¹ Pilatus naap Yesus lalu di parentahatn biar Yesus di sesah. ² Para parajurit ngayam mahkota dari ranteng -ranteng nang baduri lalu dimakeatn ka Ia, di makeatn ka Ia uga' Jubah ba warna ungu. ³ Kabatne maju nyamaki' Yesus lalu bakata ka Ia," Salam, hai Raja urakng Yahudi!" lalu kabatne nampar muhaE. ⁴ Pilatus muok agi' lalu bakata ka kabatne," Tee'lah! Aku mao' ngicakng Yesus ka luar ka kita' biar kita' nahui' kade' aku ina' namui' kasalahan ahepun ka Ia." ⁵ Lalu Yesus kauwas make' mahkota duri ba jubah ungu. Pilatus bakata ka kabatne," Tee'lah Ia!" ⁶ Waktu imam - imaam kapala ba para perwiranee' Yesus, kabatne ngampak," Salipatn Ia, salipatn Ia!" Tapi, Pilatus bakata ka kabatne," Icakng Ia lalu salipatn sandiri' soale aku ina' namui' kasalahan ahepun ka Ia. ⁷ Urakng - urakng Yahudi koa nyawab Pilatus, " Kami adas ba ukum, lalu manurut ukum koa, Ia arus mati soale Ia nganggap diriE adalah Anak Jubata." ⁸ Waktu Pilatus nangar pakataatn koa, ia samakin gai'.nlalu taama' ka gadung pangadilan, ⁹ lalu batanya," Darimae asal Nyu ?" tapi Yesus ina' nyawab. ¹⁰ Pilatus bakata ka Ia," Kao bai' bakata ba Aku? Ina' me Kao nahui' kade' aku nyian miliki' kuasa untuk mebasatn Kao bamiliki' kuasa nyalipatn Kao?" ¹¹ Yesus nyawab," Kao ina' miliki' kuasa ahepun atas diri'Ku, kacoali kuasa koa dibareatn ka kao dari atas. Koalah sabape, urakng nang nyarahatn ka kao labih aya' dosae." ¹² Aka' nangar hal koa, Pilatus barusaha untuk mebasatn Yesus, urakng - urakng Yahudi ngampak," Kade' kao mebasatn urakng nyian, kao buke'lah sahabat Kaisar; satiap urakng nang nganggap dirie raja baarti malawan Kaisar." ¹³ Waktu Pilatus nangar kata - kata koa, ia ngicakng Yesus ka uwas, lalu duduk ka kursi pangadilan, ka sabuah tampat Litostrotos, tapi daapm bahasa Ibrani di sabut Gabata. ¹⁴ Ari koa adalah ari persiapan untuk Paskah, waktu sakitar jam ka anam. Pilatus bakata ka urakng - urakng Yahudi," Nyianlah Rajanyu! ¹⁵ Maka, kabatne ngampak," Enyahatn - enyahatn Ia! Salipatn Ia!" Pilatus bakata ka kabatne," Arusme aku nyalipatn Rajanyu?" Imam - imam kapala nyawap," kami ina' ada raja salain Kaisar!" ¹⁶ Akhire, Pilatus nyaratn Yesus ka kabatne untuk disalipatn. Yeusu disalipatn ¹⁷ Yeusu ka uwas sambil mikut salipe sandiri' nuju tampat nang badama" Tampat Tangkorak", nang daapm bahasa Ibrani disabut" Golgota" ¹⁸ Kanaun, kabatne nyalipatn Yesus ba dua urakng lain, nang dinyalipatn ka kanan ba keba Yesus, samentara Yesus barada ka tangah. ¹⁹ Pilatus uga' nulis sabuah tulisan ba nampatatn iya ka atas kayu salib. tulisan babunyi," YESUS URAKNG NAZARET, RAJA URAKNG YAHUDI." ²⁰ Manyak urakng Yahudi maca tulisan koa soale tampat disalipatn koa ka samak kota, lalu tulisan koa daapm bahasa Ibrani, Latin ba Yunani. ²¹ Maka, imam - imam kapala urakng Yahudi bakata ka Pilatus," Ame tulis,' Raja urakng Yahudi,' tapi tulislah ,urakng ini bakata,' Raja urakng Yahudi." ²² Pilatus nyawab," Ahe nang udah aku tulis akan tatap tatulis!" ²³ Para parajurit, waktu kabatne udah nyalipatn Yesus, naapi' pakeanNe lalu dimagi ampat bagiatn, sabagiatn masing - masing untuk para parajurit, jubahE uga; jubahE koa ina' ada kelime, kahe ditenun dari babah sampe ka atas ina' di jahit. ²⁴ Para parajurit koa ba pakat sabayaatne," Amelah diri' ngarantakki' pakeanNe nyian, labih baik diri' undi sae nang manang koa nang namu iya. Hal nyian tajadi ganaplah nang tatulis daapm kitab suci: " kabatne magi - magiatn pakeanKu, lalu untuk jubahKu kabatne muang undi untuk miliki' iya." Maz.22:18 Ayakoalah para parajurit pajaanan samua hal. ²⁵ Samentara koa, uwe' Yesus, ba adi'e nang bini, Maria bini Klopas, ba Maria magdalena, badiri ka samak salib Yesus. ²⁶ Waktu Yesus nee' uwe'-E ba murid - muritenang Ia kasihi' badiri kanaun, ia bakata ka uwe'-E," Nang bini,tee'lah nyian anak kita'!" ²⁷ Lalu Yesus bakata ka muritE nang Ia kasihi' koa," Nyianlah uwe'Nyu!" Aka' koa, murit koa narima' uwe' Yesus diapm ka rumahe.Kamatiatn Yesus. ²⁸ Aka' koa Yesus nang nahui' kade' samuane koa udah tajadi, untuk mangganapi' kitab suci, Ia bakata," Aku aus!". ²⁹ Dikoa ada sabuah tapayatn bainsi' anggur nang macum, sabab koa, kabatne namaan bunga karang nang udah di nyalupatn ka daapm anggur nang macum ka sabatakng hisop lalu di nyookatn ka moot Yesus. ³⁰ Aka' nyacapi' anggur nang macum koa, Yesus bakata," Udah salasai." Lalu, Ia ngogo'atn kapalaElalu nyarahatn nyawaE. ³¹ Sabab ari koa adalah ari parsiapan, lalu biar bangke - bangke koa ina' tatap ka kayu salib waktu ari sabat, sabab ari Sabat adalah ari besar, urakng - urakng Yahudi minta ka Pilatus biar paha urakng - urakng nang ka kayu salib koa dipatahatn lalu bangkee di turunan dari kayu salib. ³² Lalu para parajurit atakng lalu matahatn paha urakng nang partama nang dinyalipatn barage Yesus. ³³ Tapi, waktu kabatne nee' Yesus udah mati, kabatne ina' matahatn paha Yesus. ³⁴ Tapi, salah seko' parajurit koa nusukatn tumbake ka lambung Yesus, lalu sakatika koa uga' darah ba ai' ngalir kaluar. ³⁵ Urakng nang nyaksiatn pasristiwa koalah nang mare' kasaksian nyian, lalu kasaksiane banar, ia nahui' kade' ia ngataatn nang sabanare,biar kao uga' picaya'. ³⁶ Sabab, samua nyian tajadi biar ganaplah nang udah tatulis daapm kitab suci:" Ina' sote'pun dari tuakng-E nang di patahatn". ³⁷ Lalu agi', daapm bagian lain Kitab Suci bakata," Kabatne akan nee' Ia nang udah kabatne tikam". Yesus Dinyubur ³⁸ Aka' samua koa, Yusuf umpat ka Arimatea, nang uga' jaji murit Yesus namun sacara batapor - batapor sabab gai' ka urakng - urakng Yahudi, minta' ka Pilatus biar ia dingizinan naap bangke Yesus. ³⁹ Nikodemus, urakng nang dee namui' Yesus waktu maam ari, atakng sambil ngicakng campuran minyak mur ba gaharu, nang barate sakitar lima kilo. ⁴⁰ Maka, kabatne naap bangke Yesus lalu dimungkus ba kaikng linen nang di mare' rampah - rampah, sasuai adat panguburan urakng Yahudi. ⁴¹ Ka samak tampat Yesus disalipatn, ada sabuah taman, lalu ka daapm taman koa ada sabuah patunuan barahu nang nang nape' seko'pun bangke nang dimuangan dinaun. ⁴² Sabab arikoa adalah ari parsiapan bagi urakng Yahudi, lalu tampat patunuan ina' jauh, kabatne muangan bangke Yesus ka naun.