹ Tengkalo ninik ari, semuo imam kepalok kan balo tuo-tuo bangso nyin ngamik keputusan besamo besamo dongah Yesus ntuk ngukum mati Sien. ² Lalu, sidok ngikat Yesus, lalu meik sambel nyerahkan Sien kepado Gubernur Pilatus. ³ Tengkalo Yudas, yo nyerahkan Yesus, nongan bahwo Yesus di jetukik ukuman, iyo ngaso nyesal lalu ngembalikan 30 kopingk perak kepado imam-imam kepalok kan balo tuo-tuo, ⁴ katoa, "Aku dah bedosa dongah nyerahkan derah yo com besalah." Tapia kato sidok, "Pei urusana kan kami? Nyin urus ikau am!" ⁵ Lalu, Yudas ngelemparkan kopingk-kopingk perak nyin ke delom Bait Allah lalu ninggelkan a. Lalu, iyo pogi kan ngantungk dirik. ⁶ Tapi a, imam-imam kepalok ngamik kopingk-kopingk perak nyin sambel becakap, "Com depat pei naruha di kas dongah tuk hargo derah." ⁷ Mako, sidok ngamik keputusan besamo lalu khan duit nyin, sidok moli tanah tukangk perik ntuk bedah tambak ntuk urank-urank luar. ⁸ Nyinam dongaha, tanah nyin di sebut 'Tanah Derah' sampe ari tuk. ⁹ Khan piok, genapam pei yo di padahkan Nabi Yeremia: "Lalu, sidok ngamik 30 kopingk perak. Nyinam rego ntuk dirik Sien yo dah ditaksirkan tam urank-urank Israel. ¹⁰ Sidok ngunokan 30 kopingk perak ntuk moli tanah tukangk periuk, dongah yo dah Tuhan perentahkan kepadoku." ¹¹ Waktu nyin te, Yesus bediri di adop Gubernur lalu Gubernur betanyok ke Sien, "Pei kah Ikau Rajo urank Yahudi?" Jawob Yesus, "Ya, tokuh yo ikau katokan." ¹² Tapia, tengkalo Sien di tuduh tam imam-imam kepalok kan tuo-tuo, Sien com nyawob pei-pei. ¹³ Lalu, Pilatus becakap kepado Sien, "Com ningo pei yak Duen e beropei benyak a sidok nuduh Duen?" ¹⁴ Tapi, Yesus com nyambut Pilatus, bahkan ntuk sutik tuduhan pun sehinggo Gubernur nyin nyedi heran guh. ¹⁵ Dah nyedi kebiasakan dah, setiop ari rayo, Gubernur biaso melopaskan begi urank benyak, sikuk tahanan yo dimauk sidok. ¹⁶ Pado waktu nyin, sidok ado tahanan yo terkenal, yo di sebut Barabas. ¹⁷ Jedi, tengkalo urank benyak bekumpul, Pilatus betanyok ke sidok, "Sopei yo kau endak ntuk aku bebaskan, Barabas atau Yesus, yo di sebut Kristus?" ¹⁸ Dongah, Pilatus tau bahwo dongah iri, sidok dah nyerahkan Yesus kepadoa. ¹⁹ Tengkalo Pilatus tonah duduk di bengku pengadilan, binia ngirom posan ke iyo, "Nang ngulah pei pun teradop urank besar nyin. Dongah, aku dah menderito benyak hal hari tuk delom mimpi dongah Sien." ²⁰ Tapi a, imam-imam kepalok kan tuo-tuo nyakinkan urabk benyak ntuk mintok Barnabas lalu munuh Yesus. ²¹ Gubernur betanyok kepado sidok, "Yo monei derik keduo urank nyin yo ikau hondak ntuk aku bebaskan begikau? Lalu, sidok becakap, "Barabas!" ²² Pilatus ke sidok, "Mun piok, pei yo arus kau lakukan ke Yesus, yo di sebut Kristus tuk mo?" Kato sidok semuo salibkan jak Sien e!" ²³ Llalu, Pilatus betanyok, "Ngopei? pei kejahatan yo dah di pulah Sien mo?" Tapi sidok enciak lobih keras gik, "Salibkan Sien!" ²⁴ Tengkalo Yesus com nyelesaikan pei pun, malah kerusuhan mulai tejedi, iyo ngamik aik lalu masuk jeri a di adop urank benyak nyin sambel becakap, "Aku com besalah pei dongah Urank tuk. nyin urus kau surank!" ²⁵ Lalu, semuo urank nyin nyawob, "Derah A ado atas kami kan balo ank kami!" ²⁶ Lalu, Pilatus mebaskan Barnabas begi sidok dah nyambuki Yesus, Pilatus nyerahkan Sien ntuk di salibkan. ²⁷ balo tentara Gubernur meik Yesus ke markas lalu gubernur ngumpulkan seluruh pasukan Romawi ngelilingi Sien. ²⁸ Sidok nanggelkan beju Yesus lalu make kan jubah ungu kepado Sien. ²⁹ Lalu, dah nganyam sebuah mahkota duri besamo-samo, sidok makekan a ke Yesus, sebatangk buluh di jeri kanan Sien, lalu sidok sujud di adop Sien, sambel ngejek Sien, kato sidok, "Salomt, Rajo urank Yahudi!" ³⁰ Di ludaha Sien e, ngamik buluh nyin, lalu mungkal palok Sien. ³¹ Setelah sidok ngejek Sien, sidok nanggelkan jubah ungu nyin derik tubuh Yesus, lalu makekan Sien beju Sien nya semulo, lalu meik Sien pogi ntuk nyalibkan Sien. ³² Tengkalo balo tentaro nyin keluar, sidok betomu seurank lelaki derik Kirene yo besamo simon. Sidok makso Simon ntuk mikul salib Yesus. ³³ Lalu, saat sidok detangk di sebuah tempat yo benamo Golgota, yo retia "Bedah Tengkorak", ³⁴ sodok morik Sien anggur ntuk diminum yo di campur khan empodu, lalu dah ngasoa, Bolek Sien minum a. ³⁵ Tengkalo sidok nyalib kan Yesus, sidok megi-megikan beju Yesus, sidok megi-megikan pakean Sien di antaro sidok khan muangk undi. ³⁶ Lalu, sidok duduk sambel ngawasi Sien di yiom. ³⁷ Di atas palok Sien, sidok masangk tulisan yo bunyia, "TUM YESUS, RAJO URANGK YAHUDI." ³⁸ Pado saat nyin te, ado duok urangk penjahat yo disalibkan besamo Yesus. Sikuk di sebelah kanan sikuk di sebelah kibok. ³⁹ Lalu, urank-urank yo lalu ngino Sien sambel ngelengk-ngelengk kan kepalok, ⁴⁰ lalu becakap, "Duen yo akan ngeruntuhkan Bait Allah lalu manguna delom tigo ari, selamatkan dirik kau s'urank! Mun Duen Anak Allah, turunam derik salib nyin e!" ⁴¹ Piok gam imam-imam kepalok, besamo ke ahli-ahli Taurat, kan balo tuo-tuo gam ngejek Yesus, kato sidok, ⁴² "Iyo nyelamet kan urank lain, tapi a Iyo com mampu nyelamatkan dirik-A surank. Mun Sien tuk Rajo Israel, ronakpom Sien turun derik salib nyin saat tuk lalu kito pun pecayoam ke Sien. ⁴³ Sien pecayok ke Allah, mako ronakpom Allah nyelamatkan Sien saat tuk, mun Allah endak ke Sien. Dongah Sien surangkam madahkan, 'Aku tuk yam Anak Allah.'" ⁴⁴ Balo penjahat yo di salibkan besamo khan Sien ngejek Sien gam. ⁴⁵ Mulai jom duok belas, kegelapan atas seluruh tanah nyin, sampe jom tigo. ⁴⁶ Kiro-kiro, pado jom tigo, pado jom tigo, Yesus beseruam khan suaro keras, kato-Sien, "Eli, Eli, lama sabakhtani?" yo artia, "Allah-Ku, Allah-Ku, ngope Duen ninggelkan Aku?" ⁴⁷ Lalu, beberopei derik sidok yo bediri dinun, saat sidok ningo nyin, sidok bekato, "Urank tuk gik nyapo Eli." ⁴⁸ Tibo-tibo, sikuk derik sidok lari, lalu ngamik bungo kerangk, masahik a khan angur asam, lalu ngikatkana pado sebuah buluh, lalu morikkan a ke Yesus ntuk di minum. ⁴⁹ Tapia, yo laina becakap ," yom kiyo tongan, pei kah Elia akan detank ntuk nyelamatkan Sien." ⁵⁰ Lalu, Yesus beseru khan beseru khan suara besar sekali gik sambil nyerahkan Roh Sien. ⁵¹ Kan, tongan, tirai delom Bait Allah carak nyedi duok begian, derik pucuk sampe ke beruh, lalu bumi beguncangk, betu-betu pun tabolah. ⁵² Tambak-tambak tebukak, kan benyak tubuh urank-urank suci yo dah mati di bengkitkan. ⁵³ Kan, setelah keluar derik tambak-tambaka, dah kebengkitan Yesus, sidok mansuk kota suci kan nongankan derik kepado benyak urank. ⁵⁴ Kepalok-kepalok pasukan, kan sidok yo besamo khan a ngawasi Yesus, tengkalo sidok nongan gempa bumi kan segalo hal yo tejedi tuk, nyedi golak guh kan bekato, "Benaram, Sien tuk yam Anak Allah!" ⁵⁵ Dinun, ado benyak tinok yo nongan derik kejauhan, yo ngikutik Yesus derik Galilea ntuk ngelayanik Sien. ⁵⁶ Diantaro sidok ado Maria Magdalena, Maria umak Yakobus kan Yusuf, sereto umak derik anak-anak Zedebeus. ⁵⁷ Tengkalo ari mulai malom, detankam seurank yo kayo derik Arimatea benamo Yusuf, yo dah nyedi murid Yesus gam. ⁵⁸ Iyo pogi kepado Pilatus kan mintok tubuh Yesus. Lalu, Pilatus merentahkan supayo tubuh Yesus diborikkan kepado Yusuf. ⁵⁹ Lalu, Yusuf ngamik tubuh Yesus, lalu mungku Sien khan kain linen yo beresih, ⁶⁰ lalu ngaleikan Sien delom tambak yo beru, wak iyo serangk am, yo dah iyo gali di bukit betu. Lalu, Yusuf ngulingkkan betu sebuah besar ke lawangk tambak nyin lalu pogi. ⁶¹ Kan, dinun ado Maria Makdalena kan Maria yo lain tongah duduk di adop tambak nyin. ⁶² kekolama, yam ari sesudah persiapan ntuk ari Sabat, imam-imam kepalok kan urank-urank Farisi dikumpolkan keadop Pilatus. ⁶³ Kato sidok, "Tuan, kami ingat bahwo tengkalo si pengelakar nyin gik idup, Sien kalok becakap, 'Dah tigo ari, Aku akan bengkit gik.' ⁶⁴ Dongah nyin, perentahkan ak supayo tambak nyin di jago sampe ari yo ketigo, sopei gak tau golak murid-murid Sien akan detangk kepado urank benyak, 'Sien dah bengkit derik antaro urank mati.' Kan penipuan tuk lobih hebat derik yo pertamo." ⁶⁵ Pilatus becakap ke sidok, "Ikau ado penjago.pogi jego am sebegi mone yo kau tau." ⁶⁶ Lalu, sidok pogi kan mengmankan tambak nyin besamo khan regu penjago, sereto menyegel betu penutup tambak.