¹ Anak-anak, taati'ak urank tuo'kau dlom Doto dongah tuk adolah hal yo bnar. ² "Hormati'ak apak kant umak'kau," tuk adolah prentah petamo yo diserto'ik ngent jenji. ³ "supayo idupkau be'et kant ikau akant beumor panjank di bumi.'' ⁴ Apak-apak, nank'ak ngemicu anak-anak'kau ntuk nyedi godik, tapi bsarkan'ak sidok dlom disiplint kant nasihat Doto. ⁵ Budak-budak, taati'ak tuankau yo ado di dunio tuk ngant hormat kant gontar, kant ketulusant ati tokuh ntuk Kristus. ⁶ Nank tokuh urank-urank yo ngrejokant pekrejoant engkah ntuk di tongan urank -- ntuk nyenangkant ensio, tapi sebegei hamba-hamba Kristus yo nglakukant kehendak Allah derik ati. ⁷ Ngelayanik ngant seponoh ati tokuh 'ntuk Doto kant kan'a ntuk ensio. ⁸ Dongah, ikau tau, entah io budak atau urank merdeka, mun io nglakukant hal yo be'et, Doto kant mborik upah kepado'a. ⁹ Tuan-tuan , lakukant'am gk kepado hamba-hamba kau. Bronti'am ngancam dongah ketauik'ak be'et tuankau atau tuan sidok samo-samo ado di srugo, kant Io com pileh kasih. ¹⁰ Akhir'a, nyedi'ak kuat dlom Doto kant dlom kuat kuaso-A. ¹¹ Pakai'am seluruh pelengkapant senjeto Allah supayo ikau dpat bediri ngelawant tipu deyo Iblis. ¹² Dongah, pejuangant kito kan'a ngelawant degint kant derah, tapi ngelawant pemrintah-pemrintah, penguaso-penguaso, kekuatant-kekuatant dunio kegelapant tuk, kant ngelawant kekuatant roh derik si jahat yo ado di langit. ¹³ Dongah nyint, pakai'am seluruh pelengkapant senjeto Allah supayo ikau dpat betahant saat ari yo jhat nyint dtank, kant udah semuo'a suntunk ikau t'tap bediri. ¹⁴ Jedi, badiri'am toguh, ngant norik ikat pinggank kebenarant di sekelilink pinggangkau kant pakai'ak beju zirah keadilant, ¹⁵ kant pasank'am alas kakikau ngant kesiapant Injil damai sejahtera. ¹⁶ Dlom segelo hal, amik'am perisai imant ntuk ikau dpat ngemadomkant semuo panah api derik si jahat . ¹⁷ Amik,am ketoponk keselamtant sreto pedank Roh, yonyint firman Allah, ¹⁸ sambel badoa setiap waktu dlom Roh 'ngant semuo doa kant pemohonant. Dlom doakau nyint, bejego-jego'ak 'ngant segelo ketekunant sambel naitkant semuo pemohonant begi semuo urank kudus. ¹⁹ Bedoa'ak gak ntuk aku supayo peibilo aku mbukok mulut'aku, pekakatoant dikaruniokant kepado aku sehinggo aku 'ngant breni mbritokant rahasia Injil. ²⁰ Dongah Injil nyint'am, aku nyedi utusant yo teblenggu. Doakan'ak supayo aku dpat mbritokant'ak ngant breni se'koti searus'a aku bebicaro. ²¹ Tikhikus, medik seimantku yo tekasih kant pelayant yo setia dlom Doto, akant ngemadahkant segelo jolu ka ikau supayo ikau gak tau kotimo keadaantku kant opei yo aku pebuet. ²² Aku memank ngutus io ka ikau ntuk tujuant tuk, yonyint supayo ikau tau kaber kamik kank supayo io dpat ngibur atikau. ²³ Damai sejahtera begi medik-medik seimant, kant kasih ngant imant derik Allah Apak kant Doto Yesus Kristus. ²⁴ Anugrah nyertoik semuo urank yo ngasehik Doto kito, Kristus Yesus, 'ngant kasih yo com 'kant binaso.