¹ Ya iyognizmo diq mataw God abinib nantut katiyta bilaqayta kabemo og kab leh bolad luwayta. Luwsa bugaw amo amo mataw katiyta na ginad wamuzsa in gamuk bilaqayta. Nazaq iyan ne mataw na bunmo ginan helmo hi haqiy. Ne mataw na gilum kemeq in giholib bugaw usaqta na in God ago hib bol o haiq na ne hurit kemiy. ² Ari God ago bugaw dimunta daq kazaq emsa ne ahol tuwaq has daqay. Mataw bilaqay, Yesus Krais in mat diq iyim og kab bolta haqayta, mataw naqanta giholib God ago bugaw dimunta usaqta. ³ Ari mataw Yesus anan nazaq ahi bilaqta na bunmo in gigo bugaw ta araq inaq luwayta, bugaw na in bugaw dimunta God ago hib bolaq ta na a haiqta. In mat Krais bab ugaqta naqmo ago bugawta. Mataw nazaqta teq bol daqay haqsa ne kwaziqmo tuhuritiyta. Teq mataw na muran og kab tugwahtiqim gigo kabiy tiqemay. ⁴ Yaqgo onmin, ne God agota tiqiyim osayta. Teq in ago bigaw dimunta ne giholib usaqta na in mat meqinta og ka wamuzin osaqta na uriyamim in awaz meqin diqta. Nazaq iyan in ne giholib assa ne mataw nantut katiyta bilaqaqta nagan bunmo tigiquriyamim osayta. ⁵ Mataw katiyayta na in og ka agota, nazaq iyan in og ka ago agamukan bilaqsa mataw God gileh ugayta na in gigo gamuk huritayta. ⁶ Ari i ne nenaq i God agota, mat God ago tuhuritta na in i gigo gamuk ka huritaqtamo. Teq mat God ago a haiqta na in i gigo gamuk ka ahi huritaqta. Daq na amalib teq i bugaw gamuk helta bilaqaqta na teq bugaw gamuk katiyta bilaqaqta na tigibiy kemam. ⁷ Ya iyognizmo diq, daq an anan ginad bilaqayta na in God ago daqmo diq. Nazaq i an anan ginad diq bilaqan. Teq mat mataw ginan anad bilaqaqta na in God ago amun iyim in God ago tuhhrit kemaqta. ⁸ I an anan ginad bilaqaqta na alulin God-mo, nazaq iyan mat in mat ta araq anan anad ahi bilaqaqta na in God ago ahuritta. ⁹ God in atatin amulikmo osta na eman og kab bolta,in i gilumsihid i kayeqmo kuluwa-kulumo tuqosam. God daq nazaq emim in i ginan anad bilaqaqta na i gilikmanib ulal tiqiy bug. ¹⁰ I iturim God anan ginad ahi bilam, haiqgam. God inmo iturim i ginan anad bilamta,anad bilaqsa in atatin eman og kab bolim in ahol tamaz nog God ugim i gigo daq meqinta bunmo tigiwalam bug. Daq an anan bilaqaqta na adan diq nawaqmo. ¹¹ Ya iyognizmo diq God nazaq i ginan anad ayah mo bilaqan iyan i nazaqmo an anan ginad bilaqsa osamtamo. ¹² Mat araq diq ameb God ahol ahi wamta. Ta teq i an anan ginad bilaqsa ossa God i gilikmanib ulalab osaqta. Ossa in ago daq an anan ginad bilaqaqta na i gilikmanib gwahtiq hasaqta. ¹³ God inmo ago bugaw dimunta igan iyan i ginad emauq, i God inaq ossa ta in i ginaq osaqmo haqauq. ¹⁴ Teq gimam iyah in atatin eman bolan i gimeb in ahol tuwaqim i on mataw gibileqim bilaqauq gimam iyah in atatin eman bolim in og kab onmataw bunmo gilumsihim gimen dante tiqamta haqauq. ¹⁵ Ari onmataw bilaqay, Yesus in God atatin haqayta na God in on mataw na nenaq ossa in God inaq osaytamo. ¹⁶ Nazaq iysa iyan i ginad emauq, helmo diq God i ginan anad diq bilaqaqta haqauq. Ad in agem anan ginad bilaqsa osauqta na alalin God-mo. Teq mat in amaqbaban ginan anad bilaqaqta na in God inaq ossa God in mat na inaq osaqtamo. ¹⁷ I og kab osad Krais daq emaqta nazaq nog i emauqtamo, emsa daq an anan ginad bilaqaqta na i gilikmanib tugwahtiq hasaq. Nazaq iyan abeb God ago hazizir akaman bo tugwahtiqsa i ahi rabamta. ¹⁸ On mataw an anan ginad bilaqsa osayta na in ahi rabayta. Haiqgam, in giholib an anan ginad bilaqgo adan na awaz timeqniysa in God ago hazizirib turnan ahi rabayta. Ari on mataw an agem meqinta agayta naqmo teq rabayta. Na ezaq go in gigo daq meqinta na anadin emad in teq God ago hazizirib turad amenin meqinta tuwaq daqay haqad in rabayta. On mataw na giholib an anan ginad bilaqgo adan sosil iysa iyan in rabayta. ¹⁹ God danmebmo diq i ginan anad bilaqan muran i an anan ginad bilaqsa osauqtamo. ²⁰ Mat aw nog bilaqaq ya God anan inad bilaqaqta haqad teq in agem meqinta amaqbab ugaqta, mat na katiyaqta. Na ezaqgo mat in amaqbab ahol waqaqta na anan anad ahi bilaqeq in God ahol ahi wamta na anan anad ahi bilaqadaqmo. ²¹ Teq Krais gamuk awaz meqinta igta in kazaq bilam, mat God anan anad bilaqaqta na in amaqbaban ginan anad tibilaqdaqmo ham.