¹ Honine, apange ahimiwa awa naloela, amwe kunyanyuka no huthsi thzange thzo ufumu, ambushange awa nihima. ² Nalomba Euodia, na Sintike, ci akale o maano ofoci kwa Fumu. ³ Eee, Namilomba, ambushange oshemwa, ci mukwathse ambuyama awa nakwama nange mu evangeli, no kelementi no wahe awa nanikwamanga no, awa anan'oliwa mathzina o mu buka thzo moyo. ⁴ Munyanyuke kwa Fumu shikati shoshihe. Kalo naamba, munyanyuke. ⁵ Mukalelo wenu ouwa ulimukiwe ku anu wahe. Fumu oli popepi. ⁶ Lelo mwabilaela shimweya. Unone, mu enu yoihe ko kulombela no kulomba kokukandelela, mulikishe Nyambi ei mulomba, ⁷ ne kuliyala kwa Nyambi oku kupitelela kuyuvishisha kokuhe, kenge kunyunga micima thzenu no maayalo enu kwa Kilesite. ⁸ Kumanenena, apange, yoihe enu yoshemwa, yoihe enu ilemekiwa, yoihe enu inaloo, yoihe enu yo kukena, yoihe enu ihimiwa, yoihe enu itongoliwa ci iwa, ngeci koili enu yoiwa nene, ngeci koili enu ei iloela kushangaliwa, muanekele ei enu. ⁹ Enu munalifundisha no kutambula no kuyuva no kumona kukwange, muikwame, ne Nyambi o kuliyala kenge akala nenu. ¹⁰ Ninanyanyuka nene kwa Fumu mukonda honi kuhula munahukela kunivuluka. Yoshemwa kunyima kuma namunivulukanga, unone kuma namupili shivaka sho kunikwathsa. ¹¹ Kaniambile ei ci mukonda nafota ci munikwathse. Mukonda ninalifundisha kutambula enu ipi nji ipi muikalelo ouhe. ¹² Nalimuka ci kukala shihutu ne ine, ne kalo nalimuka ci kukala no enu yoingi ne ine. Mu enu yoihe no mumukalelo ouhe ninalifundisha kulya shuwana no kukala no njala, nomu mokukalela no enu yoingi no mokukale ko kupila enu. ¹³ Natwesha kukwama enu yoihe ko aye oyu nanitanalishanga. ¹⁴ Shanga kengeyo, kuma namukwama shuwana ou namunikwathsa mu ukalu nanikala. ¹⁵ Amwe aka Filipi mwalimuka ci kumatatekelo o evangeli, ou natundile mu Masedonia, kwithsa keleke ethzi thzanikwathsile mu kupa no kutambula shime yamwe pohuma. ¹⁶ Shanga ou nanikala ku Tesalonika, kuma namutumanga okwathsi kukwange mu enu nanifotanga miendo thzothzingi. ¹⁷ Kali ci nafota shipiwa. Unone, nafota oshuka ou ukulisha ekwama yenu yiowa. ¹⁸ Ninatambula enu yoihe mu ungi, mane no kupitelela. Kuma nanipiwanga shuwana honi pano ninatambula kutunda ku Epafuroditasi enu namutumu. Yanuka shuwana, shitavelo eshi shitawethza no kuloela Nyambi. ¹⁹ Nyambi kenge wange kenge akumipa enu yoihe mufota kuthza ko lufumo lwenji mu kutethzima kwa Kileaite Jesu. ²⁰ Honi kuliyala no kutethzima ikale kwa Nyambi no Tata wetu kokukana kupwa. Ameni. ²¹ Muvumenene wahe anu a Nyambi okukena ko Fumu Kilesite Jesu. Apetu awa ali nage amivumenena. ²² Wahe anu a Nyambi okukena awa ali kuno amivumenena, manene aka njiyo thza Sesare. ²³ Shihemo sha Fumu Jesu Kilesite shikale no mupepo wenu.