¹ Ba aku nee'k tanda lain ka angit, aya'k ba ajaip; tujuh malaekat ba tujuh bencana terakir, barang ba tanda koa baahirlah ugak Jubata bera. ² Lalu aku nee'k jukut aya tolen lautan kaca bacampur api, ba ka sisi lautan kaca koa badiri urakng-urakng nang udah ngalahatn binatang koa ba patungnge ba bilangan damae. ³ Ba kabatnne koa ngalaguatn lagu Musa, amba Jubata, ba ngalaguatn Anak Domba, bunyi e: "Aya'k ba ajaip sagala pakarajaatn-Nyu, o Tuhan, Jubata, Nang Mahakuasa! Adil ba banar samua maraga-Nyu o Raja samua bangsa.! ⁴ Sae gek nang ina gaik, o Tuhan, ba nang ina'k muliakan dama-Nyu? barang kahe Kao nang kudus; samua akan atakng basujut nyambah Kao, barang udah nyata kabanaratn sagala pangakiman-Nyu. ⁵ Tarus dari koa aku nee'k urakng muka'k Bait Suci - kemah kasaksian - ka saruga. ⁶ Batujuh malaekat ba batujuh bencana koa, ka uar dari Bait Suci, bapakean lenan nang putih baraseh bakilau-kilauan dadae balilit ikat pinggang dari amas. ⁷ Ba dari kaampat mahluk koa mareatn ka batujuh malaekat koa tujuh cawan dari amas nang barinsi'k bera Jubata, yakoa Jubata nang idup sampe salama-lamae. ⁸ Ba daapm bait Suci koa dibarinsi'k asap karna kamuliaatn Jubata ba barang kuasa-E, seko'k urakng pun ina'k bisa taama'k ka Bait Suci koa, sanape'k ba akhir tujuh bencana dari batujuh malaekat koa