¹ Ia kevaka dou sa vaturi vata ki Karisito, varaicia na vika sa mai cake, sa dabe tiko ena liga matau ni Kalou. ² Dou vananumia na vika mai cake, kakua lia na vika e vuravura. ³ Ni dou sa mate ka sa vuni vata ki Karisito ena Kalou na nomunu bula. ⁴ Ni na rairai mai na Karisito na noda vuni bula, ka na dou qai rairai vata enai ukuuku. ⁵ Okoya mo dou qai vamatea na vitikimunu vavuravura, na dauyalewa, na vukivuki yali savasava, na garogaro ca, na dodomo ca, vata ki na kocokoco, kei na dauqaravia na Kalou lasu: ⁶ na vika koya sa yaco kinia na cudru ni Kalou, vi ira sa dau talaidredre: ⁷ ia koi kemunu voki lia, dou a ia e liu nai valavala vakakina, ni dou a bula lako vakakina. ⁸ Ia koya, mo dou luvatia na ka kece lia koya, a daucudru, na daulasa, na lomaca, na vosa ca, na vosa dukadukali mai na gusumunu. ⁹ Kakua ni dauvilasuyaki, ni dou sa luvatia tu na tamata makawa kei na nonai valavala; ¹⁰ ka dou sa vasulumia oqori sa vou, o koya sa vavoui tiko ena vuku me vaka na yaloyalona ka buli koya: ¹¹ sa yali kinia ni nanumia ni kai Jutia se kai tani, se cili se yali cili, na tawa vuku, na kai lekutu, na bobula, nai taukei: ia sa uasivi ena ka kece lia na Karisito. ¹² O koya mo dou qai vaisulu me vaka ni dou na nona digitaki na Kalou, oi kemunu sa yalosavasava ka daulomani, e na yalo dauloloma, e na yalovinaka, e na yalomalumalumu, e na yalomalua, e na dauvosotia vadede: ¹³ dou vivosoti vai kemunu, ka kakua ni vicudruvi, kevaka e dua na ka sa rarawa kinia e dua: me vaka sa yali ni cudruvi kemunu na KArisito, mo dou vaka voki lia kinia. ¹⁴ Ia me liu ena ka kece lia ke na loloma, ni sai vau vinaka sara. ¹⁵ Ia me lewa sara e na lomamunu na vacegu i Karisito, ni dou sa kacivi ki na ka koya, ni dou sa yago e dua bau lia: ia mo dou ia tiko na vavinavinaka. ¹⁶ Me tiko valevu e lomamunu na vosa i Karisito e na vuku kece lia; dou veivatavulici ka vivunauci vakai kemunu ena same kei na sere kri na meke vayalo, dou sere tiko vua na Kalou ni sa tiko ena yalomunu na loloma. ¹⁷ Ia ka ka kece lia dou sa caka, se dou vosa se dou cakacaka, me caka kece lia ena yaca ni Turaga ko Jisu, ko koya dou ia tiko kinia na vavinavinaka vua na Kalou na Tamada. ¹⁸ Oi kemunu na yalewa vawati, monu talairawarawa vi ira na watimunu, me vaka ni sa dodonu vua na Turaga. ¹⁹ Oi kemunu na tagane vawati, monu lomani ira na watimunu, ka kakua ni yaloca vi ira. ²⁰ Oi kemunu na gone, monu talairawarawa vi ira na nomunu qase ena ka kece lia: ni sa vinaka sara koya vua na Turaga. ²¹ Oi kemunu qase, monu kakua ni vacudrui ira na luvemunu, de ra datuvu kinia. ²² Oi kemunu na tamata, monu talairawarawa vi ira na nomunu turaga vayago ena ka kece lia; kakua ni ia wale lia e na matanavotu, me vikati kemunu kinia ko ira na tamata; dou ia lia e na loma dina, ni dou sa rerevaka na Kalou: ²³ ia na ka kece lia dou sa caka, kitakia mai na vu ni yalomunu me vaka vu na Turaga, me kakua vaka vi ira wale lia na tamata; ²⁴ ni dou kila ni dou na rawatia mai vua na Turaga nai votavota me kenai i sau: dou sa qaravia na Turaga ko Karisito. ²⁵ Ia ko koya sa caka ca ena rawatia na kenai sau ni ca sa caka; ka sa yali ni vinakatia vailoa e dua na tamata.