¹ Yesu watundile kumutambila wa Jundiya nakuya kulifuti lya muthambwa lya ndonga ya Jondau, cho mbunga yakama yethzile kuli ikeye lalo. Cho wa balongethile lalo, ngwe muje mwa kele na kuchilingamo. ² Cho bafaliseo bethzile kuli ikeye naku mwethzeka cho ba mwihwile ngwabo, "Banachitabetha munalume kukondola munakathzi wendi?" ³ Wabakumbulwile ngwendi, "Mashiko muka Mosesa wa myanene?" ⁴ Ba mukumbulwile ngwabo, "Mosesa wanene lithetha munalume kusineka mukanda wa kuthsiya bulo na kukondola munakathzi." ⁵ " Ha mulonga wakukaluwa kwa bimbunge byeni mukemwo wami sonekelele eli lishiko," Yesu wendekele kuli bakebo. ⁶ "Oloni kutunda hathimbu ya kutanga cha kulibanga, 'Njambi watangele munalume na munakathzi.' ⁷ 'Hamulonga wechi munalume akathethza baishe na baina kukalipandakana na munakathzi wendi, ⁸ aba babali bakapwa mubila umo,' Cho aba kethi lalo babali, oloni mubila umo. ⁹ Cho bene chije Njambi na pandakana hamo, kethi munu umo akachipangunune." ¹⁰ Omwo bakele munjibo, bandongethi bamwihwile lalo ha chuma bene echi. ¹¹ Cho wendekele kuli bakebo ngwendi, "Uje woshe athsiya bulo bwendi na kwambata munakathzi weka nalingi bupangala nendi. ¹² Ngwe munakathzi lalo athsiya bulo bwendi na munalume wendi nakushomboka kumunalume weka, nalingi bupangala." ¹³ Cho banehele banike babandondo kuli ikeye linga abakabeke maboko, oloni bandongethi bababindikile. ¹⁴ Omwo Yesu wa mwene echi, walubalele cho wendekele kuli bakebo ngwendi, "Tabetheni banike babandondo beje kuli yange, kethi mubabyanethe, mwafwa bumwene bwa Njambi bunapu bwa baje banapu ngwe bakebo. ¹⁵ Mwa busunga njimileketha ngwabo, owo woshe kakatambula bumwene bwa Njambi kupwa ngwe mwanike wamundondo kakabukobela." ¹⁶ Cho wajundwile banike mu maboko endi na kubakwithula omwo wabakabekele maboko endi. ¹⁷ Omwo waputukile bungenthzi bwendi, munalume wamushatukilile na kukamuthsikamena nakumulomba, "Mulongethi wamubwa, bika njinapandela kulinga ngechi njikawane mwonyo wa myaka yoshe?" ¹⁸ Yesu wendekele ngwendi, "bika unjitumbwila kupwa wa mubwa? Wahi wa mubwa kubamga Njambi likalyendi. ¹⁹ Wathzibuka mashiko: 'Kethi uthsiye, kethi ulinge bupangala, kethi ukebe, kethi ukapwe njiho wa makuli, kethi uka kwithe, thingimika baisho na banyoko.'" ²⁰ Uje munalume wendekele ngwendi, "Mulongethi, ebi byoshe byuma yange njabinyungu kutunda ku bukwenje bwange." ²¹ Yesu wamukengele cho wa muthzemene. Wendekele kuli ikeye ngendi. "Kuli chuma chimo chiunajeneka. Yakalandethe byoshe ulinabyo cho ukane baje bihutu, cho ukakala na bufuko mwilu. Cho wije, unjikabangeye." ²² Oloni hakuthiba maji awa washolokele kuli nyenga cho waile nabuthiwa, mwafwa ikeye wakele na bufuko bwabwingi. ²³ Yesu wakengele kuli bandongethi bendi cho wendekele ngwendi, "Chachikalu kuli bampite kukakobela mu bumwene bwa Njambi!" ²⁴ Bandogethi bendi balikomokelele omu bathzibile majwi endi. Oloni Yesu wendekele kuli bakebo lalo, "Banike, chapwa chakukaluwa kukakobela mu bumwene bwa Njambi! ²⁵ Chachathi ngamele kukobela mulisho lya nguya kubyana mpite kukobela mubu mwene bwa Njambi." ²⁶ Boshe balikomokelele cho bendekele kuli umo na mukwabo, " Kumani iyajo akoboka?" ²⁷ Yesu wabakengele nakwendeka ngwendi, "Ku banu chapwa chachikalu, oloni kucha kawile kuli Njambi. Mwafwa byuma boshe byapwa byabyathi kuli Njambi." ²⁸ Petulu waputukile kwendeka nendi, "Kenga, tunathethza byuma byoshe nakukukabangeya." ²⁹ Yesu wendekele, "Mwa buthunga njimileka, kukwethi umo uje akathethza njibo nambe bandolome nambe bandokathzi nambe baina nambe baishe nambe bana bendi nambe mahya hamulonga wange na muthzimbu wa ubwa. ³⁰ Iya kakatambula manene byabingi kutubakani chita muno mukayi: binjibo na bandolome nambe bandokathzi nambe bainabo nambe bana nambe mahya, natuyando, na mulifuti likeja, mwonyo wa myaka yoshe. ³¹ Oloni babengi bakakulibanga bakapwa bamanethelelo, na bakakukotokela bakapwa bakakuli banga." ³² Bapwile mungila nakuya ku Yelusalema, cho Yesu wakele kulutwe lyabo. Bandongethi bendi balikomokelele, na baje bakele nakumukaba bathibile lyoba. Cho Yesu watwalele likumi na babali kwa likalyabo lalo na kubaleketha bika ololo bikalingiwa kuli ikeye, ³³ "Kenga, tukinakuya kweta naku Yelusalema, na munamunu baka mwaka mumaboko aba bakulunu bakakulombelela na bakakusoneka ba majwi a mashiko. Bakamwangwila kuthsa naku mwaka maboko aba ka lifuti. ³⁴ Bakamushaula, nakumu jekwila mate, kumu mwakula, na kumuthsiya. Oloni hanima ya matangwa atatu akathaguka." ³⁵ Yakomba na Yowano, bana ba Zembendiya, bethzile kuli ikeye na kumuleketha ngwabo, "Mulongethi, tushaka utulingile byoshe bije tukulomba." ³⁶ Wendekele kuli bakebo ngwendi, "Bika mutonda linga yange njimilingile?" ³⁷ Cho bendekele ngwabo, "Tutabethe tukatumame nobe mubunpahu, umo kuli liboko lya chilyo na umo lalo kuliboko lya chimoshwe." ³⁸ Oloni Yesu wabakumbulwile ngwendi, "Kumwa thzibukile yeni bimuli nakulomba. Mwatha kunwa munganja ije njika nwinamo nambe kusimpa kumbwitika kuje banjimbwitika nacho?" ³⁹ Bendekele kuli ikeye ngwabo, "Twatha." Yesu wendekele kuli bakebo ngwendi, "Nganja ije njikanwa, neni mukainwa, na kumbwitika chije banjimbwitikile naco, neni lalo bakamimbwitika. ⁴⁰ Oloni iya akatumama kuli boko lya chilyo nambe kuliboko lyange lya chimoshwe kethi nthzili yange yakwangula, oloni chinapu chabaje banaba bwahethila." ⁴¹ Omwo baje likumi lya bandongethi bathibile majwi awa, baputukile kulubalela Yakomba na Yowano. ⁴² Cho Yesu wabathanene boshe beje kuli ikeye na kwendeka ngwendi, "Mwathzubuka ngweni baje bakakuyula Bakamafuti bakaba lyatelela, cho lalo baje bakulunu ba kulutwe baka sholola binzhzili hali bakebo. ⁴³ Oloni echi kuchikalifu neni embwe. Cho woshe uje ashaka kupwa wakama hakati keni napande kupwa ndungo, ⁴⁴ nauje woshe hakati keni atonda kupwa wakulibanga napande kupwa ngamba yaboshe. ⁴⁵ Muna munukethzile linga bamupangele, oloni kupangela, nakwana mwonyo wendi ha kupatuka kwa babengi." ⁴⁶ Cho bethile ku Yeliko. Omwo bathethzele Yeliko hamo na bandongethi na mbunga yakama, muna Timeo, Mbatimeo, kapuputwa mukakulomba, watumamene kungila. ⁴⁷ Omwo wathzibile ngwabo Yesu waku nazaleta, washangumukile kutambakana ngwendi, "Yesu, muna Ndaviti, njithzibileko chikeketima!" ⁴⁸ Babengi bamubindikile uje kapuputwa, kumuleketha linga oloke kulu. Oloni watambakanene manene nene, "Muna Ndaviti, njithzibile chikeketima!" ⁴⁹ Cho Yesu wemanene nakubaleketha linga bamuthane. Bamuthanene uje munalume wakapuputwa, wendekele ngwendi, "Thimpa! Imana! Ali nakukuthana." ⁵⁰ Cho wombilile chithalo chahelu wendi, cho wemanene, nakuya kuli Yesu. ⁵¹ Yesu wamukumbulwile na kwendeka ngendi, "Bika utonda yange njikulingile byo?" Cho uje munalume wakapuputwa wendekele ngwendi, "Molongethi, Njishaka ngechi njimone lalo." ⁵² Cho Yesu wendekele kuli ikeye ngwendi, "Ya. Kukulahela chobe china kukangwitha." Haje bene watonene lalo, nakumukaba mungila.