¹ Suatu saat, tengkalo Paulus kan Silas dah ngelaluik Amfipolis kan Apolonia, sidok sampai di Tesalonika, di mone ado sebuah sinagoge urank Yahudi. ² Lalu, sesuai kan kebiasoan Paulus, io mansuk ke antaro sidok, kan selambet tigo ari Sabat bicaro ngan sidok d'rik Kitab Suci, ³ Sambel nyelaskan kan muktikan bahwo Kristus arus enderito kan b'ngkit d'rik antaro urang mati, ngan bekato, '' Yesus tuk, yo tongah aku beritokan ka kau nyin te Kristus." ⁴ Lalu, seb'gian urank d'rik sidok di yakinkan kan begebung kan Paulus kan Silas, besamo ngan sejumloh bosar urank Yunani yo golak akan Allah kan com sikit pei tinok-tinok tehormat. ⁵ Tapi, urank-urank Yahudi nyedi iri ati kan ngajak beberopei urank jahat yo bekeluyuran di tompat umum, sidok ngumpulkan b'nyak urank kan ngulah kekacauan di kota, lalu nyerbu umah Yason sambel ngogok Paulus sereto Silas ntuk mbeik sidok keluar kepado urank b'nyak. ⁶ Tengkalo sidok com nomukan Paulus kan Silas, sidok nyeret Yason kan beropei saudaro seiman ke adop pbelo pejebat kota, kan beseru, '' Urank-urank tum, yo dah ngacaukan dunio, dah d'tang gam kituk. ⁷ Kan, Yason nyambut sidok, kan sidok semuo betindak yo ngelawan hukum Kaisar ngan ngatokan ado rajo lain, yonyin Yesus." ⁸ urank b'nyak kan belo pej'bat kota nyedi resah tengkalo ningo nyin . ⁹ Kan, udah sidok nerimok jaminan d'rik Yason kan yo lain'a, urank-urank nyin mbebaskan'a. ¹⁰ Saudero-saudero seiman langsung nyuruh Paulus kan Silas, malom nyin gam, ke Berea, kan tengkalo sidok sampei, sidok pogi ke sinagoge urank Yahudi. ¹¹ Urank-urank Yahudi diok lobih b'et ati'a d'rikpado urank-urank yo di Tesalonika dongah sidok nerimok firman ngan ponuh semangat, sambel nyelidik'ik Kitab Suci milank ari ntuk ngetahuik hal-hal nyin memang benar. ¹² Tam dongah nyin, b'nyak d'rik sidok nyedi pecayok, temansuk am tinok kan lalaki Yunani tehormat yo jumlah'a b'nyak. ¹³ Tapi'a, tengkalo urank-urank Yahudi di Tesalonika tau bahwo firman Doto di beritokam tam Paulus di Berea, sidok pun d'tang ke Berea, ntuk ngoyahkan kan ngulah resah b'nyak urank. ¹⁴ Lalu, ngan segero, saudero-saudero seiman nyuruh Paulus pogi sampei ke pantai, tapi Silas kan Timotius tetap tinggel diok am. ¹⁵ Urank-urank yo nambahik Paulus mbeik'a sampei ke Atena, kan dah nerimok sebuah pesan d'rik Paulus ntuk Silas kan Timotius supayo d'tang ka io secopat'a, sidok pun brengkat. ¹⁶ Sementaro Paulus nunggu sidok di Atena, roh'a ngeraso diuyuhkan di d'lom dirik'a dongah io nongan kota nyin ponuh tam patung-patung berhala. ¹⁷ dongah tokuh nyin, io betukar paham di sinagoge ngan urank-urank Yahudi kan urank-urank d'rik bangso lain yo golak akan Allah, sereto di tompat umum, milang ari, ngan urank-urank yo kebetulan ado diok. ¹⁸ Beberopei ahli pikir d'rik kelompok Epikuros kan Stoa becakap-cakap ngan io. Kan, beberope bekato, "Ope yo nak di padah si pemual tuk?" Yo lain bekato, " Tokuh'a io tuk pemberito dewa-dewa asing," dongah io mberitokan Yesus kan kebengkitan. ¹⁹ Lalu, sidok ngajak'a kan mbe'ik'a ke Areopagus, sambel bekato, " D'pat dok kami tuk tau ajeran baru pei yo kau beritokan tuk? ²⁰ Dongah ikau tuk tongah mbe'ik beberopei hal yo ngerankan di telingo kami. Kami endak tau pei maksud hal-hal nyin." ²¹ [Saat nyin, semuo urank Atena kan urank-urank asing yo diom diok tebiaso ngabiskan waktu'a ngan com ado gewei'a pei selain bengato kan ningokan jolu yo b'ru.] ²² Mako, Paulus badiri di tongah-tongah Areopagus kan bekato , " Hei urank-urank Atena, peretiku d'lom segelo jolu ikau tuk memang religus. ²³ Dongah, tengkalo aku tongah bekeliling kan meretikkan belo jolu-jolu yo kau sombah, aku pun ado jumpo'ik gam altar ngan tulisan tuk,' KEPADO ALLAH YO COM DI KENAL.' Dongah nyin, pei yo kau sombah ngan com ngonal'a, nyin am yo aku beritokan kepado kau. ²⁴ Allah yo nciptakan dunio kan segelo jolu yo ado di d'lom'a, dongah yam Sien te Doto atas langit kan bumi, com tinggel di kuil-kuil yo di pulah jeri ensio pei, ²⁵ com gam io di leyen'ik ngan jeri-jeri ensio, seakan-akan Sien mutuhkan sesuatu dongah Sien yo morik kepado sopei jak kehidupan, kan napas, kan segelo jolu'a. ²⁶ Kan, io nyiptokan, d'rik sutik urank, semuo bangso umat ensio ntuk diom di seluruh muko bumi tuk, dah netapkan b'tas-b'tas tompat idup sidok, ²⁷ supayo sidok ngogok Allah, kan mun memang mungkin sidok d'pat nyentuh-A kan nomukan-A meskipn Sien com jauh d'rik kito mansing-mansing ²⁸ Dongah, di d'lom Sien, kito idup, begerak, kan ado. Ayub 12:10. Tokuh pujangga-pujangga kau surank yo bekato, 'Dongah kito tuk yak gam keturun-A.' ²⁹ J'di, dongah kito te keturunan Allah, kito seharus'a com bepikir bahwo keadakan Ilahi nyin tokuh mas, atau perak, atau b'tu, sebuah wujud yo dipulah d'rik keterampilan kan pemikiran ensio. ³⁰ Tam dongah nyin, udah ngabaikan maso-maso kebodoan, saat tuk Allah moriktaukan semuo urank di mone-mone supayo betobet, ³¹ dongah Sien dah nontukan suatu ari saat Sien akan ngakimik dunio d'lom keadilan ngelaluik satu Urank yo dah di tontukan-A, dah Sien morik bukti kepado semuo urank ngan mbengkitkan Urank nyin d'rik antaro urank mati." ³² Kan, tengkalo sidok ningo tentang kebengkitan d'rik antaro urank mati, beberopei urank mulai ngejek, tapi yo lain bekato," Kami nak ningokan kau gim tentang hal tuk." ³³ Mako, Paulus pogi d'rik tongah-tongah sidok. ³⁴ Tapi'a, beberopei urank begebung kan io kan nyedi pecayok, di antaro'a ado gam Dionisius, anggota Areopagus, kan seurank tinok bedemo Damaris, sereto ado gam urank lain yo besamo sidok.