¹ kelimok ari'a, Imam Besar Ananias turun besamo ngan beberope tuo-tuo ngan seurank pengacaro bedemo Tertulus. Sidok ngajukan tuntutan teadop Paulus kepado gubernur. ² Udah Paulus di panggel, Tertulus mulai'am nuduh'a ngan bekato, " Dongah ngelalu'ik Tuan, kami selalu ngasokan kedamaian kan perubahan-perubahan tej'di b'gi bangso tuk dongah kebajikan Tuan, ³ kami nyambut'a ngan segelo caro kan di semuo tompat ngan ponuh aso syukur, yo Mulio Feliks. ⁴ Tapi'a supayo com ngabiskan waktukau agik, aku muhun kemurahan atikau kami sebentar am. ⁵ Dongah, kami dah nomukan bahwo urank tuk yam urank pengacau, yo nimbulkan kekacauan di antaro urank-urank Yahudi di seluruh dunio. Kan, io tum pemimpin sekte Nasrani. ⁶ Io bahkan berusaho menajiskan Bait Allah sampe kami nampar'a.[Kami endak ngadilik'a sesuai khan ukum kami. ⁷ Tapi, Lisias, kepalok pasukan nyin, d'tang lalu ngerobut'a d'rik jeri kami ngan kekorasan, ⁸ sambel merentahkan urank-urank yo nuduh'a ntuk ngadop ikau.] Ngan meriokso'a surank, ikau akan d'pat ngetahuik d'rik'a tentank segelo yo kami tuduhkan kepado'a." ⁹ Uran-urank Yahudi besepakat gam di d'lom tuduhan nyin sambel negaskan bahwo hal nyin memang benar ¹⁰ Tengkalo gubernur morik isyarat b'gi Paulus ntuk bebicaro, Paulus nyawob, " Seudah aku tau selamo betaun-taun bahwo ikau dah j'di hakim atas bangso tuk, aku ngan sonang ati mela dirik. ¹¹ Ikau d'pat ngetahuik bahwo com lobih d'rik duok bolas ari yo lalu aku nait ke Yerusalem tuk semayank. ¹² Sidok com kalok nomukan aku tongah betengkar ngan sopei pun atau ngasut kerumunan urank, b'et di Bait Allah, sinagoge-sinagoge, ndakpun di d'lom kota. ¹³ Sidok pun com d'pat muktikan ka ikau pei yo sidok tuduhkan ka aku saat tuk. ¹⁴ Tapi, aku ngakuk ka ikau, bahwo sesuai ngan J'len nyin, yo sidok sobut sebuah sekte, aku semayank ke Allah inek moyank kito, ngan pecayok pado segelo jolu yo sesuai ngan Hukum kan yo tetulis di d'lom kitab b'lo nabi, ¹⁵ Sambel naruh pengaropan di d'lom Allah, yo sidok tunguk gam, b'et ntuk urank benar ndakpun yo com benar. ¹⁶ D'lom hal tuk, aku beusaho ntuk meliharo ati nurani yo murni, b'et di adopan Allah mndakpun ensio. ¹⁷ Saat tuk, udah beberopei taun, aku d'tank ntuk mbeik sedekah b'gi bangso aku kan ntuk morik pesomahan-pesomahan. ¹⁸ Sementaro aku tongah ngelaku'a, sidok nomukan aku, udah aku di sucikan di Bait Allah, tanpa kerumunan urank atau kerusuhan. Tapi, di nun beberopei urank Yahudi d'rik Asia. ¹⁹ Searus'a, sidok'ak yo ado di adopan kau kan ngajukan tuduhan, mun memang sidok ado sesuatu ntuk ngelawan aku. ²⁰ Atau, ronak pom urank-urank nyin surank yo moriktau pelangeran pei yo sidok tomukan tengkalo aku bediri di adop Sanhedrin, ²¹ kecuali sutik penyatoan yo aku perakkan tengkalo aku bediri di antaro sidok, ' Dongah kebengkitan urank mati, aku dihakim'ik di adopan kau ari tuk." ²² Tapi'a Feliks, yo milik'ik pengetahuan lobih tepat tentank J'len nyin, nunda kasus nyin ngan bekato, " Tengkalo Lisias, kepalok pasukan nyin, turu, aku akan memutuskan kasus kau." ²³ Lalu, Feliks merentahkan perwiro nyin supayo Paulus tetap di tahan, tapi ngan keringanan kan com nyogah kawan-kawan'a ntuk ngelayan'ik io. ²⁴ Dah beberopei ari, Feliks d'tang besamo bini'a, Drusila, yo nyin urank Yahudi kan nyuruh Paulus d'tank kan ningokan Paulus becakap tentank iman'a di d'lom Yesus Kristus. ²⁵ Lalu, sementaro Paulus tongah betukar pikiran tentank kebenaran, pengendalian dirik, kan penghakiman yo akan d'tang, Feliks nyedi golak kan bekato," pogi'am saat tuk.Tengkalo aku d'pat kesompatan, aku akan manggel kau." ²⁶ Pado saat yo samo, Feliks bearop bahwo Paulus akan morik'a duit. Dongah nyin, Feliks raget nyuruh Paulus d'tank kan becakap ngan io. ²⁷ Tapi'a, udah duok taun belalu, Perkius Festus gentikan Feliks. Kan, dongah ndak nyonangkan urank-urank Yahudi, Feliks ngeronakkan Paulus di d'lom penyero.