¹ Lalu ataknglah seko' dari tujuh malaekat, nang ngicakng tujuh cawan koa tarus bakata ka aku; "Ataknglah dian, aku mao'k neeatn ka kao ukuman untu' palacur aya'k, nang duduk ka tampat nang manyak ai'k e. ² Raja-raja ka bumi udah ba buat cabul ba ia, nang niapmi'k bumi udah kamabuk di anggur pacabulatnne." ³ Daapm roh aku di ngicakng ka padang gurun. Tarus ku nee'k seko' nang bini duduk ka atas seko' laok nang merah kurebakng, nang barinsi'k tulisan dama-dama hujatan. Laok koa bakapala tujuh ba tanuk sapuluh. ⁴ Nang bini koa make kaikng ungu ba kainkg kirmiji nang dingiasi'k ba amas, permata ba mutiara, ba ka kokotte ada sote' cawan amas bainsi'k sagala kekejian ba kenajisan pacabulatnne. ⁵ Ba ka kaningnge tatulis sote' dama, dama rahasia: "Babel aya'k, uwe'k dari nang bini-bini palacur ba dari kekejian bumi. ⁶ Aku nee'k nang bini koa kamabuk di darah urakng-urakng kudus ba darah saksi-saksi Yesus. Sawaktu ku nee'k koa, aku kaheranan sidi. ⁷ Tarus kata malaekat koa ka aku; "Ngahe kao heran? Aku mao'k ngataatn ka kao rahasia nang bini koa ba rahasia laok nang mikut ia, binatang nang bakapala tujuh ba tanuk sapuluh koa. ⁸ Adapun binatang nang kao nee'k koa, udah ada, tapi ina'k ada, ia akan muo'k dari jurang maut, ba notok ka kamatiatn. Dangan nang diapm ka bumi, nang ina'k tatulis ka daapm kitap kahidupan dari mulai'k dunia diminjawat, akan heran, kade'k kabatnne nee'k, kade'k binatang koa udah ada, tapi ina'k ada, tarus akan muok agik. ⁹ Nang penting dian akal nang ba hikmat: batujuh kapala koa tujuh bukit, nang ka atasse nang bini koa duduk, ¹⁰ batujuh he koa ugak tujuh raja: lima ka antara e koa udah jantu'k, nang seko'k udah ada, ba nang seko'k agik nape'k atakng, ba kade'k ia atakng, ia akan diapm sabantar kahe ¹¹ Laok nang suah ada ba nang angkitn ina'k ada koa, ia koa raja nang kalapan tapi ia koa seko'k dari ba tujuh koa, ia ana pun mati. ¹² Ba sapuluh tanuk nang udah kao nee'k koa sapuluh raja, nang nape'k mulai'k mamarentah, tapi sajam lamae ana akan narima'k kuasa jaji raja, sama-sama ba binatang koa. ¹³ Kabatnne koa saia sakata, kakuatan ba kakuasaan kabatnne, kabatnne mareatn ka binatang koa. ¹⁴ Kabatnne koa ana akan baparang ngalawan Anak Domba. Tapi Anak Domba ana akan ngalahatn kabatnne koa, barang Ia koa Tuan ka atas samua tuan ba Raja ka atas samua raja. Kabatnne sama-sama ba Ia koa pun akan manang, yakoa kabatnne nang tapanggil, nang udah dimilih ba nang setia ¹⁵ Lalu ia bakata ka aku: "Samua ai'k nang udah kao nee'k, dimae nang bini palacur koa duduk, iyakoa bangsa-bangsa ba rakyat nang manyak, suku ba bahasa. ¹⁶ Ba sapuluh tanuk nang udah kao nee'k koa ba laok koa ana akan negetatn palacur koa ba kabatnne ana akan minjawat ia jaji sunyi'k ba badoga, ba kabatnne ana makatn dagenne ba nunu ia ba api. ¹⁷ Barang Jubata udah narakngi'k ati kabatnne untu' minjawat kahendak-Ke ba saia sakata ba untu' mareatn pamarintahan kabatnne ka binatang koa, sampe samua pakataatn Jubata udah talaksana. ¹⁸ Nang bini nang kao nee'k koa, yakoa kota' aya'k nang mamarentah ka atas raja-raja ka dunia.