¹ Kade'k ayanyian,ahe ge'k nang mao'k diri'k kataatn? muih ge'k diri'k batekun daapm dosa,biar samangkin batambah kasih karunia koa? ² Sakai-kai ina'k! Buke'k ge'k diri'k udah mati untuk dosa,ayame bisa diri'k masih idup kadaapme? ³ Ato ina'k nauan ge'k kao,bahwa diri'k samua nang udah dibaptis daapm Kristus,udah dimaptis daap kamatiatn-E? ⁴ Ba ayanyian diri'k dah dinguburatn barage ba Ia ba baptisan kamatiatn,biar , sama aya Kristus dah dimangkitatn dari antara urakng mati di kamuliaatn Apa'k,yakoa uga'k diri'k idup daapm idup nang barahu. ⁵ Jukut kade'k diri'k dah jaji sete'k ba ahe nang sama bakamuliaatn-E, diri'k pun jaji sote'k ba nang sama ba kabangkitatn-E. ⁶ Karna diri'k nauan,bahwa manusia lama diri'k dah dinyalitatn,biar tubuh dosa diri'k ilang kuasae, ⁷ biar ame diri'k ngambaatn diri'k agi'k ka dosa. Karna sae nang dah mati,ia dah bebas dari dosa. ⁸ Jaji kade'k diri'k dah mati ka Kristus,diri'k picaya'k kade'k diri'k pasti idup uga'k ba Ia. ⁹ Karna diri'k nauan,kade'k Kristus,sa aka'k Ia bangkit dari antara urakng mati,ina'k mati agi'k: maut ina'k bakuasa agi'k ka Ia. ¹⁰ Soale kamatiatn-Ne koa kamatiatn untuk dosa,sakai ba untuk salama-lamae,ba kaidupatn-Ne nang uga'k kaidupatn untuk Allah. ¹¹ Ayakoaihan lah haruse kao neeatnia:kade'k kao dah mati untuk dosa,tapi kao idup untuk Allah daapm Kristus Yesus. ¹² Karna koa haruse dosa ame bakuasa agi'k kadaap tubuh nyu nang fana,biar kao ame agi'k nuruti'k ka inginane. ¹³ Ba amelah nyarahatn anggota-anggota tubuhnyu ka dosa untuk dipake sabagai sanjata kajahatatn,tapi sarahatnlah diri'knyu ka Allah sabagai urakng-urakng,nang dah doho'k mati,tapi nang angkitn idup.ba sarahatnlah anggota-anggota tubuhnyu ka Allah untuk jaji sanjata kabanaratn. ¹⁴ Karna kao ina'k agi'k dikuasai'k didosa,soale kao ina'k barada kababah ukum Taurat,tapi kababah kasih karunia. ¹⁵ Jaji yamae? Masih ge'k ina'k diri'k babuat dosa,karna diri'k ina'k barada kababah ukum Taurat,tapi kababah kasih karunia? sakai-sakai ina'k! ¹⁶ Ahe ge'k kao ina'k nauan,kade'k kao nyarahatn diri'knyu urakng sabagai amba untuk naati'k ia,kao adalah amba urakng koa,nang arus kao taati'k,mao'k kadaapm dosa nang mimpin kao kakamatiatn,mao'kpun daapm kataatn nang mimpin kao kakabanaratn? ¹⁷ Tapi basyukurlah ka Allah!Dee memang kao amba dosa,tapi angkitn kao ba saganap ati udah naati'k pangajaratn nang udah dinarusatn kakao. ¹⁸ Kao udah dimerdekaatn dari dosa ba jaji amba kabanaratn. ¹⁹ Aku ngataatn hal nyian cara manusia karna kalamahan nyu.karna sama saparati kao dah nyarahatn anggota-anggota tubuhnyu jaji amba kecemaran ba amba kadurhakaatn nang ngicakng kao kadurhakaatn,yakoa lah halnyu angkitn arus nyarahatn anggota-anggota tubuhnyu jaji amba kabanaratn nang ngicakng kao ka pangudusatn. ²⁰ karna waktu kao amba dosa,kao bebas dari kabanaratn. ²¹ Ba buah ahe lah nang kao metik darie?samuae koa minjawat kao rasa supe'k angkitn,karna saaka'k samuae koa adalah kamatiatn. ²² Tapi angkitn,saaka'k dimerdekaatn dari dosa ba saaka'k kao jaji amba Allah,kao namu asil nang ngicakng kao kapangudusatn ba sabagai kaudahatne adalah idup nang kekal. ²³ Karna upah dosa koa adalah maut; tapi karunia Allah adalah idup nang kekal daapm Kristus Yesus,Jubata diri'k.