24 ¹ Ia ena matai ni siga ni wiki, ena savulaci caca, e ratou sa qai mai kinai bulubulu, e ratou sa yadia vata kei iratou e so na ka boi vinaka eratou sa vakarautakia tu. ² E ratou raicia ni sa vaqiqici tani na vatu mai nai bulubulu. ³ E ratou sa curu e loma ka yali kunea na yagoi Jisu. ⁴ A sa yaco ni ratou sa kurabuitakia na ka sa yaco, ka vakasauri, sa tu voleka e yasadratou e rua na tamata enai suli lumilumisa. ⁵ E ratou sa rere ka cuva sobu ena qele, rau sa kaya vei iratou, "cava dou sa mai vakasaqarai koya sa bula ena kedra maliwa na mate?. ⁶ "Sa yali ikei o koya, sa tucake voki. Nanumia na nona vosa vei konu, nona sa tiko vata kei kodou mai Kaleli, ⁷ ni sa kaya, ena soli yani na luve ni tamata ena ligadra na tamata ca, ka na lauvako kina kauveilatai ka na tucake voki ena ka tolu ni siga. ⁸ A ratou sa qai nanumia na nona vosa, ⁹ ka suka tani mai enai bulubulu, ka tukunia na ka kece lia koya vei ira na lewe tini kadua, vei ira kece lia na kena vo. ¹⁰ Sa yaco ko Meri na yalewa ni Makitala, Joana, Meri na tinai Jemesa kei ira na yalewa era tiko vata kei iratou e ratou sa mai tukunia na vei ka oqo vei iratou na apositolo. ¹¹ A sa vaka nai tukutuku wale ve ira na nodratou vosa, a ra sa yali ni vakadinatia. ¹² Sa qai cavutu ko Pita, ka cici kinai bulubulu, ia ni sa cuva sobu, ka raicia nai sole lineli ni sa no wale, a sa qai tani as kurabui e lomana ena vuku ni ka sa yaco. ¹³ Ka raicia sa lewe rua vei ia sa qai ena siga dina koya kina dua na koro lailai ko Emeo na yacana, e vitu beka na maile mai Jeruisalemi. ¹⁴ A rau sa veitalanoatakia na veika kece lia sa qai yaco ¹⁵ Ia ni rau sa veitalanoatakia ka veiwaseitakia, sa toro voleka ko Jisu, ka qai vata keirau. ¹⁶ A sa vakamatabuwawatakia na matadrau me rau kakua kilai Koya. ¹⁷ A sa kaya vei rau ko koya, "ai tukutuku cava oqo drau sa veivosakitaki ni drau sa qai tu?" A rau sa tu vakadua ka vakavevekumata. ¹⁸ A sa dua vei rau, na yacana ko Kaliopasa, sa vosa vua ka kaya o iko duadua beka na vulagi mai Jeruisalemi ka yali ni kila na veika sa qai yaco ena gauna koya?" ¹⁹ A sa tarogi rau ko koya, "a ka cava?" a rau sa kaya vua, na ka sa baleti Jisu nai kai Nasareci, a parofita sa levu ena cakacaka kei na vosa ena mata ni Kalou kei na matadra kece lia na tamata. ²⁰ A sa soli koya ko ira na bete levi kei ira na neimamu Turaga me lewai me mate, a ra sa vakotia kina kauveilatai ²¹ Ia keimamu a nuitakia ni sai koya lia ke ena vakabulai ira na Isireli. Ia ke voki lia na kenai ka tolu ni siga e daidai ni sa caka oti na ka ke. ²² Ia ka so voki lia na neimamu yalewa, e ratou sa vamatalautaki kimamu, ni ratou a qai kinai bulubulu e savulaci caca. ²³ Ia ni ratou sa yali kunea na yagona, e ratou sa lesu voki mai ka tukunia, ni ratou a raicia eso na agilosi sa sikavotu vei iratou, ka kaya sa bula ko koya. ²⁴ O iratou voki lia eso eratou sa dau tiko vata kei kimamu, eratou sa qai kinai bulubulu, a ratou sa kunea ni sa vaka na ka eratou a kaya na yalewa. Ia eratou sa yali ni kunei koya. ²⁵ A sa kaya vei rau ko koya, drau sa sesewa, ka yali vakabautia na ka kece lia sa tukunia ko ira na parofita. ²⁶ E yali beka ni kilikili kei koya na Karisito mo vosotia mada na veika ke me qai curu kina nona i ukuuku. ²⁷ Ka sa vakatekivu enai vola i Mosese ka yacovi ira kece lia na parofita, ka serekia vei rai nai Vola Tabu kecelia na vosa ka tukunia ko koya. ²⁸ a ratou sa torovia na koro lailai e rau sa qai kinia. A sa qai ko koya me vaka sa via qai ki liu. ²⁹ A rau sa cikevia matua, ka kaya, ni tiko lia kei keirau, ni sa qai raiyavi, a sa kala n siga, a sa curu ko koya me tiko vata keirau ³⁰ Ia ni ratou sa tiko sobu meratou kana, sa tauia na madrai ko koya, ka lotutakia, ka dovia, ka solia vei rau. ³¹ A sa lau na matdrau, a rau sa kilai koya. A sa takali ko koya mai na matadrau. ³² A rau sa veikayaka vakairau, sa sega li ni katakata sara na lomadaru ni datou sa veivosaki kaya ena gaunisala, ni sa vakamacalatakia vei kedaru nai Vola Tavu ko koya? ³³ A rau sa cavutu ena tiki ni raiyavi koya, ka lesu voki ki Jeruisalemi, a rau sa kunei ira na lewe tinikadua ni ra soqoni vata mai, kei ira era dau tiko vata kei ira. ³⁴ A ra sa kaya, sa dina sa tucake voki na Turaga, ka sa rairai vei Saimoni. ³⁵ A rau sa tukunia voki lia na veika sa ia e gaunisala, ka ni rau sa kilai koya voki lia ni sa dovia tiko na madrai. ³⁶ Ia ni ra sa vosa tiko vakaoqo, sa tu sara ena kedra maliwa ko JIsu, ka kaya vei ira, dou vakacegu lia. ³⁷ A ra sa kidroa ka rere sara, a ra sa nanumia ni ra sa raicia e dua na yalo. ³⁸ A sa kaya vei ira ko koya, dou sa kidroa ena vuku ni cava? Ka sa tubu na vakanananu ena lomamunu ena vuku ni cava? ³⁹ Tarai au, ka raicia na ligaqu kei na yavaqu ni sai au dina lia, ka raicia, ni sa yali ni vakalewena se vakasuina na yalo me vaka dou sa raicia vei au. ⁴⁰ Ia ni sa vosa oti ko koya sa vakaraitakia vei ira na ligana kei na yavana. ⁴¹ Era se yali tiko lia ni vakabautia ena levu ni reki kei na marau, sa kaya vei ira, "sa tu e dua na kakana vei kemunu, se yali?" ⁴² A ra sa solia vua e dua na tiki ni ika tavu. ⁴³ A sa tauria ko koya, ka kana e matadra. ⁴⁴ A sa kaya vei ira ko koya, oqo na vosa kau a dau kaya vei kemunu ena gauna au a dau tiko kinia kei kemunu, ni veika kece lia e volai enai Vunau i Mosese kei na nodrai vola na parofita kei na Same me na vakavotukana. ⁴⁵ Sa qai vakararamatakia ko koya na nodra vakasama me ra kila nai Vola Tabu. ⁴⁶ A sa kaya vei ira, " Io, ni sa volai ena dua na gauna makawa, ni na vakasaurarawataki na Mesaia, ka mate, ka qai tucake voki enai katolu ni siga". ⁴⁷ Me vunautaki vokilia na veivutuni, kei na vakabokoci ni valavala ca, ena vuku ni yacana vei ira na lewe ni veivanua kece lia me tekivu mai Jeruisalemi. ⁴⁸ Ia koi kemunu nai vakadinadina ni veika kece ke. ⁴⁹ Ka raicia au sa tala yani na ka sa yalatakia tu ko Tamaqu vei kemunu. Ka mo dou tiko lia ena koro me yacovia ni sa vakaisulutaki kemunu ena kaukauwa mai cake. ⁵⁰ A sa yadi ira yani i Pecani, ka lavetia cake na ligana ka vosa vakalougatataki ira. ⁵¹ A sa daini ira koya ka sa yadi cake ki lomalagi ena gauna sa vosa vakalougatataki ira jiko kinia. ⁵² A ra sa qaravi koya ka lesu voki ki Jeruisalemi ena reki. ⁵³ E ra jiko lia ena vale ni lotu ka vakacaucautakia na Kalou.