¹ Mwami wakaita Mozesi okwambola anguwe kuzwa kutente lyokuswananina, okuti, ² ''Ámbila bantu ba Isilayeli okuti, 'Na kuli muntu akati kenu uyanda kwetela mwami cipaizyo, amwete zipaizyo zya banyama, kufumbwa kuzwa ku ngombe nenga mbelele. ³ Na cipaizyo cakwe cokutenta nce ngombe, ulelede kupa mupoho utakwe kampenda, Ulelede kutula kumulyango wetente lyokuswananina, kuti citambulike ku mwami. ⁴ Abike janza lyakwe amutwe wecipaizyo cokutenta, mponyina cilatambulika okuyo gwisya milandu yezinyonyono zyakwe. ⁵ Mponyina ulelede kujaya poho kunembo lyo mwami. Bana ba Aloni, a bapaizi, bakatambule bulowa o kubusansaila acipaililo cili kumulyango wetente lyokuswanganina. ⁶ Mponyina akafunde cipaizyo citente okucitendola muzitulituli. ⁷ Mponyina bana ba Aloni a bapaizi babike mulilo acipaililo okubamba nkuni omulilo. ⁸ Mponyina bana ba Aloni, a bapaizi nibayobika zituli, kubikilizya o mutwe antomwi a mafuta, atala enkumi zili amulilo uli a cipaililo. ⁹ Pele zyomukati amaulu azyo welede kuzisanzya a manzi. Mponyina mupaizi uyo tenta zyeense acipaililo kuti zibe cituzyo citentwa, ciyo kwizya kununkilila kubotu kuli mebo ciyoba cituzyo capangwa kuli mebo co mulilo. ¹⁰ Na cituzyo cakwe cokutente cizwa kumbelele, yomwi yembelele nenga yomwi ye mpongo welede kusala mujembwe wakwe kapenda. ¹¹ Welede kumujaya kulubazu lokunyika lwecipaililo kunembo lyo mwami. Bana ba Aloni, a bapaizi, basansaile bulowa bwakwe kumabazu eense acipaililo. ¹² Welede kutimbula muzipanzi antomwi omutwe a mafuta ayo, mponyina mupaizi acibike atala enkuni zili amulilo uli acipaililo. ¹³ Pele zyomukati antomwi amaulu welede kuzisanzya amanzi. Mponyina mupaizi acipaizye ceense, acitente acipaililo. Cibe cituzyo citentwa cikanwisye kununkilila kabotu ku mwami; ciyoba cipaizyo capangwa kuli nguwe comulilo. ¹⁴ Na cituzyo cakwe kumwami cokutenta bayuni, pele welede kweta cituzyo cenziba na nkana kenkwilimba. ¹⁵ Mupaizi welede kukaeta kucipaililo, akanyongolwede mutwe, okutenta acipaililo. Mponyina bulowa bwakwe bwelede kubungwisya anze kumbazu lye cipaililo. ¹⁶ Welede kugwisya ciyangilo amababa ayo, okuzisowela kulubazu lokujwe lwe cipaililo, oko kubikwa dota. ¹⁷ Welede kwikwamona katagwisyi mababa ayo, pele atazyabani muzibela zyobile mponyina mupaizi acitente acipaililo, ankuni zili amulilo. Cibe cituzyo citetwa, mponyina cilagwisya kunungilila kubotu ku mwami, ciyoba cituzyo capangilwa nguwe co mulilo.