¹ Ngeci po kokuli kutongweliwa kwa Kilesite, ngecipo kokuli kuhenga hengiwa ko shihemo, ngeci po muli pofoci mupepo, ngeci po kokuli kuyuvela n'eke no kuliyuvela kukola, ² nehoni muyalishelele shinyanyu shange kokwikala ofoci, kulishoka mushihemo, kuli wana mu mupepo, no kukala ne an'eke layafoci. ³ Lelo mwa kwama yo kulihima mwa shinda nji kulihima ko kupitelela, kokulihusha pashi mulimuke ci aenjenu po amipita. ⁴ Munu no munu apakele pohuma maano kwei afota ye, unone amamele nei afota aenjenji. ⁵ Mukale no maayalo amwe mwa shinda eci ayakalile nao Kilesite Jesu, ⁶ oyu, wa kalile mu shihanga sha Nyambi, ka ayalile cinga alishoke na Nyambi koku otela. ⁷ Unone, kuma alihushile pashi no kuli pilula eci mupika, no kunelekiwa eci omu tuna kalelanga twanu. ⁸ Kuma alihushile pashi no kuli paka kutwala ku kufa, shianga kufa kopa mbinda! ⁹ Nehoni Nyambi naye ayepo mukulisha, no kumupa lithzina lyo shokulu peulu thzo mathzina o ahe, ¹⁰ ayepo kwama kengeyo kuningaci kolithzina lya Jesu linwi no linwi likinyame, manwi awo ali kuwilu nawali pano pashi kupakapo nawali mushi thzo litunga. ¹¹ Ayepo kwama kengeyo kuningaci lulimi no lulimi luambe eci Jesu Kilesite po Fumu, ko kutethzima kwa Nyambi Tata. ¹² Unone honi, amwe nahima, eci omu munani yuvelanga, kalingwa ci hime okunilipo unone muniyuvelange no kunina pili ko, mulifotele yo kuyoishiwa kwenu oku muli no wowa noku tutuma. ¹³ Mukonda Nyambi yoliyo kwama mukaci kenu kuninga ci muhime no kukwama omu ashimena ye. ¹⁴ Mukwame enu yoihe kokukana kutotona nji ku kanana ¹⁵ kuninga ci katele mushwauliwe ne mukale owakenu, ana Nyambi oku kane kushwauka mukaci komi kuta thzothzi mango, omu muwethzila eci liyeye mu kaye. ¹⁶ Muikalelele mu liywi lya myoyo kuninga ci mu liyuwa lya Kilesite wangu na kulishangale eci kana cilile no kukwamena yo tumbako. ¹⁷ Ambene shanga ci ni kwamiwe shipiwa koku nitenda shitavelo ko elombelo yo shitawo shenu, na a nyanyuka no kuloela nenu mwaheno. ¹⁸ Ko likun'wa lyafoci namwe mwa loela kunyanyuka no loelela nange. ¹⁹ Unone na kulupela ci ko lithzina lya Fumu Jesu ci nitume Temotea cinga akeye kukwenu pano pano, eci name nitanale ou nakuma yuva yenu. ²⁰ Mukonda kanili no yumweya kalo okupitula eci aye, ayepo yoliyo nani loela. ²¹ Mukonda wahe po afota tango enu yo, kali ya Jesu Kilesite. ²² Ambene namwe muna limuka ci yoliyo loela, mukonda eci mwana oyu lina Tata wenji, ne nakwama nange muku amba maywi oawa. ²³ Pano na ayala cinga ni mutume wangu wangu kokumona enu omu iendela kuno. ²⁴ Ambene name nakulupela kwa Fumu eci ame ni keye oko wangu wangu. ²⁵ A mbene na anekela eci kuli nawa eci nitume Epafuloditasi ci ahuke kukwenu. Ayepo mwapange nayepo wekwama eci yame kalo liswalale, kalo yoliyo mupolisa wenu noo mupika mwi kwa einifota, ²⁶ mukonda na nyanda nene, noku milula eci akale nenu mwahe, mukonda namuyuvu ci nakolo. ²⁷ Yo shemwa nakolo nene no kufota kufa. Ambene Nyambi ayepo muyuvela n'eke, kalo kali yofoci pohuma, ano name kengeyo, kuninga ci tele nikale no likando pa likando limweya kalo. ²⁸ Eyepo yoliyo ei nifotela nene ci ni mutume, kuninga ci apa mu mumona wangu nga muloelele, eci ni ikale ko no likando lyolipu. ²⁹ Mumutambule epafuloditasi mulithzina lya Fumu ko shinyanyu shoshihe. Mulemeke anu okuli pitula eci aye. ³⁰ Ei yaletile kengeyo po ekwama ya Kilesite yamu hengenishile popepi no kufa. Shime a engenine mulikando ci ani yoihe noku yalishelela ei mwa palelile kukwama mwilombelo kukwange.