¹ ( Isa kaulun neke Gadara Delapas neke Roh Raat ) Hampe ire ta sabarang danau, ta uneng ulun-ulun Gadara. ² Katika Yesus minau teke jukung, nihi tiba-tiba erang kulun teke ogang sa sasanaro ulah rah setan manalu Yesus. ³ Aye muneng ta huang ogang, bakoi naan ulun tahan nuruk e lagi bahkan nihi rantai. ⁴ Sebab, aye haot tuhuk na huruk nihi rantai dan pee'e napasung, tapi aye mitus rantai e dan napas pasung- e. Bakoi naan erang ka ulun sagagah ngatatau aye. ⁵ Setiap andrau malem, aye kamiak tangar ogang dan ta bontot dan pabatan tenga e nihi watu. ⁶ Katika ulun hio ngindi Yesus teke lawit, aye malempat dan manyambah Yesus. ⁷ Lahui, nelang sambil kamiak nihi lengan mehet aye ngantuh, "Inun masalah kuki nihi Kayo, Yesus, Anak Allah Sa Entukuki? Aku lako teke Kayo demi Allah, ada ngansara kuki!" ⁸ Sabab, Yesus haot ngantuh nihi aye, "Balualah teke ulun iti, o roh najis!" ⁹ Lahui, Yesus nane nihi ulun hio, "Hie aran kayo?" Dan, aye ngajawab, "Aran ki Legion karena kami ajoh." ¹⁰ Aye saulang-ulang lako nihi Yesus supaya ada nulak ire teke pulau hio. ¹¹ Tangar anai naan iwek ajoh rahat kuman ta rite bontot. ¹² Lahui, roh-roh raat hio ngalako nihi Yesus, nelang ngantuh,"Hunyulah kami nihi iwek-iwek de kami tau suluk gi huange." ¹³ Yesus nuyu e, gana hio roh-roh bakoi maeh hio tulak dan suluk iwek-iwek. kangajoh sa bajumlah kira-kira ruwek ribu hio buyo gi hiring jurang hampe gi danau, lahui leteng tahuang danau. ¹⁴ Udi hiyo, pangandrey-pangandrey iwek hiyo pakuyo arep e dan mara gi kota dan ge tumpuk. Dan, ulun-ulun balua de ngindi inon sa terjadi. ¹⁵ Lahui, ulun-ulun hio hawi ge Yesus dan ngindi aye sa neen sa sanaro roh sa raat, sa ampun legion, rahat maharung dan haot balamba, dan aye haot waleng ranai. Dan, ire lei jari takut. ¹⁶ Lahui, ire sa ngindi e terjadi hiyo mara nihi ulun-ulun kalah awe hal hio panjari e nihi ulun sa sanaro roh raat dan tentang iwek-iwek hio. ¹⁷ Gana hio, ulun-ulun mulai lako Yesus de nanan uneng ire. ¹⁸ Udi hio, tangar waktu Yesus rahat mambai gi jukung, ulun sa neen sanaro ulah roh sa raat hio ngalako de aye tau sama nihi Yesus. ¹⁹ Tapi, Yesus bakoi nunyu e, sika ngantuh nihi aye,"Mudi bo kayo gi anak puloknai atei ko. Wara nihi ire inon haot Tuhan ulah nihi kayo dan bahwa Tuhan mahi gi kayo." ²⁰ Lahui, ulun huo tulak mulai ngabar nihi ulun-ulun ta Dekapolis tentang kaluhan sa haot Yesus ulah gi aye. Dan, kaluhan ulun jari wauh. ( Anak Yairus Debangkitkan dan Paribasa sa Pangira Depanaranai ) ²¹ Waktu Yesus nyabarang lagi nihi jukung ge sabarang, ulun ajoh bakarumuk ta rite ire-E, dan Aye naan ta hiring danau. ²² Lahui, erang kulun kapala sinagoge sa baaran Yairus hawi dan sahaot ngindi Yesus, aye basujut tangar pee e. ²³ Dan, aye ngalako bujur-bujur nihi Yesus, antuh,"Anak wawei ki sa halus kakan matei. Hawi dan ondok tanggan-Ko de aye tau kana ranai dan welum." ²⁴ Lahui Yesus tulak nihi Yairus. naan ajoh ulun sa umba Yesus dan ngaliling-E. ²⁵ Dan, naan isa wawei uwah loloi site salama dua belas taun. ²⁶ Aye haot bapire kali kahanangan ulah ajoh dukun, dan haot palua kaluhan harta sa ampun ne , tapi bakoi naan gunai e dan leon e malah batamboh. ²⁷ Sahaot ngarengei leon Yesus, wawei hio hawi ge Yesus teke lutuk ta penah-penah ulun ajoh dan ngajapai lamba-E. ²⁸ Wawei hio bapander,"Amun kuki induh nyaput lamba-E bo, kuki sareh ranai," ²⁹ Sakatika hiyo lei loloi site ulep dan aye nginam tenga e haot ranai neke reten e. ³⁰ Yesus lahui karasa teke tenga-E kakarep naan kuasa sa haot balua teka-E. Aye bapaling ta pulau ulun ajoh dan bapander:" Hie sa ngajapai lamba-Ki?" ³¹ Lahui murid-murid Yesus ngantuh nihi kayo-E," Kayo ngindi karumuk ulun sa ngancap-ngancap-Ko dan Kayo bapander,'Hie sa ngajapai-Ki?"' ³² Lahui, ngindi sakaliling de kindi hiye sa haot ngulah e. ³³ Balalu, sa haot aye karasa inon sa haot terjadi nihi aye, wawei hio jari tarewen. Aye hawi dan basujud ta hadapan Yesus nelang mara gi Yesus kajadian sa tuu e. ³⁴ Udi hio Yesus ngantuh nihi wawei hio, "Anak-Ki, iman ko sa nyalamat kayo. Tulak bo ta huang damai sejahtera dan ranai bo teke reten ko." ³⁵ Salagi Yesus masih bapaner, hawilah papire kaulun teke leu pamimipin sinagoge nelang bapaner, "Anak ko haot matei. Uah inon lagi pakaur guru?" ³⁶ Tagal, Yesus bakoi hakun ngarengei inon sa haot na antuh, Aye ngantuh nihi pamimpin sinagoge hio, "Ada gaer, harap bo." ³⁷ Lahui, Yesus bakoi nunyu erang kulun gin uma Aye, kacuali Petrus, dan Yakobus, dan Yohanes, puloknai Yakobus. ³⁸ Lahui ire hampe ta leu kepala sinagoge hio, dan Aye ngini kakicuhan, dan ulun-ulun nangis lei ngana nihi lengan samehet. ³⁹ Udi hio, katika Yesus suluk, Aye ngantuh nihi ire, "Uah inon kayo kicuh dan nangis? Anak iti bakoi matei, tapi rahat mandre." ⁴⁰ Tetapi ire kamihi Yesus. Tagal, Aye nunyu ire kaluhan balua dan Aye nuna amah dan ine nakiya hio, nihi ulun-ulun sa hayak Aye, balalu suluk gi ikong uneng nakiya halus hio naan. ⁴¹ Udi hio na japut-E tangan nakiya hio dan Aye ngantuh nihi aye, "Talita kum!"(Arti e, "Wawei halus, Kuki ngantuh nihi ko, sele bo!") ⁴² Nakiya wawei hio lahui mindri dan mulai takia, gana aye haot b aumur ruwe balas taun, dan hinang kaluhan ulun nginam emah. ⁴³ Lahui Yesus ngami parintah sa tamam nihi ulun tuha nakiya hiyo supaya ada naan isa karasa hal iti, dan ngantuh nihi ire supaya nakiya hio na ami kuta.