¹ Apas dari koa aku nee'k seko' malaekat lain turutn dari saruga. Ia ada ba kakuasaan aya'k ba dunia jaji tarakng di kamuliaanne. ² Tarus ia bakata ba suara nang kuat, jare: "Udah roro'k, udah roro'k Babel, kota'k aya'k koa, ba ia udah jaji tampat kadiaman roh-roh jahat ba tampat batapor samua roh najis ba tampat batapor sagala burukng nang najis ba nang ina disukai, ³ barang samua bangsa udah nyocok dari anggur hawa napsu pacabulatnne ba raja-raja ka bumi udah babuat cabul ba ia, ba nang badagakng-badagakng ka bumi udah jaji kaya di kalimpahatn hawa napsu e." ⁴ Tarus aku nangar suara lain dari saruga bakata: "Darilah kao, oi umat-Ku, darilah dari ia biar kao ame naap bagian daapm dosa-dosa e, ba biar kao ame ugak di timpa'k di bencana-bencanae. ⁵ Barang dosa-dosa e udah batimbun-timbun sampe kaangit , ba Jubata udah taringat ka sagala ka kajahatatnne. ⁶ Baasatnlah ka ia, sama aya tolen ia uga'k maasatn, ba bareatnlah ka ia dua kai lipat ka daapm cawan pacampuratnne; ⁷ bareatnlah ka ia siksaan ba kasedihan, samanyak kamuliaan ba kamewahan, nang udah ia nyacapi'k. Barang ia bakata ka daapm ati e: Aku batahta sarupa ratu, aku buke'k janda, ba aku ina akan suah ba sedih. ⁸ Barang koa samua bencana akan atakng daapm sa ari, yakoa panyakit sampar ba kamatiatn ba kaparatn; ba ia akan ditunu ba api, barang Tuhan Jubata, nang ngahakimi'k ia, kuat." ⁹ Ba raja-raja ka dunia, nang udah babuat cabul ba idup daapm kalimpahatn ba ia, ana akan nangisi'k ba maratapi'k ia, kade'k kabatnne nee'k asap api nang nunu ia. ¹⁰ Kabatnne ana badiri jauh-jauh barang gai'k ka siksaanne ba kabatnne ana bakata; ''Cilaka, cilaka kao, o kota' nang aya'k, Babel, o kota' nang kuat, barang daapm sajam udah balangsung pangakimannyu!' ¹¹ Ba padagakng-padagakng ka bumi sedih batangisatn dihe, barang ina'k ada agik nang mali barang-barangnge, ¹² yakoa barang-barang dagangan dari amas ba perak, permata ba mutiara, dari lenan alus kaikng ungu, dari sutra ba kaikng kirmiji, bamacam jenis barang dari kayu nang harum bau e, bamacam jenis barang dari kayu nang maha, dari timaga, basi ba pualam, ¹³ kuit manse ba rampah-rampah, wangi-wangian, mur ba kamayan, anggur, binyak, tapukng alus ba gandum, lembu sapi, domba, kuda ba kereta, budak ba bahkan nyawa manusia. ¹⁴ Ba kabatnne ana bakata: "Udah ilang buah-buahan nang dimaoan atinyu, sagala nang mewah ba gagas udah ilang dari kao, ba ina'k akan ditamuan agik." ¹⁵ Kabatnne nang madagangan barang-barang koa, nang udah jaji kaya dihe, ana badiri jauh-jauh barang gai'k ka siksaanne, sambi batangisatn, ¹⁶ kabatnne bakata; "Cilaka, cilaka kota' aya'k, nang bapakean lenan alus, ba kaikng ungu ba kaikng kirmiji, ba nang dingiasi'k ba amas, ba permata ba mutiara, barang daapm sajam maan kakayaatn samanyak koa udah binasa." ¹⁷ Ba samua nahkoda ba palayar ba anak-anak kapal ba samua urakng nang mata pancaarian ka laot, badiri jauh-jauh, ¹⁸ tarus ngampak, sawaktu kabatnne nee'k asap api nang nunu ia, jare: "Kota' mae gek nang sabaya ba kota' aya'k nyian?" ¹⁹ Tarus kabatnne ngamburatn dabu ka atas kapalae lalu ngampak, sambi nangis ba maratap, jare: "Cilaka, cilaka kota' aya'k, nang dihe samua urakng, nang ada ba kapal ka laot, udah jaji kaya dibarangnge nang maha, barang daapm sajam maan ia udah binasa. ²⁰ Basukacitalah atas ia, hei saruga, ba kao, hei urakng-urakng kudus, rasul-rasul ba nabi-nabi, barang Jubata udah nyantuatn ukuman ka ia. ²¹ Seko' malaekat nang kuat ngangkat sabuah batu aya'k batu kilangan, lalu nabakatn ka daapm laot, jakatae: "Ayakoalah Babel, kota' aya'k koa, ana akan ditabakatn kuat ka babah, ia ina'k akan ditamuan agik. ²² Ba suara pamain-pamain kacapi ba panyanyi-panyanyie, ba panyiup-panyiup soleng ba sangkakala, ina'k akan kadangaratn agik ka daapm nyu, ba seko' nang ahli daapm hal kesenian ina'k akan ditamuan agik ka daapmnyu, ba suara kilangan ina'k akan kadangaratn agik ka daapmnyu. ²³ Ba cahaya lampu ina'k akan basinar agik ka daapmnyu, ba suara panganten laki ba panganten bini ina'k akan kadangaratn agik ka daapmnyu. Barang padagakng-padagakngnyu urakng pembesar-pembesar ka dunia, di ilmu sihir nyu samua bangsa di nyasatatn." ²⁴ Ba ka daapme ada badarah nabi-nabi ba urakng-urakng kudus ba darah samua urakng, nang dimunuh ka dunia.