¹ Lomba, anekwasu tipemphelele kuti mau ba Ambuye afulumijye nakupasiwa ulemelelo, monga mwacili na mweo. ² Nakuti tikamasuliwe ku banthu osalungama na bayipa, ndaba nionse lini bali nacikhulupililo. ³ Koma Ambuye ni okhulupilika, wamene wati akukosesheni na kukulondeshani ku muyipa. ⁴ Koma tili na cisimikijyo mwa Ambuye za mweo kuti mweo monse mukacite na kupitilijya kucita vinthu vatulamulila. ⁵ Lekani Ambuye asogolele mitima yanu ku cikondi ca Mulungu na cipililo ca Kristu. ⁶ Lomba tukulamulilani mweo, anekwasu, mu zina la Ambuye wasu Yesu Kristu, kuti mupewe mnekwanu oyenda mosasamala na kusankhala monga mwa midauko yemwelandila kwa seo. ⁷ Pakuti olo mweo muziba, nicabwino kuti mukotiyeselela seo ndaba tenze lini nkhezi tyala petenze na mweo. ⁸ Tiliye kulye vakulya va munthu aliyense cosalipila koma tegwila nchito usiku na mzuba mu nckito yamucisausho, kuti tisankhale katundu olemesha kwa aliyense. ⁹ Tecita ici, osati ndaba tiliye ulamulilo, koma tecita ici kuti tinkhale cisanzo kwa mweo, kuti mukatiyeselele. ¹⁰ Pakuti petenze na mweo, tekulamulilani, "Wamene asafuna kugwila nchito asalye." ¹¹ Pakuti tikumvwa kuti pakati panu bayakine oyenda mu ulesi, ogwila lini nchito, koma nima thupi yaulesi. ¹² Lomba oteto tulamulila nakudandaulila mwa Ambuye Yesu Kristu, kuti bakogwila nchito mwacete-cete nakulya vakulya vao-vao. ¹³ Koma mweo, anekwasu, osabeba pakucita vabwino. ¹⁴ Ndipo ngati m'mozi wa mweo omvwela lini mau basu bali mu kalata iyi, mumuzibe uyo ndipo osayanjana naye, kuti akamvwe soni. ¹⁵ Koma musamuyese mdani, koma mumucenjejye monga mnekwanu. ¹⁶ Lomba lekani Ambuye wa mtendele mwine akupeni mtendele mu nthawi zonse ndipo na munjila zonse. Ambuye abe namwe monse. ¹⁷ Neo, Paulo, nulemba ivi na kwanja langu, niyecizindikilo pa kalata iliyonse yanalemba. ¹⁸ Cisomo ca Ambuye wasu Yesu Kristu cibe namweo monse. Ame.