¹ Lomba pa siku la twenti folo la mwezi wamene uyo banthu ba Israeli besonkhana ndipo benzosala kulya, ndipo benze bevwala vovwala va nsaka, ndipo benze beika lukungu pamitu pao. ² Bana ba Israeli bezipautla beka ku alwendo onse. Bepanama na kuulula macimo bao onse na viipa venzocita makolo bao. ³ Beimilira mu malo mwao, kwa limozi la magao folo ya siku bebelenga mu buku la cilamulo ca Yehova Mulungu wao. Na gao liyakine la magao folo la siku benzoulula na kubelamira pansi pamenso pa Yehova Mulungu wao. ⁴ Alevi, Yesuwa, Bani, Kadimieli, Sebaniya, Buni, Serebiya, Bani, na Kenani, bepanama palulu ndipo bekuwa na mau okweza kwa Yehova Mulungu wao. ⁵ Ndipo a Levi, Yesuwa, na Kadimeli, Bani, Hasabineya, Serebiya, Hodiya, Sebaniya, na Petahiya beciti, "panamani na kupeleka mayamiko kwa Yehova Mulungu wanu kwa nthawi zonse." "Lekani badalise zina lanu la ulemelero, ndipo likwezewe palulu pa daliso lililonse na mayamiko. ⁶ Nimwe Yehova. Mweo mweka. Mwepanga kululu, na kululu ngako, na gulu lao lonse na calo capansi na vonse vili mwamene, na nyanja zonse na vonse vilimo. Mwevipasa moyo vonse, na gulu la kululu lupembeza mweo. ⁷ Nimwe Yehova, Mulungu esankha Abram, na kumufumya mu Uri wa Alkadayo, na kumpasa zina lakuti Abraham. ⁸ Mwepeza kuti mtima wake ni okhulupilika pamenso panu ndipo mwepanga naye cipangano kuti mupase bana bake calo ca Kanani, ba Hiti, Amori, ba Perizi, ba Yebusi na ba Girigasi. Mwasunga lonjezo lanu pakuti nimwe olungama. ⁹ Mweona mazunz ba makolo basu mu Aigupto ndipo mwecimvwa kulira kwao pa nyanja isweta. ¹⁰ Mwepeleka vizindikilo ndipo vodabwisa vosusha Farao, na banchito bake onse, na pa banthu ba mcalo mwake. Pakuti mweziba kuti Aigupto becita mizikuza pa beve. Koma mwezipangira mweka zina limene lilipo mpaka lero. ¹¹ Ndipo mwegaba nyanja pamenso pao, koteto kuti beloba pakati pa nyanja pa nthaka yoyuma, na kubaponya bala benzobakonkha konoka, monga mwala m'manzi yonoka. ¹² Mwebasogolera na makubmi mzuba, na muliro usiku kuti ubasanikirw mnjira pakuya. ¹³ Palupili na Sinai mweseluka ndipo mwelabira nao kucokera kululu na kubapa maweruzo olungama na malamulo achendi, malemba abwino na malamulo. ¹⁴ Mwebazibisha sabata lanu lituba, ndipo mwebasa malamulo na malemba na cilamulo kupitila mwa Mose mtumiki wanu. ¹⁵ Mwebapasa buledi kucokera kululu wa njala yao, na manzi kufumila mu mwala ba njota yao, ndipo mwenena kwa beve kut balobe na kulonda calo cimwelumbilila buapasa. ¹⁶ Koma beve na makolo ba becita maozikuza, ndipo beyumisha mikosi yao ndipo baliye mvwile malamulo banu. ¹⁷ Bekana kumvwa, ndipo baliye ganizire vodabwisha vimwecita pakati pao, koma beyumisha mikosi, ndipo mkuukira kwao besankha msogoleri kuti bawelele ku ukapolo. Koma nimwe Mulugu ozula na cikhulupiliro, wacisomo na wacifundo, ocelwa kukalipa, ozula na cikondi muliye basiye. ¹⁸ Olo pala pabezipangila mwana wa ng'ombe woyenga na kuti, 'uyu niye Mulungu wanu wamene emufumyani mu Aigupto,' ndipo becita vopepusa vikulu, ¹⁹ mweo, mu cifundo canu, muliye basiye mcipululu. Mkumbi wobasogolera pa njira uliyebasiye mzuba, olo muliro usiku wobasanikira panjira kuti babekuya. ²⁰ Mzimu wanu wabwino mwebapasa kubalangiza, na mana banu muliyebatane pakamwa pao, na manzi mwebapasa pa njota yao. ²¹ Kwa vyaka fote mwebasamalira mcipululu , ndpo baliye sobe kanthu, vovwala vao viliye sile na mendo bao baliye vimbe. ²² Mwebapssa maufumu na banthu, mwebagaba ku mbali zonse za calo. Ndipo belandira calo ca Sihoni mfumu ya Hesiboni na calo ca Ogi mfumu ya Basani. ²³ Mwebapakisha bana bao monga ni nyenyezi za kululu, ndipo mwebaleta mu calo cimweuzya makolo bao kulobamo na kulonda. ²⁴ Teto banthu beloba na kulonda calo cila ndipo mwebagonjesa pamenso pao bankhala calo ca mcalo cila, ba Kenani. Mwebapasa beve m'manja mwao, na mafumu bao na banthu ba mcalo cila, kuti Israeli acite nao mwangafunire. ²⁵ Ndipo belonda mizinda yocingililiwa na calo cotwala, na kulonda mangánda yozula na vinthu vonse vabwino, visime vokumba kale, minda ya mpesa na minda ya azitona, na vimiti va vipaso vinyinji. Teto becilya na kukuta na kuna ndipo besangalashiwa mu kuwama kwanu. ²⁶ Ndipo becizonkhala osamvwa na kukuukilani mweo. Betaya cilamulo canu kuvuli kwao. Bepaya aneneri enzobacenjezya kuti bawelele kwanu, ndipo becita vopepusha vikulu. ²⁷ Teto mwebapeleka m'manja mwa adani bao becitisha kuti bavutike mu nthawi ya kuvutika kwao, belira kwa mweo, ndipo mwebamvwa kululu, ndipo cifukwa ca cifundo canu cikulu mwebatumira obapulumusha amene ebapulumusha m'manja mwa adani bao. ²⁸ Koma pebepumula, becita soti viipa pamenso panu, ndipo mwebasiya m'manja mwa adani bao, teto adani bao bebalamulira. Koma pebewelera na kulira kwa mweo, mwecimvwa kululu, ndipo kanyinji cifukwa ca cifundo canu mwebapulumusha. ²⁹ Mwebacenjezya kuti bawelere ku cilamulo canu. Koma becita mozikuza ndipo baliyekumvwe malamulo banu. Becimwira malamulo banu bamene opasa moyo kwa aliyense obamvwila. Bekana phewa lao na kuyumisha mikosi yao na kukana kumvwa. ³⁰ Kwa vyaka vinyinji mwebalekelera na kubacenjezya mwa mzimu wanu kupitila mwa aneneri, koma baliye kumvwe. Teto mwebapeleka m'manja mwa banthu ba mvyalo. ³¹ Koma mcifundo canu cikulu muliye baonongeletu olo kuataya, pakuti nimwe Mulungu cifundo na cisomo. ³² Lomba mwa ici, Mulungu wasu- mweo mkulu, wamphamvu, ndipo wabwino musunga cipangano na cikondi- musalore kuti kuvutika konse uku kuoneke kutontho kwa mweo kwamene kwawela pa seo, pa mafumu basu, pa asogoleri basu, pa bansembe basu, na pa aneneri basu na pa makolo basu, na pa banthu onse kuyambira m'masiku ba mafumu ba Asuri mpaka lero. ³³ Nimweo olungama pa vonse vawela pa seo, pakuti mwacita mukhulupilika, koma tacita ciipa. ³⁴ Mafumu basu, asogoleri basu, bansembe basu, na makolo basu baliyesunge cilamulo canu, olo kumvwera malamulo banu olo cipangano cemwelabila na camwebacenjezyelako. ³⁵ Olo mu ufumu wao, pebenzosangalala mu kuwama kwanu kukulu kwa beve, mu clo cikulu na cotwala cemweika pamenso pao, baliye kutumikireni olo kuleka ciipa venzocita. ³⁶ Lomba nise akapoo mu calo cimwepasa makolo basu kuti balye vipaso vake na mphaso za zabwino. Lomba onani, nise akapolo muno! ³⁷ Vufuma mcalo vabwino vikuya kumafumu bamweika pa seo cifukwa ca macimo basu. Bolamulira pa mibili yasu na vibeto vasu mwangafunire. Tili mcisauso cikulu. ³⁸ Cifikwa ca vonse ivi, tupanga cipangano conkhazikika molemba, pa colemba cosindikizyika pali mazina ba aogoleri basu, a Levi na bansembe."