¹ Manchela buzuba butaanzhi bwa nsunda bakkeshika ku chuumbwe kuleta utununkiia ntubakabamba. ² Bakayana ibwe lyakavwa achuumbwe. ³ Bakanjila mu chuumbwe pele baina ukoyana mubili wa Jeso. ⁴ Chakachitika bulyo, nibakuchihingilwe chakachitika, balombwana bobile bakazhima ngubakubele mushikobelo shakubeka beka . ⁵ Bakaintu nibakakutiile ukukotama kulanga anshi, bakababuzha ati, "Nchiinzhi nchimukapulila muntu ulanga ku bafwu? ⁶ Temo mono, pele wabushiwa! Amuzhibaluke mbwakamwaambila nakakuchili mu Galilaya, ⁷ kwaamba ati Mwanaa Muntu ulyelele kwaabwa mu matashi a bashishibi ukuyayiwa a chichinkano alimwi ukubuka buzuba bwatatu.'' ⁸ Bakaintu bakazhibaluka mazwi akwe ⁹ bamane bakakuvwa ku chuumbwe ukwambila bashichiiya bali ikumi uwomwi nshibakabona ubamwi boonse. ¹⁰ Inzho Maliya Magadalena, Jowana, Maliya baina Jemusi u bamwi bamakaintu mbakuli abo baka amba makani aza ku batumwa. ¹¹ Pele makani aza akalibonya kubula bulemu ku batumwa, alimwi baina nibakabashoma bakaintu baba. ¹² Pita wakazhimuka ukulukankila ku chuumbwe, nakashika wakoonga ukulanga mu chuumbwe, wakabona shisani kashili shini. Pita ngoona wakaya ku n'ganda yakwe kazowele chakachitika. ¹³ Inzho bamwi bobile buzuba mbubona bobo kabaya ku munzhi utewa ati Emausi, ukwakulampa maile ali makumi chisambomwe kuvwa ku Jelusalema. ¹⁴ Kabaya bubandika chakachitika ¹⁵ Chakachitika bolya, nibakuya bubandika ukulibuzha, Jeso mwini wakabeenzha ukutalika kuya bweendela antoomwi abo. ¹⁶ Pele baina nibakamuzhiba. ¹⁷ Jeso wakababuzha ati, "No nchiinzhi nchimubandika kumwi mulaya bweenda?'' Bakazhima ukuboneka kulemana. ¹⁸ Umwi wabo wakutewa Kileopasi, wakamwiingula ati, "Sa ndiwe iche mu Jelusalema utezhi chakachitika ku mazuba aza?'' ¹⁹ Jeso wakababuzha ati, "Nchiinzhi chakachitika?'' "Shintu shakachitika kwa Jeso waku Nazaleta, uwakakuli mushinshimi mukando chini chini ukuyiisha mazwi a Leza kubantu, ²⁰ alimwi bakombi bakando ubamwi baleli mbubakamupa chisubulo cha kufwa ukumubika a chichinkano. ²¹ Pele twakulangila ati walo inguwe ukanununa bana izilayeli. Eeye alimwi chibaala, ubwasunu mbuzuba bwatatu kuvwa shoonse sheshi nishakachitika . ²² Pele alimwi, bamwi bakaintu uba munkamu yesu bakatuzhinga, kuba ku chuumbwe chifumo fumo. ²³ Nibatakoyana mubili wakwe bakazhoka, ukwaamba ati, bakabona bangelo ubakaamba ati wabuka. ²⁴ Bamwi balombwana mbutwakuli abo bakaya ku chuumbwe bayana ati mbubona mbubakaamba bakaintu. Pele baina nibakamubona.'' ²⁵ Jeso wakabaambila ati, "Umwe nubalombwana balimbushi alimwi nimutafwambaani kushoma shoonse bashinshimi nshibakaamba! ²⁶ Sa kachitali chibotu Kilisito kupenga ku shintu sheshi, limwi ukunjila mu bulemu bwakwe?'' ²⁷ Inzho kutalikila kwa Mozesi alimwi kwitila mu bashinshimi, Jeso wakabapandulwila shintu shimuzeeme ku bulembe boonse. ²⁸ Nibakashika mu munzhi mubakakuya, Jeso wakachita ukoya uchiya buya kumbele. ²⁹ Pele bakamushinikizha balaamba "Kala aswe, ukuti likalebila alimwi buzuba bwamana kale.'' Ubobo Jeso wakaya kukala abo. ³⁰ Chakachitika kwamba, nakakala anshi abo kwaamba alye, wakabweza chinkwa, wachilongezha, wachikomauna wabapa. ³¹ Ngoona menso abo akayuka, bamane bamuzhiba ngoona wazhimingana ku menso abo. ³² Bakalyaambya beni u beni ati, ''Sa myozo yesu ketapyi, nakwaamba kwesu munzhila, lelyo nakuyalula malembe kuli uswe?'' ³³ Bakazhimuka ngoona awo bapiluka ku Jelusalema. Bakabayana bali ikumi u womwi balibungene u babo mbubakuli abo, ³⁴ balaamba, "Mwami wabuka chini chini, alimwi walibonya kwa Saimoni.'' ³⁵ Bakaamba shintu shoonse shakachitika munzhila, alimwi umbuli Jeso mbwakalizhibya mukukomauna chinkwa ³⁶ Nibakuchaamba shintu sheshi, Jeso wakazhima akati lyabo, amane waamba ati, "Luumuno lube kwenu.'' ³⁷ Pele balo bakatilimuka ukuzula bukandu alimwi bakatelaika ati babona shikazwa ³⁸ Jeso wakabambila ati, "Nkaambo nzhi mulapengana? Nkaambo nzhi kulaba mibuzho mu myozo yenu? ³⁹ Amubone matashi angu u matende, kwaamba ndime. Amunkwate mulibonene. Ukuti shikazwa takwete buzani u mafuwa, mbumwambona ume ndikwete.'' ⁴⁰ Nakaamba bobo, wakabatondezha matashi akwe u matende. ⁴¹ Kabatana kushoma nkaambo kakubotelwa, alimwi bakazoowa. Jeso wakabaambila ati, "Sa tamukwete chakulya ?" ⁴² Bakamupa chipanzha cha nswi injike, ⁴³ wakabweza walya kabamulangilile. ⁴⁴ Wakabaambila ati, "Aza ngu mazwi ngundakamwaambila chiindi ninda kakuli amwe, ati shoonse sheshi shakalembwa mu milawo ya Mozesi u bashinshimi alimwi u muntembauzho alyelele kuzuzukizhiwa.'' ⁴⁵ Ubobo wakayalula mizeezo yabo kwaamba bakonzhe kwatelelesha malembe. ⁴⁶ Wakabaambila ati, "Ukuti chililembelwe ati, Kilisito ulyelele kupenga alimwi ukubuka ku bafwu mu buzuba bwatatu. ⁴⁷ Kusanduka ukulekelelwa kwa shibi kulyelele kukambaukwa mwizhina lyakwe ku mashi oonse, kutalikila mu Jelusalema. ⁴⁸ Muli bakamboni ku shintu sheshi. ⁴⁹ Amubone ndamutumina nchakashomezha taata. Pele kamuchishite mu munzhi mukando kushikila mukapewe insana shivwa kwizeulu." ⁵⁰ Amane Jeso wakabasololela kuvwa kushikila nibakuzanda kushika ku Betani. Wakatambika matashi akwe mwizeulu ngoona wabalongezha. ⁵¹ Chakachitika bolya, chiindi nakuchibalongezha, wakabashiya ngoona wakatolwa kwizeulu. ⁵² Ubobo bakamukomba ukupiluka ku Jelusalema balibotelelwe. ⁵³ Chiindi choonse kabayanwa mu chikombelo kulumbaizha Leza.