¹ On mataw Yesus anan Krais haqata bunmo in God ago onminta, teq on mataw gimam iyah na anan ginad bilaqsa in gimam ago nomin bunmo ginan ginad bilaqaytamo. ² Ad nazaq mo i God anan ginad bilaqsa ago gamuk muzin bugad teq i ginad emam, i God ago on min ginan tibilaqaqmo haqam. ³ Teq i ezaq toneq God anan ginad bilaqaq? Na in kazaq. I in ago gamuk muzin bugamta naqmo. Ad in gamuk gibilanta na in afaqan diq a haiqta. ⁴ On mataw God ago onmin iyim osayta na bunmo in og ka ago daq meqmeqinta na gibayan woqaqta. Teq i og ka ago daq meqinta inaq an wolim bayan woqaqta na alulin in kazaq. IGod anan helmo haqauqta naqmo. ⁵ Nog diq zaway iyim og ka ago meqinta inaq na wolim bayan woqaqta naqmo in og ka ago daq meqinta bunmo giquriyamaqtq. ⁶ Yesus Krais in yuw ned inaq gimalib ahol alulin ulal tonta. In yuw ned inaqmo gimalib ahol ulal tonta. ⁷ Ulal tonan God ago bugaw dimunta in Krais ahol alulin na i gibilen sireqaqta. Na ezaqgo bugaw dimunta na gamuk heltaqmo bilaqaqta. ⁸ Teq nagah ezeqman naqmo in Krais ago i gibilen sireqaqta. God ago bugaw dimunta teq yuw na teq ned naqmo. Teq nagah ezeqgo na gigo gamuk in amulikmota. ⁹ Mataw og kabta gamuk bilaqsa i helmo haqauqta, ari God gamuk bilamta na in mataw og kabta gigo gamuk tuquriyamta. Na ezaqgo gamuk nawa God tibilamta na in atatinmo anan bilamta. ¹⁰ Mat God atatin anan helmo haqaqta na in God ago gamuk in atatin anan bilamta na tuwaqan in agemab mo diq usaqta. Ari mat God anan helmo ahi haqaqta na in God anan mat katiyta haqaqta. Na God aqez na anan helmo ahi haqaqta na ago iyan. ¹¹ Teq God in atatin anan gamuk i gimen bilamta na in kazaq. Mataw kayeqmo tuteqmo os daqayta na alulin in atatin ago hib usaqta. Sa God in os dimunta kayeqmo osayta na i tiqig. ¹² Mat God atatin inaq osaqta na in kayeqmo tuteqmo tuqosdaq. Ari mat God atatin inaq ahi osaqta na in kayeqmo ahi osdaq. ¹³ Ne onmataw God atatin anan helmo haqayta na ya ne gimen gamuk ka mar tonaiq. Ne gamuk ka ahol waqeq ginad em daqay, helmo, i os dimunta kuluwa-kulumo osamta na tuwaqim osauq haq daqay haqad ya gamuk ka mar ton. ¹⁴ Teq i ginad emauq i nagah araq God ignan anad usaqta na anan bulonid in i giqez na tuhuritdaq haqauq. I ginad nazaq emad i God susumun ugnan ahi rabauqta. ¹⁵ Helmo, i God mo anad muzinad susumun ugsa in i giqez huritaqta. Nazaq iyan i nagah araq God ignan anad usaqta na anan susumun ugad i ginad emauq. I nagah anan susumun ugauqta ka i waqmo diq tuwaqam haqauq. ¹⁶ Ari mat araq in amaqbab araq daq meqinta emsa in ahol waqsa daq na in amaqbab na emid awitan moq hasdaqta nog ahi iyid teq mat na in amaqbab na amen God tubulondaq. Bulonid God in amaqbab na ulumsiheq os kayeqmo titeqmo os daqayta na tuqugdaq. Mataw asor gigo daq meqinta in mataw na giqemo giwitan ahi moq has daqayta. Nazaq iyan ya bilaqaiq ne mataw naqanta gimen God buloniy haqaiq. Ari daq araq meqin diqta nawa usaqta. Mataw daq meqinta na emim in gimo gihol adanin qwayim in giwitan tumoq hasayta. Nazaq iyan mataw daq meqin diqta na emsa ne in gimen God buloniy nazaq ya ahi bilaqaiq. ¹⁷ Daq God anad ahi usaqta nagan bunmo in daq meqinta. Teq daq meqinta nagan asor in mat eman awitan ahi moq hasaqta. ¹⁸ God ago onminmo diq daq meqinta adan ahi muzinayta. Haiqgam God atatin aqenta na in God ago onmin na giwamuz naqmo diq hiqiysa mat meqinta na ahi gimeqin tonaqta. Na ago i tuhurit. ¹⁹ Teq i God ago onmin iyim ossa mat meqinta na in og kab on mataw God gileh ugayta na bunmo giwan muzim osaqta na ago i tuhuritmo. ²⁰ Teq i ginad emauq God atatin og kab bolim i ginad eman hastitaysa i God hel diqta na ago tuhurit haqauq. Huritim i in inaq osad i in atatin Yesus Krais inaq tuqosauqmo. Yesus Krais in God hel diqta. Teq on mataw os kayeqmo tuteqmo os daqayta na alulin in mo. ²¹ Yaqgo onmin, ne God katiyta bunmo giholosad gileh negiy. Nawaqmo.