¹ Kumatatekelo kwalile liywi, ne liywi kuma lyakalile kwa Nyambi, ne liywi po neli Nyambi. ² Oyu kumatatakelo kuma akalile na Nyambi. ³ Enu yoihe kuma yakwmahalile kukwenji, kalo yahi yakwamahalile kokupila aye. ⁴ Moyo kuma wakalile kukwenji, ne moyo wakalile mwethzi wa anu. ⁵ Mwethzi wa munyeka mu milema, ne milema kanathzikwangisha mwethzi. ⁶ Kwakalile munu atumine Nyambi, lithzina lyenji Joani. ⁷ Kuma akeile mu upaki kunapaka yo mwethzi, ci anu wahe alitawe mulivaka lyenji. ⁸ Joani kali liyoyo nakala mwethzi, uone kuma akeile kunapaka yo mwethzi. ⁹ Mwethzi o shemwa, ou upa mwethzi kwa anu wahe kuma naukeya mu kaye. ¹⁰ Wakalile mu kaye, kalo kaye kuma kakwamahalile mu livaka lyenji, ne kaye kanakamulimuka. ¹¹ Kuma akeile kwa anu enji, ne anu enji kanamutambula. ¹² Unone wahe namutambula , awa nalitawa mu lithzina lyenji, onawapa maci thzo kupiluka ana Nyambi. ¹³ Awa kana elekiwa mu unyinga nji shanga mu kuhima ko munu, unone mu kuhima kwa Nyambi. ¹⁴ Liywi alyopo lipiluka nyama no kunakala netu. Tunamono kutethzima kwenji, kutethzima kwenji aye yofoci lika tunda kwa Tata wenji, kunayala shihemo no shemwa. ¹⁵ Joani kuma apakile yenji no kukuwelela, kuamba ci, ''Oyu yoliyo nambile ci, 'Oyu nikeya munyima oli no okolo kunipita, mukonda kuma akalileko ame konishime.''' ¹⁶ Mukonda mukukalako kwenji twaheno tunatambula shihemo shilundeka pa shihemo. ¹⁷ Mukonda mulao shime wapiwile kutundelela kwa Mushe. Shihemo no ushemwa kuma yakeile kutundelela kwa Jesu Kelesite. ¹⁸ Wahi wamona po Nyambi; yoliyo Nyambi lika, oyu li kunyonga thza Tata wenji, yoliyo namutulimukisha. ¹⁹ Ou woliyo upaki wa Joani ou Majuda natumu a pulisita no a livi kutundelela ku Jelusalema kunamuipula ci, ''Yowe elye?'' ²⁰ Ayepo wambela- kahamulile, unone kuma awa ambelile- ''Kali yame Kelesite.'' ²¹ Honi awopo amuipula, ''Ne honi yowe elye? Yowe Elia nji? Ayepo amba, ''Kali yame.'' Awopo amba, ''Yowe mupolofita?'' Ayepo tawa, ''Kwahi.'' ²² Ne honi awopo amuambela, ''Yowe elye, ci tuwane eshi tukatongwela awa anatutumu? Walitoya ci yowe elye?'' ²³ Ayepo amba, ''Yame liywi, likuwelela mu nlihalaupa: '' Muloishe likun'wa lya Fumu,' eli ambile mupolofita Isaya.'' ²⁴ Honi wamweya kuma awtumine kutunda kwa afalisi, ²⁵ kalo awopo amuipula no kumuambela ci, ''Ine ei okolovethzela ngeci kali yowe Kelesite nji Elia nji mupolofita?'' ²⁶ Joani ayepo watawa no kuambela ci, ''Nakolovethza no meyu. Unone kwali munu nemana mukaci kenu oyu mukana kulimuka. ²⁷ Yoliyo nikeya munyima, iangisho yo makatulo enji kanoloela kuiangulula.'' ²⁸ Ei enu shime yakwamahalelile ku Betania muthsambwa thzo Jodani oku nakolovethzela Joani. ²⁹ Liyuwa eli lyahatileko Joani ayepo mona Jesu kukeya kukwenji ayepo amba ci, ''Mumone, manguana a Nyambi oyu tundisha shivi sho kaye! ³⁰ Oyu yoliyo naniamba ci, 'Oyu nikeya munyima anipita, muokonda yowa tatekila kukalako kukwange.' ³¹ Kanani mulimuka, unone kunakwamahala kengeyio ci amonahale ku Isilaele ci ame ninakeya kunakolovethza no meyu. ³² Joani ayepo paka, kuamba ci, ''Ninamono mupepo ko ulumuka weci likuci litundelela kuwilu, awopo unamukala. ³³ Kanamulimukile, unone oyu nanitumu kunakolovethza no meyu ayepo niambela, 'Oyu wakumona ku ulumukeliwa ko mupepo, yoliyo wakukolovethza no mupepo oukenu.' ³⁴ Ninamono no kupaka ci oyu yoliyo Mwana Nyambi.'' ³⁵ Kalo, liyuwa lyahatile ko, Joani kunemana na afundishiwi enji eli, ³⁶ awopo amona Jesu kupita, ne Joani ayepo amba, ''Mumone manguana a Nyabi!'' ³⁷ Afundishiwi enji eli ayuvile apa namba ei awopo ashupwela Jesu. ³⁸ nehoni Jesu ayepo lishetuka ne ayepo wamona kwamushupwela ayepo waambela ci, ''Ine mufota?'' Awopo atawa, ''Rabbi'' (kokuamba ci ''Mufundishi''), kupi onakalanga?'' ³⁹ Ayepo wambela ci, ''Mukeye namumone.'' Ne honi awopo athza kukamona oku anakalanga; awopo akala nenji mu liyuwa elyo, mukonda shikati kushinga 16:00 lungulo. ⁴⁰ Yumweya kwawa ayuvile Joani kuamba no kushupwela Jesu neli Andreasi, mina Simoni Pitolosi. ⁴¹ Kuma atangile kuwana mukulwenji Simoni ayepo muambela ci, ''Tunawana Mesia''(kokuamba ci ''Kelesite''). ⁴² Ayepo muleta kwa Jesu, ne Jesu ayepo mutaneka no kuamba, '''Yowe Simoni mwana Joani. Kenge oishiwa Kefasi'' (kokuamba ci ''Pitolosi''). ⁴³ Eli lyahatile ko, Jesu ou afotile kuthza Galilea, ayepo wana Filipi ne po muambela ci, ''Onishupwele.'' ⁴⁴ Honi Filipi kuma tundile ku Betania, ku lyumbo lya Andreasi na Pitolosi. ⁴⁵ Filipi ayepo kawana Natanaele ayepo muambela ci, ''Oyu nan'oliwa ko Mushe mu mulao, na apolodita, tunamuwana: Jesu mwana Josefa kutunda ku Nazareta.'' ⁴⁶ Natanaele ayepo muambela ci, ''Koshili shinu shoshiwa shitwesha kutunda ku Nazareta?'' Filipi ayepo muambela ci, ''Okeye nomone.'' ⁴⁷ Jesu ayepo mona Natanaele kukeya kukwenji ayepo muambela yenji, ''Mumone, muka Isilaele oshemwa, oyu ninga ci kukwenji kwithsa kuangela!'' ⁴⁸ Natanaele ayepo muambela ci, ''Ngepi onanilimuka?'' Jesu ayepo mutawa, ''Filipi kushime kukuisha, ou onakalile mushi thzo shitondo sho feiga, shime ninakumono.'' ⁴⁹ Natanele ayepo tawa, ''Mufundishi, omwana Nyambi! yowe Fumu wo Isilaele!'' ⁵⁰ Jesu ayepo mutawa ci, ''Mukonda ninakuambela ci, kuma ninakumono mushi thzo shitondo sho feiga,' walitawa? Kenge omona enu yoikulu kupita ei.'' ⁵¹ Ne honi ayepo amba, ''Yoshemwa, shemwa, nakuambela ci, kenge omona liwilu kolina yanjuluka, no mangeloi a Nyambi kwa ulumuka no kukatunduka peulu thza Mwana Munu.''