¹ Paulus encelomat Sanhedrin kan bekato, " Saudero-sauderoku, aku dah j'len'ik idupku ngan segonap ati nurani yo b'et di adop Allah sampei ari tum." ² Lalu, Imam Besar Ananias merentahkan urank-urank yo bediri somak Paulus ntuk nampar mulut Paulus. ³ Lalu, Paulus betanyok ke io, "Allah akan nampar kau, hei ikau temok yo di cat putih! Peikah ikau duduk ntuk ngakim'ik aku nurut Ukum Taurat, tapi melangger ukum nyin ngan nyuruh supayo aku ditampar?" ⁴ Urank-urank yo bediri somak'a bekato, " Opeikah ikau ngina Imam Besar Allah?" ⁵ Lalu, Paulus bekato, " Aku com tau, saudero-saudero, bahwo io tuk Imam Besar. Dongah, tatulis, ' Nang'ak ikau bekato jahat tentang seurank pemimpin bangso kau.' " ⁶ Tapi'a, tengkalo Paulus tau bahwo seb'gian te urank-urank Saduki kan yo lain'a urank-urank Farisi, Paulus besoru di d'lom Sanhedrin, " Saudero-saudero, aku tuk urank Farisi, anak urank Farisi. Aku tongah di adel'ik dongah pengaropan akan kebengkitan urank mati!" ⁷ Tengkalo Paulus ngatokan hal nyin, timbul peselisihan di antaro urank-urank Farisi kan urank-urank Saduki, kan kumpolan urank-urank nyin tebegi-begi. ⁸ Dongah, urank-urank Saduki becakap bahwo com mado kebengkitan, com ado malekat, kan com mado gam roh, tapi urank-urank Farisi ngakuik nyin semuo. ⁹ Mako, tejedi'am keributan yo b'sar kan beberopei ahli Taurat d'rik kelompok Farisi bediri kan ngebantah ngan koras, " Kami com nomukan sesuatu yo salah ngan urank tuk. Kotimo mun roh atau malekat dah bekato ka io?" ¹⁰ Lalu, tengkalo peselisihan makin besar, kepalok pasukan golak Paulus akan dicabik-cabik tam urank b'nyak nyin, lalu merentahkan prajurit-prajurit ntuk turun kan ngamik Paulus d'rik tongah-tongah sidok ngan pakso, sereto mbeik'a ke markas. ¹¹ Pado malom berikut'a, Doto bediri di sabolah Paulus kan becakap, " Kuatkan ati kau dongah ikau dah besaksi ngan sunguh-sunguh tentank Aku di Yerusalem, ngan piok ikau arus gam besaksi di Roma." ¹² Tengkalo ari siang, urank-urank Yahudi ngadokan pesekongkolan kan ngobet dirik sidok surang ngan sumpah ntuk com makan atau minum pei pun sampei sidok munuh Paulus. ¹³ Ado lobih d'rik empat puluh urank yo ngulah pesekongkolan tuk. ¹⁴ sidok d'tank ke imam-imam kepalok kan tuo-tuo, lalu bekato "Kami dah ngobet dirik kami ngan sumpah ntuk com ngocap pei pun sampe kami munuh Paulus. ¹⁵ Saat tuk, dongah dah piok, ikau, besamo ngan Sanhedrin, boriktaukan kepado kepalok pasukan ntuk mbeik'a turun ka ikau, seolah-olah ikau akan mutuskan pekaro'a ngan lobih teliti gim kan kami siap ntuk munuh'a sebelum io somak ke tompat tuk." ¹⁶ Tapi'a, anak lelaki d'rik saudero tinok Paulus ningo tentank penyergapan nyin, lalu io pogi kan mansuk ka markas, sereto moriktau Paulus. ¹⁷ Paulus nyakau salah seurank perwiro kan becakap, " Beik'ak anak mudok tuk kepado kepalok pasukan dongah io ado sesuatu ntuk dilaporkan ka io." ¹⁸ Mako, perwiro nyin mbeik'a ka kepalok pasukan kan bekato, '' Paulus, tahanan nyin, nyakau aku kan mintok aku ntuk mbeik anak mudok tuk ka ikau dongah io ado sesuatu ntuk dipadahkan ka ikau." ¹⁹ Kepalok pasukan mijab jeri anak mudo nyin, narik'a kesamping, kan mulai nanyok anak mudok nyin secaro pribadi, " Opei yo arus kau laporkan ka aku?" ²⁰ Lalu, io nyawb, '' Urank-urank Yahudi dah sepakat mintok kau ntuk mbeik Paulus turun ke Sanhedrin kolam, seolah-olah sidok akan nanyokkan sesuatu yo lobih teliti tentang io. ²¹ J'di, nang ningokan sidok dongah ado lobih d'rik empat puluh urank d'rik sidok tongah ngadang Paulus, yo besumpah ntuk com makan atau minum sampe sidok munuh Paulus. Kan saat tuk, sidok dah siap kan gik nunggu persetujuan kau.'' ²² Mako, kepalok pasukkan nyuruh anak mudok nyin pogi, sambel baposant ke io, " Nang boriktau sopei pun kalau ikau dah moriktau tentank hal-hal tuk." ²³ Lalu, kepalok pasukan nyin nyakau duok urank perwiro kan becakap," Siap'ak duok ratus tentaro, ngan tujuh puluh penait kuda kan duok ratus prajurit besenjato, ntuk berengkat ke Kaisarea, pado jam tigo malom tuk " ²⁴ Sediokan gam tunggangan ntuk Paulus kan beik'ak io ngan aman kepado Feliks, gubernur nyin." ²⁵ Lalu, io nulis sebuah suret, yo tokuh tuk: ²⁶ D'rik Klaudius Lisias. Kepado Gubernur Feliks yo mulio. Salom, ²⁷ Urank tuk di tangkop tam urank-urank Yahudi kan hampir di munuh tam sidok tengkalo aku d'tang besamo ngan prajurit-prajurit kan nyelamatkan'a, udah ngetau'ik bahwa io nyin urank wargo negaro Roma. ²⁸ Dongah aku ndak tau pei alasan sidok nuduh'a, aku mbeik'a turun ka Sanhedrin sidok ²⁹ Aku nomukan bahwo io dituduh atas pesoalan-pesoalan tentank Ukum Taurat sidok, tapi com mado alasan pei pun yo pantas ntuk ukum mati atau penjero. ³⁰ Tengkalo diboriktukan ka aku bahwo ado sebuah pesekongkolan ntuk ngelawan urank tuk, aku langsung merentahkan b'lo penuduh'a ntuk nyatokan tuntutan sidok ka io di adop ikau. ³¹ Mako, b'lo prajurit, sesuai ngan prentah ntuk sidok, ngamik Paulus kan mbeik'a pado malom ke Antipatris. ³² Pado ari berikut'a, sidok ngeronakkan b'lo penait kuda nyin pogi besamo'a, lalu sidok bebelik ke markas. ³³ Tengkalo sidok dah sampe di Kaisarea kan nyampikan surat nyin kepado Gubernur, sidok ngadopkan Paulus ke ka io gam. ³⁴ Udaah gubernur maco surat nyin, io nanyokkan d'rik monei Paulus berasal. Kan, tengkalo io tau bahwo Paulu berasel d'rik Kilikia, ³⁵ io bekato, " Aku akan ningokan ikau seudah b'lo penuduh kau d'tang." Lalu, io merentahkan supayo ngawal Paulus di d'lom markas besar Herodes.