6 ¹ Ia ena dua na siga ni vacecegu, sa tu o koya e loma ni viwere ni sila; sa ra dolokia na visola ni sila na tisaipeli, sa ra qilirakia e ligadra ka ra kania. ² E so vi ira na farisi sa ra tukunia vi ira, a cava dou sa caka e na siga ni vacecegu. ³ Sa qai vosa ko Jisu ka tukunia vi ira, dou sa yali beka ni wilikia na ka ke, na ka caka o Tevita ni sa via kana o koya kei ira sa tu vata. ⁴ Ni sa curu o koya i na vale ni Kalou, sa tauria cake na madrai dauraici, ka wasea voki lia vi ira e ra tiko; ko gona sa yali ni tauria me ra kania na tani ka tauria duadua lia vi ira na bete. ⁵ Sa kaya vi ira o koya, sa Turaga voki lia ni siga ni vacecegu na luve ni tamata. ⁶ Ia sa dua voki na siga ni vacecegu, sa curu o koya i vale ni lotu ka vatavuvuli: ni sa tiko voki lia kinia e dua na tamata sa malai na ligana i matau. ⁷ Sa ra raici ko o ira na Farisi ke sa ia na vivabulai ena siga ni vacecegu se yali, me ra vadinadinataki na ka e ra beitaki koya kinia. ⁸ Ni sa kila na nodra vakasama ko koya, sa tukunia sara vua na tamata sa malai na ligana, mo duri mai ka tu ena kedra maliwa. Sa qai duri tu e na kedra maliwa. ⁹ Sa qai tukunia vi ira ko Jisu, au na tarogi ikonu e dua na ka: sa rawa beka ni caka na ka vinaka na siga ni vacecegu, se ka ca? Me ia kinia na vivabulai, se vivamatei. ¹⁰ Sa qai rai wavokiti ira kece lia o Koya, sa qai vosa vua na tamata me dodokia mai na ligana, sa caka va kinia: A sa vabulai na ligana, sa va voki lia kinia na ligana kadua. ¹¹ Sa qai kuri lia ni dra cudru: E ra sa qai vivosakitakia vakai ira, se cava mada me ra caka vi Jisu. ¹² E na siga gona, sa qai, o koya i na ulunivanua me masu, ni sa masu tiko vua na Kalou e na bogi ka lai siga mai. ¹³ Ia ni sa siga mai, sa kacivi ira na nona tisaipeli, sa qai digitakia e lewe tinikarua ka vatokai ira mei apositolo. ¹⁴ O saimoni o koya sa vayacania voki lia o koya me Pita, vata ki Adriu na tacina, o Jemesa ki Joni, o Filipi ki Pacolomiu. ¹⁵ O Maciu kei Tomasi, o Jemesa na luvei Alifio, ki Saimoni sa vatokai na gumatua. ¹⁶ O Jutasa na taci Jemesa Isikarioti, o koya ma soli koya yani. ¹⁷ A sa qai sobu vata ki ira o koya, ni sa tu e na buca, nisa lewe levu sara na nona tisaipeli, vata na tamata ka ra sa levu sara mai Jutia taucoko ki Jeruisalemi, ki na baravi ki Taia ki Saitoni, ni sa ra qai mai me rogoci koya, ka me ra vabulai voki lia mai na nodra mate. ¹⁸ Ki ira voki lia sa vacacani mai na yalo velavela eso; ni sa ra vabulai. ¹⁹ Ni ra sa saga kece lia o ira na tamata me ra tarai koya: ni sa vu mai vua na kaukauwa mana, ni sa qai ra vabulai kece lia. ²⁰ Sa qai soqoni ira na nona tisaipeli ka kaya, dou sa kalougata na dravudravua; ni sa nomunu na matanitu ni Kalou. ²¹ Dou sa qai kalougata o kemunu sa via kana e daidai: ni dou na vamamautaki. Dou sa kalougata o kemnu sa tagi e daidai ni dou sa dredre. ²² Dou sa kalougata ni ra sa cati kodou ko ira na tamata, ni ra sa vatabui kodou, ka vasesewani kodou, ka varogocatakia na yacamudou, e na vuku lia ni luve ni tamata. ²³ Dou maraua e na siga gona, ka rika ena marau: raicia, sa levu na kenmai sau vei kodou mai lomalagi: e ra sa caka vakakinia ko ira nodra qase vei ira na parofita. ²⁴ Ia dou sa ca oi kemunu sa vutuniyau ni dou na qai rawa na nomunu vacegu. ²⁵ Dou na qai ca. oi kemunu sa mamau. Ni dou na via kana. Dou na ca oi kemunu sa dredre e dai ni dou na rarawa ka tagi. ²⁶ Dou na ca, ni sa vavinavinakatakia kodou o ira kece lia na tamata! Ni ra sa caka voki lia kinia o ira na nodra qase vi ira na parofita vailasu. ²⁷ Ni'u sa kaya vi kodou sa rogocia, lomani ira nomudou meca, ka caka vinaka vi ira sa cati kodou. ²⁸ Me vinaka na nomudou vosa vei ira ka rulaki kodou, ka qai masulaki ira sa valialia kodou. ²⁹ Kevaka e dua sa sa sa bicia na balumu e dua, vagolea voki vua na balumu ka dua: ka mo kua sara ni bureitakia na nomui curucuru vei koya sa yadia tani nomu kote. ³⁰ Ia mo solia vei ira kece lia ka mai kerekere vi iko; ka mo kakua sara ni tarogia voki na nomunu yau vi koya sa yadia tani. ³¹ Ia me vaka dou sa vinakatia me ra caka vi kodou na tamata, dou caka voki lia kinia vi ira. ³² Ia kevaka dou lomani ira sa lomani kodou. O cei me vavinavinaka vi kodou? Ia o ira na tamata i valavala ca era sa lomani ira sa loloma vi ira. ³³ Ke dou sa caka vinaka vi ira lia sa caka vinaka vi kodou, o cei me vavinavinaka vi kodou? Ni sa cakacaka va kinia o ira sa tamatai valavala ca. ³⁴ Ia kevaka dou sa solia me tara mada lia vi ira ni dou sa vanuinui rawa voki mai kinia, o cei me vavinavinaka vi kodou? Ni sa solia voki lia ko ira na tamata ca ki vei ira voki na tamata ca, me ra rawa voki na ka tautauvata. ^{35 36} Ka mo dou lomani ira na nomudou meca, ka caka vinaka, ka solia me dou tara mada ni dou sa yali nuitakia mo dou rawa voki e dua na ka; sa cecere sara: ni sa loma soli o koya vi ira ³⁷ Ia dou kakua ni daulelewa, dou na qai yali lewa: Dou kakua ni vi beitaki ni dou na qai yali beitaki: Dou kakua ni cudruvia na tamata, ni doi na qai yali cudruvi. ³⁸ Mo dou solia, ka na qai soli vi kodou; nai varau vinaka, ka tabaki sobu, ka qai kureitaki vata, ka vuable, e ra sa solia na tamata i na lomaseremudou. Ia nai varau dou sa varautakia, ena qai varautaki voki vi kodou. ³⁹ Ni sa tarogi ira ko koya e na dua na vosa vatautauvata: E rawa beka vua na mataboko me tuberia voki e dua na mataboko? Ni rau na yali beka ni lutu ruarua i nai keli? ⁴⁰ Sa yali ni dua na tisaipeli me uasivi vua na nona vavuvuli: ia o koya yadua ka sa yaco me vinaka sara, e rau na qai tautauvata ki na nona vavuvuli ⁴¹ Ia e vakaevei ni konu sa raicia na malamala ena matai wekamunu, ka o sa nanulevatia na kau sa tu e matamu? ⁴² Se o na tukunia vacava vua na wekamu, i na wekaqu, dainia meu leutia tani mada na malamala sa tu e matamu, ia o sa yali raicia na kau sa tu e matamu. O na qai raicia vinaka ka leutia na malamala sa tu e na matai wekamunu. ⁴³ Ni sa yali dua na kau vinaka me vuataki na kau ca; se na kau ca me vuatakia na vua vinaka. ⁴⁴ Ni sa kilai na kau kece lia e na vuana. Sa yali ni veti na lolo mai na wa-vavotona, se veti na vua-ni-vaini mai na wa-gadrogadro. ⁴⁵ A tamata vinaka sa yadia mai na ka vinaka mai na lololo vinaka ni lomana: ia na tamata ca sa yadia mai na ka ca mai na lololo ca ni lomana. Ni sa vosatakia na gusuda na ka sa oso valevu kinia na lomada. ⁴⁶ Ia ka vakaevei ni dou sa kacivi au, "Turaga, Turaga", ka yali ni caka na ka au sa tukunia? ⁴⁷ O koya yadua sa qai mai vi au, ka rogocia na noqu vosa, ka muria, au na vatakila vei kodou na tamata e rau sa tautauvata kaya. ⁴⁸ E rau sa tautauvata ki na tamata sa tara e dua na nona vale, ni sa kelia va titobu, ka tauyavutakia e na dela ni vatu: ia ni sa yaco na waluvu, sa coka vakaukauwa na vale gona na dobui, a sa yali ni yavalati rawa: ni sa tauyavutaki e na dela ni vatu. ⁴⁹ Ia ko koya sa rogocia ka yali caka na ka au tukunia, sa tautauvata na tamata sa tara e dua na vale e na dela ni soso, ka yali ni dua na kena yavu; a sa coka vakaukauwa na dobui, a sa lutu sara kinia; ia na ka levu na kena rusa na vale gona.