¹ Lomba zakuwela kwa Ambuye wasu Yesu Kristu na kusonkhanishiwa kwasu kuyonkhala na yeve, tukusengani mweo anekwasu, ² kuti osati mukogwendezeka patontho mu maganizo banu olo kapena kuvutika, mumzimu olo kapena mu uthenga, kapena kalata yuoneka monga yucokela kwa seo, mungati siku ya Mulungu yafika kale. ³ Munthu aliyense asakunyengeni mweo munjila iliyonse, pakuti ikawele lini mpaka kupatuka kukawele, na munthu osasunga lamulo akaonekele, mwana wa cionongeko. ⁴ Uyu niyewamene osusha nakuzikujya pa vonse vuitiwa kuti Mulungu olo vila vupembezewa. Cokonkhapo, onkhala mu kachisi ya Mulungu nakuzioneshela monga ni Mulungu. ⁵ Mukumbukila lini kuti penenze kwa mweo nekuujyani ivi vinthu? ⁶ Lomba muziba cumulesha yeve kuti akaonekele pa nthawi ya bwino. ⁷ Pakuti cisinsi ca kusasunga lamulo cegwila kale nchito, tyala ndaba pali omulesha yeve lomba mpaka pati akamfumye munjila. ⁸ Ndipo osasunga lamulo akaoneshewe, wamene Yesu Kristu akampaye na mpweya wapa kamwa kake na kumsilijya na kuoneshwa kwa kuwela kwake. ⁹ Kuwela kwa osasunga lamulo ku kacitike cifukwa ca nchito za satana na mphamvu zonse, na vizindikilo, na vodabwisa vawenye, ¹⁰ na viyipa va mtundu ulionse vuononga bala ocenekeka pakuti baliye landile cikondi cacendi kuti bakapulumuke. ¹¹ Kamba ka ici Mulungu obatumijyila macitilo otaikisha kuti akakhulupilile wenye. ¹² Koteto kuti onse bakaweluziwe bala baliye khulupilile cacendi koma benzokondwela mucosalungama. ¹³ Koma tikoyamika Mulungu nthawi zonse kamba ka mweo, anekwasu okondewa na Ambuye, pakuti Mulungu ekusankhani mweo monga vipaso voyambilila kupulumuka mwa kutubishiwa na Mzimu na kukhulupilila mu cacendi. ¹⁴ Ekuitani kwa ici kupitila mu uthenga wasu, kuti mukalandile ulemelelo wa Ambuye Yesu Kristu. ¹⁵ Moteto, anekwasu panamani nakukatilila ku midauko yemwephunzisiwa, olo mwa mau, olo mwa kalata. ¹⁶ Lomba Ambuye Yesu Kristu mwine na Mulungu Atata, etikonda nakutipasa cisangalalo cosasila na ciyembekezo cabwino mwa cisomo, ¹⁷ akusangalasheni na kulimbikisha mitima yanu mu nchito iliyonse yabwino namu mau.