2 ¹ E a vakatulewatakia na Tui (Sisa) o Akusito ena gauna gona me vakayacori e dua na wili leweni vanua ena matanitu vaka-Roma. ² Nai matai ni wili lewenivanua gona a vakayacori ena gauna e Kovana tiko kinia mai Siria o Kirinio. ³ Era a dui qai voki na tamata kina nodra koro me ra volai kinia. ⁴ A qai voki lia i colo o Josefa mai na koro o Nasareci e Kalili ki na koro o Pecileema e Jutia, na koro sara lia ni sucu nei Tevta na Tui, ka sa tubu mai vua ⁵ sa volai voki lia ko Meri baletia ni sa musu vua me watina ka ni sa bukete tiko. ⁶ Ia ni rau sa tiko kinia, sa yaco na siga ni vakasucu. ⁷ Sa vakasucumia na nona ulumatua na gone tagane, viviraki vei koya nai sulu ni gone, ka mai daini tu ena nodra tikina na manumanu, ni sa yali na tikini bure me nodratou. ⁸ A so nai Vakatawa ni sipi ena vanua gona, era a tiko ena vanua veico, a ra veivuke me vakatawa na sipi ena raiyavi. ⁹ Ka raicia, sa dua na agilose ni Turaga, sa rairai vei ira, a sa cila lia vakavolivoliti ira nai ukuuku ni Turaga, a ra sa rere vakalevu. ¹⁰ A sa kaya vei ira na agilose, Dou kakua ni rere: raicia au sa yadia mai vei kemuni e dua lia nai tukutuku vinaka, mo dou reki vakalevu kei ira voki lia na tamata kecega. ¹¹ Ni sa sucu vei kemuni ena siga koya ena koro i Tevita nai vakabula, ko koya lia na Karisito na Turaga. ¹² Ia koya lia koya na kenai vakatakilakila vei kemunu: Dou na kunea lia na gone sa viviraki vua nai sulu ni gone, ka sa davo tiko lia ena nodra tikina na manumanu. ¹³ A ra sa lewe vuqa voki lia na kai lomalagi a ra sa tiko vakasauri vata kaya na Agilose, a ra sa vakavinavinakatakia na Kalou ka cavutia, ¹⁴ Sa nona lia na Kalou na vakarokoroko ena veiyasana e colo sara! A sa veivinakati rawa kinia ko ira e vuravura: sa lomani lia ko ira na tamata., ¹⁵ Ia ni ra sa lesu voki na Agilose ki lomalagi, a ra sa veivosakitakia vakai ira na i Vakatawa ni sipi, me datou qai ki Pecileema me raicia na ka sa qai yaco, ka a mai vakaraitakia na Turaga ¹⁶ A ra sa qai lia yani vakatotolo ka kunei Meri kei Josefa, kei koya voki lia na gone, sa davo ena nodra tikina na manumanu. ¹⁷ Ia, ni ra sa raicia, era sa cavutia na vosa sa tukuni vei ita ena vuku ni gone koya. ¹⁸ A ra sa kurabuitakia kece lia ni ra rogocia na veika sa cavutia vei ira nai Vakatawa ni Sipi. ¹⁹ A sa ciqomia lia na vosa kece koya ko Meri ka sa vakananumia kinia e lomana ²⁰ Ia, ko ira nai Vakatawa ni sipi era sa lesu voki, ka vakavinavinakatakia ka doka na Kalou ena vuku kece lia ni ka era sa rogocia ka raicia, me vaka sa tukunia oti vei ira. ²¹ Ni sa oti lia e bogi walu, sa cilivi kinia na gone sa vakatokai me yacana ko Jisu, me vaka liaka vakatoka na Agilose ni se bera kinia ni kunekunetaki. ²² Ia ni sa oti lia na veisiga ni vakasavasavataki i tinana me vaka nai vunau i Mosese, erau a yadi koya ki Jerusalemi, me vakacabori kinia vua na Turaga ²³ (me vakalia sa volai ena vunau ni turaga, a gone tagane kece lia sa ulumatua ena vakatokai me tabu me nei Jiova) ²⁴ me rau vakacabora voki lia nai soro me vaka na ka sa kaya nai vunau ni Turaga, Me rua na soqe ka rua voki lia na luve ni ruve. ²⁵ Ka raicia, sa dua na tamata mai Jerusalemi , na yacana ko Simioni, a sa yalododonu ka daulotu na tamata koya, a sa warakia na nodra vakacegu na Isirelia, a sa tiko vokilia vei koya na Yalo Tabu. ²⁶ A sa vakatakila oti vua na Yalo Tabu, ni na yali mada ni mate, ena kunea lia e liu na Karisito ni Turaga. ²⁷ Sa vakavuna lia na Yalo Tabu na nona qai kina vale ni soro ia, ni rau sa yadia mai na gone ko Jisu koi rau na nona qase, me vakayacori lia vua me vaka nai valavala ni Vunau, ²⁸ sa qai roqotia i colo ko koya, kavakavinavinakatakia lia na Kalou ka kaya, ²⁹ Kemunu na Turaga, mo ni dainia na nomunu tamata me qai ena vakacegu me vakalia na nomunu vosa. ³⁰ Ni sa qai raicia na mataqu na vunibula mai vei kemunu. ³¹ Io, o koya lia koya ko ni sa vakarautakia ena matadra na tamata kece lia; ³² A rarama me vakararamatakia na veimatanitu tani, Me nodrai ukuuku voki lia na nomunu tamata na Isireli. ³³ A rau sa kurabuitakia ko Josefa kei Meri na tinana ena vuku ni veika sa tukuni ena vukudra. ³⁴ A sa vosavakalougatataki rau lia ko Simioni, a sa kaya vei Meri na tinana, Raicia, ko koya koya sa viritoka me bale sobu kinia, se tucake kinia e lewe vuqa vei ira na Isireli, ka me vakatakilakila ena vosavakacacataki lia. ³⁵ me vakaraitaki kinia na nanuma ni yalodra era lewe vuqa, ia ena laubasikata lia na yalomu voki lia nai seleiwau. ³⁶ A sa dua na parofita yalewa, ko Ana, a luvei Fanueli ena mataqali lia i Aseri (sa vuqa sara lia na nona yabaki, sa goneyalewa ni sa vakawati, a rau sa bula vakavata kei na watina ka yabaki vitu: ³⁷ sa qai yada voki ni sa yabaki walu saga vulu ka va) a sa yali ni qai tani e vale ni soro, a sa daulotu, lolo ka masu voki lia ena siga kei na bogi. ³⁸ A sa qai mai ko koya ena tikini siga gona ka vakavinavinakatakia voki lia na Turaga, a sa vosataki ira kece lia era tiko mai Jerusalemi ena warakia nai Vakabula. ³⁹ Ia, ni ratou sa cakava oti kece lia na vunau ni Turaga, eratou sa lesu voki ki Kalili, kina nodratou koro lia ko Nasareci. ⁴⁰ A sa tubu cake ka yalomatua lia mai na gone, sa sinai lia ena vuku, a sa tu vei koya na loloma ni Kalou. ⁴¹ A rau sa dau qai na nona qase ena veiyabaki ki Jerusalemi ena kavavata ni lako sivia. ⁴² Ia, ni sa yabaki tinikarua na nona yabaki, eratou sa qai ki Jerusalemi, me vakalia na kenai valavala ni kanavata; ⁴³ Ia ni ratou sa vakaotia lia na veisiga, ka rau sa lesu voki, sa tiko lia ko Jisu mai Jerusalemi, a rau yali ni kila ko Josefa kei tinana. ⁴⁴ A rau sa nanumia sa tiko ko koya vei ira saqai tu, a rau sa qai lia ena dua na siga ka bogi voki: a rau sa vakasaqarai koya vei ira na kai nodra, kei ira voki lia na nodrau vei kilai. ⁴⁵ Ia, ni rau sa yali ni kunea, erau sa lesu voki ki Jerusalemi, ka vakasaqarai koya voki. ⁴⁶ Sa oti lia e bogi tolu, erau sa qai kunei koya ena vale ni soro, ni sa tiko lia ena kedra maliwa nai vakavuvuli, ka rogoci ira tiko ka taro voki lia vei ira. ⁴⁷ A ra sa kurabuitakia ko ira kece era rogocia, ena nona vuku kei na vosa voki lia. ⁴⁸ Ia, ni rau sa raicia, erau sa kurabuitakia, a sa kaya vua na tinana, Na luvequ, ko sai valavala vakoya vei keirau ena vuku ni cava? raicia, keirau kei tamamu sa vakasaqarai iko ka sa rarawa tiko. ⁴⁹ A sa kaya vei rau ko koya, a cava drau sa vakasaqarai au kina? A yali beka ni kila ni sa kilikii kei au meu tiko lia ena vale nei tamaqu? ⁵⁰ A rau sa yali ni kila nai balebale ni vosa sa kaya vei rau ko koya. ⁵¹ A sa qai sobu vata keirau ko koya ka yaco ki Nasareci, a sa talairawarawa lia vei rau: a sa maroroya lia ko tinana na vosa kece lia koya e lomana. ⁵² A sa tubu cake ko Jisu ena vuku kei na yagona voki lia, a sa vinakati koya vakalevu cake tiko lia na Kalou kei ira voki lia na tamata.