¹ U bobo, atuchileke kukanana mulumbe wakale kale waka Kilisito iinzho atuya ambele u makani meni meni. Tatweelele kuzhokaukila alimwi ku milimo iifwile alimwi u lushomo mwa Leza, ² naaba matalikilo aa buyiishe bwa lupapatizo, u kwaampa matashi, u kubuka kwa bafwu, alimwi u sha lubeta lwa lyoonse. ³ Tulakachichita chechi a kachihwumizha Leza. ⁴ U bobo chilakatazha kuli babo balo bakataanguna kuzhibishiwa mulumbe, babo bakasola kale chipo cha kwizeulu, babo bakaakuli mulukamantano u Moza Usalala, ⁵ alimwi babo bakasola bubotu bwa mazwi a Leza alimwi iinsana sha musela u chizhiza, ⁶ mbuba ni babo bakachileka--nchizumu kubazhololola alimwi. Chili ukoya kumukankamina alimwi Mwanaa Leza achichinkano lwabo beni, alimwi u kumuubaula antangalala. ⁷ Inshi yezho itambula inhula iwa ku shiindi shoonse, alimwi u kupa michelo ku shisamu shiyohwa babo basebezha inshi--yezhi nji inshi yezho yakatambula shilongezho kuhwa kwa Leza. ⁸ Pele kuti chisamu chazhala meya alimwi u chibangu, ati yabula milimo yaba afwaafwi u kushinganyiwa. Kumamanino nkupiya mu mulilo. ⁹ Pele twalamwa ku twaambo twa shintu shibotu shaamba aali umwe, nubafwunwa, shintu shesho shizaama ku lufwutuko, nikuba kuti twaamba bolya. ¹⁰ Kaambo Leza uliluleme. Takeeluba milimo yenu alimwi u lufwuno ndumwakatondezha kwizhina lyakwe, kaambo mwakahwuna bantu bakwe basalala, alimwi muchibukwete kuya bu bahwuna. ¹¹ Uswe tulazandisha kwaamba ati umwi uumwi wenu a kwatishe kuchita kabotu kuya kushikila kumamanino, kwaamba bulanjizhi bwenu buzuzukizhiwe. ¹² Chechi chili bolya kwaamba ati umwe mutabi bakata, pele mubayiye babo ku lushomo alimwi u bushichamba babo baya kukona shishomezho. ¹³ Lelyo Leza nakapanga chishomezho chakwe kwa Abulahamu, wakapinga lwakwe mwini, kaambo kakwiina umwi u mubaala ngwaakukonzha kubanda mukulipinga kwakwe. ¹⁴ Wakaamba ati, "Ndakulongezha alimwi ndakakupa luhubo lunji lunji." ¹⁵ Muli chechi, Abulahamu wakatambula checho nchaakashomezhewa naakalindila cha bushichamba. ¹⁶ Bantu balapinga kuli umwi u babaala. Kumamanino a kuzwangana kwabo, kulipinga kulamanya kuzumanikizhanya koonse. ¹⁷ Inzho Leza naakazanda kubatondezha atuba babo baya kukona ku chishomezho kwaamba ati takachichincha chishomezho chakwe, checho nchaakapa mu kupinga. ¹⁸ Wakachita bolya ku shintu shobile shitachinchiwa--nchizumu kwakwe Leza kuchenga--uswe, nitwakaya kulishisha kwakwe, tulakakwata kuzumishiwa kukando kwaamba tukakwatishe kubulangizhi mbutwakapewa. ¹⁹ Tulikwete bulangizhi alimwi butazungaana bwakaba ukoya ngu musemu wa bumi bwesu, bulangizhi bobo butunjizha mu busena bwa mukati mwini kunze lya chishitilizho, ²⁰ koko Jeso, walo nkwaakaya, nkwaakenjila mu busena bwesu. Wakaba mupayizhi mukando wa lyoonse ukoya mbwaakakubele Melekizedeki.