¹ Koi keitou ko Paula, kei Silivenuse, kei Timoci ki na nodrai soqosoqo lewe ni lotu na kai Cesalonaika, o ira sa tu vua na Kalou ko Tamada kei na Turaga ko Jisu Karisito: me nomunu na loloma, kei na vakacegu, mai vua na Kalou ko Tamada, kei na Turaga ko Jisu Karisito. ² Keitou sa vakavinavinaka tiko lia vua na Kalou ena vukumudou kece lia ni keitou sa cavuti ikodou ena neitou masu; ³ keitou sa yali ni mudu ni nanumia na nomudou cakacaka ena vakabauta, kei na nomudou oca ena loloma, kei na nomudou vosotia ena mata ni Kalou ko Tamada; ⁴ ni keitou sa kila na nomundou digitakia oi kemudou na veiwekani ka daulomani kemudou na Kalou; ⁵ ni sa yali ni yaco vei ikodou na neitou tukutuku vinaka ena vosa loa lia, ena kaukauwa voki lia, kei na Yalo Tabu, ka ni sa vakadinadinataki vakalevu; ni dou sa kila na neitou valavala ena vukumudou ni keitou a tiko vata. ⁶ Ia dou a vakadamurimuri keitou, kei na Turaga, ni dou a vakabautia na vosa e na veivakarawarawataki levu, kei na reki ena Yalo Tabu; ⁷ dou a yaco kinia mo dou nodrai vakarau kece lia era sa vakabautia mai Masitonia kei Akaia. ⁸ Ni sa rogovaki yani mai vei ikodou na vosa ni Turaga ki Masitonia kei Akaia sa yali ni koya loa lia sa yaco voki lia yani nai rogorogo ni nomudou vakabautia na Kalou ki na veiyasana kece lia, a sa yali kinia ni yaga me keitou kaya e dua na ka. ⁹ Ni ra sa tukunia lia ko ira ena vukui keitou nai valavala ni neitou laki tiko vei ikodou, ni dou sa saumakiu mai na veimatakau vua na Kalou, mo dou qaravia na Kalou bula ka dina, ¹⁰ io mo dou warakia voki lia na Luvena mai lomalagi, sa vakaturia cake voki ko koya mai na mate, ko Jisu, o koya sa vakabulai ita mai na cudru sa bera mai.