¹ Pilatus ngambik Yesus kant merintahkan supayo Yesus disesah. ² B'lo prajurit nganyam sebuah mahkota d'rik ranting-ranting bedurik kant makaikan'a ke kepalok Yesus, kant makaikan jubah ungu kepado-A. ³ Sidok maju nyomak'ik Yesus kant bekato, "Salam, hei Rajo urank Yahudi!" Lalu, sidok nampar muko-A. ⁴ Pilatus keluar gik kant bekato kepado sidok, "Tongan'am! Aku akan mbeik Yesus keluar kepado kau supayo ikau tau bahwa aku com nomukan kesalahan pei pun pado-A." ⁵ Lalu, Yesus keluar kant makai mahkota durik kant jubah ungu. Pilatus bekato kepado sidok, "Tongan'ak Ensio tuk!" ⁶ Tengkalo imam-imam kepalok kant b'lo penjego nongan Yesus, sidok beteriok, "Salibkan Io, salibkan Io!" Akan tetapi, Pilatus bekato kepado sidok, "Beik'ak Io kant salibkan surank dongah aku com nomukan kesalahan pei pun pado-A." ⁷ Urank-urank Yahudi nyin njawab Pilatus, "Kami mpunya'ik ukum, kant nurut ukum nyin, Io cak mati dongah Io nganggop dirik-A te Anak Allah." ⁸ Tengkalo Pilatus ningo pekatoan nyin, io semakin golak ⁹ kant mansuk gik ke gedung pengadilan, kant betanyok kepado Yesus, "D'ri monekah asal Ikau?" Akan tetapi, Yesus com njawab'a. ¹⁰ Pilatus bekato kepado-A, "Ikau bolek ngomong ngan aku? Peikah Ikau com tau bahwa aku mpunya'ik kuaso ntuk mbebaskan Kau kant mpunya'ik kuaso ntuk nyalibkan Ikau?" ¹¹ Yesus njawab, "Ikau com ado kuaso pei pun atas dirik Aku, kecuali kuaso nyin diborikkan kepado kau d'rik atas. Nyin'am sebab'a, urank yo nye'rahkan Aku kepado kau lobih bosar dosa'a." ¹² Seabis ningo hal nyin, Pilatus beusaho ntuk mbebaskan Yesus, tapi urank-urank Yahudi beteriok, "Mun ikau mbebaskan Urank tuk, ikau kan'ak sahabat Kaisar; setiap urank yo nganggap dirik'a rajo bereti ngelawan Kaisar." ¹³ Tengkalo Pilatus ningo kato-kato nyin, io mbeik Yesus ke luar, kant dudok di bengku pengadilan, di suatu tempat benemo Litosrotos, tapi d'lom bahaso Ibrani disobut Gabata. ¹⁴ Ari nyin te ari pesiapan ntuk Paskah, waktu nyin sekitar jom keenam. Pilatus bekato kepado urank-urank Yahudi, "Tuk'ak rajo kau!" ¹⁵ Mangko, sidok beteriok, "Singkirkankan Io! Singkirkan Io! Salibkan Io!" Pilatus bekato kepado sidok, "Cakkah aku nyalibkan rajo kau?" Imam-imam kepalok njawab, "Kami com ado rajo selein Kaisar!" ¹⁶ Akher'a Pilatus nye'rahkan Yesus kepado sidok ntuk disalibkan. ¹⁷ Yesus keluar ngan mikol salib-A surank nuju ke tempat yo bedemo "Te'mpat Tengkorak" yo d'lom bahaso Ibrani disobut "Golgota". ¹⁸ Diok, sidok nyalibkan Yesus besamo ngan duok urank lein, yo disalibkan di kanan kant kibok Yesus, sementaro Yesus ado di tongah. ¹⁹ Pilatus pun nulis sebuah tulisan kant nempatkan'a di atas kayu salib. Tulisan nyin bebunyi, "YESUS URANK NAZARET, RAJO URANK YAHUDI." ²⁰ B'nyak urank Yahudi mbeco tulisan nyin dongah tempat Yesus disalibkan nyin beado di somak kota, kant tulisan nyin ditulis d'lom bahasa Ibrani, Latin, kant Yunani. ²¹ Mangko, imam-imam kepalok urank Yahudi bekato kepado Pilatus, "Nang nulis, 'Rajo urank Yahudi', tapi tulis'ak, Urank nyin bekato, 'Aku'ak Rajo urank Yahudi. " ²² Njawab Pilatus, "Pei yo dah aku tulis, akan tetap tetulis!" ²³ B'lo prajurit, tengkalo sidok dah nyalibkan Yesus, ngambik pakaian-A kant mbegikan'a j'di empat, sutik b'gian ntuk mansing-mansing prajurit, kant jubah-A; jubah nyin com ado kelim'a, engkah ditenun d'rik atas ke beruh tanpa jeitan. ²⁴ B'lo prajurit nyin bekato seurank kepado yo lein, "Nang'ak kito ncarak'a, tapi ngundi atas'a ntuk mutuskan sopei yo akan nd'patkan'a." Hal tuk tej'di supayo ge'nap'ak yo dah tetulis d'lom Kitab Suci: "Sidok mbe'gi-b'gi pakaian-Ku di antara sidok kant ntuk jubah-Ku, sidok mbuang undi." Maz.22:18 Tokuh nyin'am b'lo prajurit ngelakukan semuo hal nyin. ²⁵ Sementaro nyin, umak Yesus, medik tinok umak Yesus, Maria bini Klopas, kant Maria Magdalena, bediri di somak salib Yesus. ²⁶ Tengkalo Yesus nongan umak-A kant murid yo Io kasih'ik bediri di nun, Io bekato kepado umak-A, "Tinok, tongan'ak, tuk anak kau!" ²⁷ Lalu, Yesus bekato kepado murid yo dikasih'ik-A nyin, "Tuk'ak umak kau!" D'ri saat nyin, murid nyin nerimok umak Yesus tinggel di umah'a. ²⁸ Abis nyin, Yesus, yo ngetau'ik bahwa semuo'a dah telaksana, ntuk nggenap'ik Kitab Suci, Io bekato, "Aku aus!" ²⁹ Di nun ado sebuah benjana ponuh angur mansam. Dongah nyin, sidok nancapkan bunga karang yo dah dicolupkan ke d'lom anggur mansam pado seb'tang hisop kant ngunjukkan'a ke mulut Yesus. ³⁰ Seabis ncecap anggur mansam nyin, Yesus bekato, "Dah selesai." lalu, Io nundukkan kepalok-A kant nye'rahkan nyao-A. ³¹ Dongah ari nyin te ari pesiapan, kant supayo mayat-mayat nyin com tetap beado di kayu salib pado ari Sabat, dongah Sabat te ari bosar, urank-urank Yahudi mintok kepado Pilatus supayo kaki urank-urank yo disalib nyin dipatahkan kant mayat-mayat'a diturunkan d'rik salib. ³² Lalu, b'lo prajurit d'tang kant matahkan kaki urank yo petamo kant urank yo lain'a, yo disalibkan besamo Yesus. ³³ Tapi'a, tengkalo sidok sampai kepado Yesus kant nongan bahwa Io dah mati, sidok com matahkan kaki-A. ³⁴ Tapi, salah seurank prajurit nyin nusukkan tombak'a ke lambung Yesus, kant setengkalo nyin gam, d'rah kant aik ngaler keluar. ³⁵ Urank yo nyaksikan peritiwa nyi'am yo mborikkan kesaksian nyin, kant kesaksian'a bujor kant io tau mun io ngatokan yo sebujor'a, supayo ikau pun pecayok . ³⁶ Dongah, semuo tuk tej'di supayo genap'ak yo dah tetulis d'lom Kitab Suci: "Com sutik pun d'rik tulang-A yo akan dipatahkan." ³⁷ Kant gim, d'lom b'gian lein Kitab Suci bekato, "Sidok akan mandang Io yo dah sidok tikam." ³⁸ Seabis semuo nyin, Yusuf d'ri Arimatea, yo pun nj'di murid Yesus tapi secaro betapuk-tapuk dongah golak kepado urank-urank Yahudi, mintok kepado Pilatus supayo io dipebolehkan ngambik mayat Yesus; kant Pilatus ngabulkan'a. J'di, Yusuf d'rik Arimatea d'tang kant ngambik mayat Yesus. ³⁹ Nikodemus, urank yo doluk nomu'ik Yesus pado malam ari, pun d'tang ngan mbeik campuran minyak mur kant gaharu, yo boret'a sekitar limok puluh kati. ⁴⁰ Mangko, sidok ngamik mayat Yesus kant mbungkus'a pakai kain lenan yo diborik rompah-rompah, sesuai adat penguburan urank Yahudi. ⁴¹ Di somak tempat Yesus disalibkan, ted'pat sebuah taman kant di d'lom taman nyin ado sebuah kuburan b'ru yo com sutik mayat pun kolok diletakkan di nun. ⁴² Dongah ari nyin te ari pesiapan b'gi urank Yahudi, kant letak tambak nyin com jeuh, sidok ngeletakkan mayat Yesus di nun.