¹ Lalu aku batanya'k: Ada ge'k Allah mungkin udah nolak umat-Te? sakai-kai ina'k! Karna aku sandiri'kpun urakng Israel,dari katurunan Abraham,dari suku Benyamin. ² Allah ina'k nolak umat-Te nang Ia milih.Ato kao ina'k nauan,ge'k ahe nang dingataatn kitab suci tentang Elia,waktu ia ngaduatn Israel ka Allah: ³ "Jubata,nabi-nabi-Nyu dah mereka munuh,mezbah-mezbah-Nyu udah mereka ngaruntuhatn; kahe aku babarolah nang masih idup ba mereka mao'k naap nyawaku." ⁴ Tapi ayamae firman Allah ka iya?" Aku masih ningaatn tujuh ribu urakng untuk-Ku, nang ina'k suah sujud nyambah Baal." ⁵ Yakoa uga'k pas saat nyian ada kahe sisa'k,menurut pilihan kasih karunia. ⁶ Tapi kade'k hal koa tajadi karna kasih karunia,jaji buke'k agi'k karna pabuatatn, sabab kade'k ina'k ayakoa,jaji kasih karunia koa buke'k agi'k kasih karunia. ⁷ Jaji ayamae? Israel ina'k namu ahe ia ngago'k,tapi urakng-urakng nang tapilih udah namuan iya. Ba urakng-urakng nang lain dah kuat atie, ⁸ Tolen ada tatulis:" Allah minjawat mereka tidur nyenyak,mareatn mata ina'k bisa nee'k ba tarenyekng untuk ina'k nangar,sampe ka ari angkitn nyian." ⁹ Daud bakata:"Biaratn jamuan mereka jaji jerat ba parangkap,panyasatatn ba pambalasan untuk mereka. ¹⁰ Ba biarlah mata mereka jaji galap,sampe mereka ina'k nee'k,ba minjawat punggung mereka tarus manarus bongkok." ¹¹ Lalu aku batanya'k: Ada ge'k mereka tarantuk lalu jantu? sakai-sakai ina'k! Tapi karna palanggaran mereka,kasalamatatn udah sampe ka bangsa-bangsa lain,biar mereka cemburu. ¹² Sabab kade'k palanggaran mereka baari kakayaatn untuk dunia,ba kakurangan mereka kakayaatn untuk bangsa-bangsa lain,ahe agi'k kasampurnaatn mereka. ¹³ Aku bakata ka kao,hai bangsa-bangsa buke'k Yahudi.Justru karna aku nyian rasul untuk bangsa-bangsa buke'k Yahudi,aku nganggap hal koa kamuliaatn palayananku, ¹⁴ Yakoa kade'k aku bisa mangkitatn cemburu kadaap ati kalompok sabangsaku menurut idup ba bisa nyalamatatn sabagian dari mereka. ¹⁵ Karna kade'k mereka nolak baarti padamaiyatn untuk dunia,bisa ge'k panarimaan mereka ada arti lain dari pada idup ka antara urakng mati? ¹⁶ Kade'k adonan roti pertama baik,baarti samua adonan roti baik,ba kade'k akar koa baik,jaji cabang-cabang nge pun baik. ¹⁷ Karna koa kade'k ada sabagian cabang dah dipatahatn ba kao jaji tunas liar udah dinyangkokatn ka antarae ba ikut namu bagiatn daapm akar batakng zaitun nang siang gatah, ¹⁸ Amelah kao bamegah karna cabang-cabang koa! Kade'k kao bamegah,ingatlah,kade'k buke'k kao nang nopang akar koa,tapi akar koalah nang nopang kao. ¹⁹ Mungkin kao pasti bakata: ada cabang-cabang nang dimatahatn,biar aku dicangkokatn ka antarae jaji tunas. ²⁰ Baiklah! Mereka dipatahatn karna ina'k picaya'k , ba kao tagap tercacak karna iman. Amelah kao sombong, tapi gai'klah! ²¹ Karna kade'k Allah ina'k sayakng ka cabang-cabang asli,Ia ina'k uga'k sayakng ka kao. ²² Karna koa paratiatnlah kabaikatn Allah ba kakarasatn-Ne uga'k,yakoa kakarasatn untuk urakng-urakng nang udah jantu'k,tapi untuk kao kabaikatn-Ne,yakoa kade'k kao tatap daapm kabaikatn-Ne;kade'k ina'k,kao punpasti ditatak uga'k. ²³ Tapi merekapun pasti dicangkokatn agi'k,kade'k mereka ina'k tatap daapm ka ina'k picayaatn mereka,Sabab Allah bakuasa untuk nyangkokatn mereka agi'k. ²⁴ Sabab kade'k kao udah ditatak jaji cabang dari batakng zaitun liar,ba lawanan ba keadaan nyu baarti kao udah dinyangkokatn ka batakng zaitun sejati,ahe agi'k mereka nyian,nang menurut asal mereka mao'k dicangkokatn ka batakng zaitun mereka sandiri'k. ²⁵ Sabab,kamaru'k-kamaru'k,biar kao nganggap diri'knyu pane,aku mao'k biar kao nahui'k rahasia nyian: Sabagian dari Israel udah jaji kuat sampe jumlah barinsi'k dari bangsa-bangsa lain udah masok. ²⁶ Ba ayanyian samua Israel akan disalamatatn,tolen ada tatulis:" Dari Sion akan atakng Penebus,Ia mao'k nyingkiratn sagala kafasikatn dari Yakub. ²⁷ Ba nyianlah pajanjiatn-Ku ba mereka, kade'k Aku ngapus pane ngapus dosa mereka." ²⁸ Mengenai'k Injil mereka koa seteru Allah karna kao,tapi mengenai'k pilihatn mereka koa kekasih Allah karna ene'k moyang. ²⁹ Sabab Allah ina'k nyasali'k kasih karunia ba panggilan-Ne. ³⁰ Sabab sama aya kao dee ina'k taat ka Allah,tapi angkitn namu kamurahatn karna ka ina'ktaatatn mereka, ³¹ ayakoa uga'k mereka angkitn ina'k taat ka Allah,biar karna kamurahatn nang udah kao namu,mereka pun namu uga'k kamurahatn. ³² Sabab Allah udah ngurukng samua urakng daapm ka ina'ktaatatn,biar Ia bisa nee'katn kamurahatn-Ne untuk mereka samua. ³³ O,alangkah daapme kakayaatn,hikmat ba pangatahuan Allah! Sungguh ina'k tasalidiki'k kaputusatn-kaputusatn-Ne ba sungguh ina'k tasaapmi'k maraga-maraga-E! ³⁴ Sabab saelah nang nauan pikiran Jubata? ato saelah nang pernah jaji panasehat-Te? ³⁵ Ato saelah nang pernah marekatn jukut ka Ia,lalu Ia harus ngantiya? ³⁶ Karna sagala ahepun barasal Ia,ba karna Ia,ba ka Ia: untuk Ialah kamuliaatn sampe salama-lamae!