¹ Tuan - tuan, pinjawatlah amba - ambanyu baik ba adil. Kao nahui' kade' kao uga' miliki' tuan ka subayatn. ² Tataplah tekun daapm doa. ame lupa' ba jaga - jagalah sambil mangucap syukur. ³ Badoalah uga' untuk kami, sahingga Jubata Panampa' mukaatn pintu untuk satiap pakataatn, untuk ngabaratn tentang rahasia kabanaratn Kristus. Sabab koalah, aku angkitn di balenggu. ⁴ Badoa kirae aku bisa minjawat samuae jalas, sabab aku arus bakata. ⁵ Bajaatnlah kadaapm hokmat ka urakng -urakng luar, ba pakelah waktu nang ada. ⁶ Biarlah pakataatnnyu salalu dinginsi' ba kasih karunia. Biarlah kabatne di ngare'i', sahingga kao nahui' ayamae saharuse kao nyawab satiap urakng. ⁷ Adapun hal - hal nang basangkut ka aku, Tikhikus mare' nauan iya ka kao. Ia adalah kamaru' diri' nang takasih , saorang amba nang satia, ayukng sapalayanan daapm Jubata. ⁸ Aku ngirim ia ka kao maksute, biar kao nahui' hal - hal tentang kami, sahingga ia bisa nguatatn atinyu. [ sangahe versi lama di maca ][ " Aku ngirim ia untuk nyian, sabab ia nang nahui'sagala parmasalahannyu, ia nang nguatatn na' atinyu."] ⁹ Aku ngirim ia ba sama Onesimus, kamaru' nang takasih ba satia, ka antaranyu, Kabatne nang mao' maritaatn ka samua nang tajadi kadian. ¹⁰ Aristarkus ayukngku ka pinjara, ngirim salam ka kao ayakoa uga' Markus Sapupu Barnabas ( ba sae aja' nang narima pasatn nyian; Kade' ia atakng ka kao, tarima'lah ia), ¹¹ Ba Yesus uga nang di saru' Yustus. Kahe katiga urakng nyianlah ka antara samua urakng - urakng nang babaak nang bakaraja ba aku untuk karajaan Jubata Panampa'.Kabatne udah jaji pangibur bagiku. ¹² Salam umpat ka Epafras untuknyu . Ia adalah salah satu dari antara kao ba seko' amba Karistus Yesus. a salalu bakaraja karas untuknyu kadaapm doa, biar kao tatap teguh ba sapanuhe diyakinan ka samua kamaoan Jubata Panampa'. ¹³ Aku basaksi untuk ia, sabab ia udah bakaraja karas untuknyu, untuk samua urakng nang ada ka Laodikia, ba nang ada uga' ka Hierapolis. ¹⁴ Salam ka kao sakalian nang takasih tabib Lukas ba Demas. ¹⁵ Salam ka kamaru' - kamaru' nang ka Laodikia, Nimfa, ba jemaat uga nang ada ka rumahe. ¹⁶ Waktu surat nyian dibacaatn ka kao , kao uga arus maca surat nang aku tujuatn ka jemaat Laodikia. ¹⁷ Kataatn ka Arkhipus," Paratiatnlah palayanan nang udah kao tarima' umpat ka Jubata, sabab kao arus majaanan samuee koa ." ¹⁸ Salam nyian umpat ka kokotku sandiri' --- Paulus , ingatlah balengguku. Samoga kasih karunia nono'i' kao.