¹ Tengkalo Yesus dah nyelesaikan semuo kacap tuk, kato Sien ke murid-murid Sien, ² "Ikau tau duok ari giik paskah dah, kant Anak Ensio akan di serahkan ntuk di salibkan." ³ Lalu, balo imam kepalok kan tuo-tuo bangso nyin dikumpolkan besamo di istana Imam Besar, yo benamo Kayafas. ⁴ Lalu, besekongkol ntuk nangkap Yesus kant tipu daya lalu munuh Sien. ⁵ Tapia kato sidok, "Nang selamok perayoan supayo nang ado kerusuhan di antaro urank b'yank." ⁶ Tengkalo, Yesus berado di Batania, di umah Simon si Kusta, ⁷ seurank tinok d'tank ke Sien khan sebotol guci pualam kocit berisik minyak wangi yo mahar guh, lalu tinok nyin nyiromkan a ke kepalok Yesus tengkalo Sien tongah duduk makan. ⁸ Tengkalo murid-murid Sien nongan sidok godik kato a, "ngopei pemborosan tuk? ⁹ Dongah, minyak wangi nyin d'pat di juel ntuk hargo yo mahar kan diborikkan ke yo miskin." ¹⁰ Tapi, Yesus, tau hal tuk, becakap ke sidok, " Ngopei kou nyusahkan tinok tuk? Dongah, iyo ngelakukan pempulah yo j'ngak ke Aku. ¹¹ Dongah ikau urank-urank miskint selalu nyedi wak ikau, tapi ikau com akan selalu wak Aku. ¹² Tengkalo tinok tuk nuyung minyak wangi ke tubuh-Ku, iyo ngelakukana ntuk nyiap penguburanan-Ku. ¹³ Aku madahkan hal yo sebenara ke kau bahwo di monei pun birito injil di beritokan ke seluruh dunio, pei yo dah di pulah tinok tuk akan di cakapkan gam sebegi peringatan akan iyo." ¹⁴ Lalu, sikuk d'rik keduok belas murid, yo bedemo Yudas Iskariot, pogi ke pado imam-imam kepalok, ¹⁵ sambel becakap, "Ikau akan morik ku opei mun akau nyerahkan Sien ke kulok?" Lalu, sidok netapkan 30 kopingk perak ntuka. ¹⁶ Lalu, sejak nyin, iyo ngogok kesempatan j'ngak ntuk nyerahkan Yesus. ¹⁷ Pado ati pertamo Roti com beragi, balo murid d'tank ke Yesus lalu betanyok, "Dimonei Duen endak kami nyiapkan makan paska ntuk duen?" ¹⁸ Yesus nyawob, "Mansuklah ke kota, ke seurank, lalu katokan ke iyo, 'Guru becakap, "Waktu-Ku dah somak. Aku akan ngerayakan Paskah di umahkau besamo murid-murid -Ku."" ¹⁹ Balo murid ngelakukan tokuh Yesus dah posankan ke sidok, lalu nyiapkn Paskah nyin. ²⁰ Tengkalo mulai malom, Yesus duduk makan besamo khan keduok belas murid. ²¹ Lalu, tengkalo sidok tongah makan, Sien bekato, "Aku madahkan yo sebenara ke kau bahwo salah sikuk derik ikau akan ngianatik Aku." ²² Sidok sedih guh kan masing-masing urank mulai becakap ke Sien, "Pastia, kanak aku, Doto?" ²³ Jawob Yesus, "Iyo, yo encolupkan j'ria ke d'lom mangkuk besamo-samo kan Aku, iyom yo akan ngianat Aku. ²⁴ Anak Ensio akan pogi tokuh yo tetulis tentang Iyo. Tapia, celakalah urank nyin, yo tam iyo Anak Ensio dikhianati! Lobih beit urank tokuh nyin com di lahirkan." ²⁵ Lalu Yudas yo akan nyerahkan Yesus becakap ke Sien, "Pasti kanak aku, e Rabi?" Kato Yesus keiyo, "Ikau dah madahkana." ²⁶ Tengkalo sidok tonah makan, Yesus ngamik roti. dah selesai memberekatika, Yesus mocah-mocahkan lalu morikkana ke balo murid sereto becakap, "Amik dom kan makanlah, tum tubuh-Ku." ²⁷ Lalu, Sien ngamik cawant, ngucap syukur, lalu morikkana ke sidok, kato Sien, "Kulok semuo, minumam d'rik padoa. ²⁸ Dongah, tum darah-Ku, d'rah perjenjian beru yo di tumpahkan b'gi benyak urank ntuk pengampunan dosa-dosa. ²⁹ Aku madahkan ke kau bahwo aku comam minum hasel d'rik batank anggur tuk, d'rik saat tuk sampe ari nyin, tengkalo Aku minum anggur yo beru besamo kau d'lom kerajoan Bapa-Ku." ³⁰ Setelah nyanyikan sebuah pujian, sidok pogi ke bukit Zaitun. ³¹ Lalu Yesus becakap ke murid-murid Sien, "Kulok semuo akan tesontuk dongah Aku malom tuk.Dongah ado tetulis, 'Aku akan mungkal gembala, lalu kawanan domba-domba d'rik kawanan nyin akan tercerai berai'. ³² Tapia, setelah Aku bengkit, Aku akan nyenoluk kulok ke Galilea." ³³ Kato Petrus, "Walaupun semuo tesontuk dongah Duen, aku com akan kalok tesontuk." ³⁴ Kato Yesus ke iyo, "Aku madahkan yo sebenara ke kau bahwo pado malaom tuk, sebelum manuk bekokok, ikau akan nyangkal Aku tigo kali." ³⁵ Pertus becakap ke Sien, "Sekalipun aku harus mati besamo Duen, aku com akan nyangkal Duen!" Semuo murid madahkan hal yo sama gam. ³⁶ Lalu Yesus detank besamo murid-murid Sien di tempat yo bedemo Getsemani kan Sien bekato kepado murid-murid Sien, "Dudukam dituk, sementaro Aku kinun tuk bedoa." ³⁷ Lalu Sien meik Petrus kan keduok anak Zedebeus besam Sien, lalu Sien mulai beduko kan besusah ati. ³⁸ Lalu, Sien becakap ke sidok, "Ati-Ku beduka guh, bahkan nak mati asoa. Tinggelam dituk kan tetapam bejago-jago besamo-Ku." ³⁹ Sien sikit menjauh, lalu sujud khan muko Sien nyentuh tanah lalu bedoa, kato Sien, "Apak-Ku, mun mungkin, ronak pom cawan tuk belalu d'rik-Ku. Tapi'a, nang tokuh yo Aku endak, ngelainkan kehondak Duen." ⁴⁰ Lalu, Sien d'tank kepada murid-murid Sien kan nomuik sidok tongah tiduk.Lalu, Sien becakap kepado Petrus," J'di, kau com sanggup bejaga-jaga besamo Aku selamo 1 jom? ⁴¹ Bejago-jago kan bedoalah supayo kau nang j'tuk ke d'lom pencobaan. Roh memang penurut tapi daging lemah." ⁴² Yesus pogi gik ntuk keduok kalia lalu bedoa, kato Sien, "Apak-Ku, mun tuk com d'pat belalu kecuali Aku minuma, kehondak Duen yo akan tejedi." ⁴³ Sekali gik, Sien d'tank lalu nomuik sidok tiduk dongah mato sidok teraso borat. ⁴⁴ Mako, Sien ninggelkan sidok, lalu pogi gik, lalu bedoa ntuk ketigo kalia, ngucapkan kato-kato yo samo. ⁴⁵ Lalu Yesus bebelik ke balo murid Sien kan bekato, "Tiduk dom kan berentim. tonganam, waktua makin somak Anak Ensio akan di serahkan ke jeri urank-urank bedosa. ⁴⁶ Bengkitam, ayok kito pogi. Tongan,urank yo nyesah Aku dah somak." ⁴⁷ Sementaro Yesus gik becakap, Yudas, sikuk derik keduok murid nyin d'tank. besamo-samo khan iyo, kerumunan urank b'yak khan parank kan pemangkungk, d'rik imam-imam kepalok kan tuo-tuo bengso nyin. ⁴⁸ Waktu nyin te, iyo yank nyerahkan Yesus morik sidok tandok, katoa, "Sopei yo aku cium, iyenam Uranka, tangkapam Sien." ⁴⁹ Yudas segero nyomak kepado Yesus sambel becakap, "Salomt, Rabi!" Lalu Yudas encium Sien. ⁵⁰ Yesus bekato keiyo, "Betur, pulah pom maksud kedetankan kau." Lalu urank b'yank nyin nyomak, mijab Yesus lalu nangkap-Sien. ⁵¹ Ado sikuk, d'rik sidok yo besamo Yesus ngulurkan jeria, narik parangk'a lalu nyerank hambo imam besar nyin, lalu nungkungk kelindangk a. ⁵² Lalu, Yesus bekato keiyo, "Sarungkkan parangk kau ke bedaha, dongah semuo yo nggunakan parangk akan binaso tam parangk'a. ⁵³ Atau, sangko kau Aku com mampu memohon ke Apak-Ku, Sien, saat tuk pun mampu morik lobih d'rik duok belas pasukan malekat ntuk-Ku? ⁵⁴ Tapia, koti nantik Kitab Suci akan di genapik yo madahkan arus tejedi tokuh tuk? ⁵⁵ Pado waktu nyin, Yesus becakap ke urank b'nyak nyin, "Ngopei tokuh ngelawan penjahat ikau keluar khan podangk kan pemontup ntuk nangkap Aku? Tiap ari, Aku duduk ngajer di Bait Allah ngopei ikau com nangkap Aku. ⁵⁶ Tapia, semuoa tuk tejedi supayo kitab-kitab balo nabi digenapik." Lalu, semuo murid ninggelkan Sien lalu lari. ⁵⁷ Sidok yo nangkap Yesus meik Sien kepado Kayafas, sang Imam Besar, tempat balo ahli-ahli Taurat kan paro tuo-tuo bekumpol besamo. ⁵⁸ Lalu, Petrus nuntut Yesus derik kejauhan sampe ke halaman umah imam besar. Lalu, Petrus mansuk, duduk besamo balo pengawal ntuk nongan koti pekaro jedia pekaro nyin. ⁵⁹ Balo imam kepalok kan seluruh Sanhendrin ngogok kesaksian palsu teadop Yesus supayo depat ngukum mati Sien. ⁶⁰ Tapia, sidok com nomukana meskipun b'nyak saksi palsu yo d'tangk Lalu ado duok urangk yo muncul, ⁶¹ lalu bekato, "Urank tuk bekato, 'Aku mampu ngerobahkan Bait Allah lalu embenguna gik delom tigo ari." ⁶² Lalu, Imam Besar bediri kan bekato kepado Yesus, "Peikah Duen com mado jawoban?" ⁶³ Tapi, Yesus tetap diom. Kan, Imam Besar nyin bekato kepado Yesus, "Demi Allah yo idup supayo Duen madahkan ke kami, peikah Duen tuk yak Mesias, Anak Allah?" ⁶⁴ Yesus bekato kke Sien, "Ikau surangk yo dah madaha. Tapia Aku madahkan keikau bahwo mulai d'rik saat tuk ikau akan nongan Anak Ensio duduk di sebelah kanan yo Mahakuaso, kan d'tank di atas awan-awan di langit." ⁶⁵ Lalu, Imam Besar nyarak bejua sambel becakap, "Sien dah ngujat! Peikah perelua gik balo saksi? saat tuk ikau dah ningo hujat Sien. ⁶⁶ Koti pendepat kau?" Balo pemimpin Yahudi nyin nyawob, "Sien pantas diukum mati." ⁶⁷ Lalu, sidok ngeludahik Sien, lalu ninju Sien. Lalu yo lain nampar Sien. ⁶⁸ Kato sidok, "Bernebuat am tentangk kami, hoi Mesias; sopeiam yo mungkal Duen?" ⁶⁹ Waktu nyin te, Petrus duduk di luar halaman lalu seurank pelayan betinok d'tangk ke iyo sambel becakap kato a,"Ikau pun besamo khan Yesus, urangk Galilea nyin." ⁷⁰ Tap a, Petrus nyangkal a di adop sidok semuo, kato a "Aku com tau pei pei yo kulok cakapkan." ⁷¹ Tengkalo Petrus duduk di lawangk gerobangk, pelayan tinok yo lain a nongan a sambel becakap ke urank-urank yo ada diyok, "Urank tuk besamo kan Yesus derik Nazaret nyin." ⁷² Sekali gik, Pertus nyangkala khan sumpah, "Aku com ngenal urank nyin." ⁷³ Com lambet setelah nyin, urank-urank yo bediri diyok nyomakik Pertus sambel bekato, "Pasti ikau tuk yak gam salah sikuk derik sidok dongah logat kulok samom." ⁷⁴ Lalu, Pertus mulai mengutuk sambel besumpah kato a, Aku com ngenal urank nyin." Lalu, manuk pun bekukuk. ⁷⁵ Lalu, Pertus teringat akan cakap Yesus, "Sebelum manuk jantan bekukuk, ikau akan nyangkal Aku tigo kali." Lalu Petrus keluar sambel nangis khan sedih guh.