¹ Lufwuno lwa bunina luye kumbele. ² Mutabi nimuchileka kusamausha beenzu. Kaambo kwiita muli chechi, bamwi bakasamausha baangelo chakutazhiba. ³ Amubatweluke baangilwe bali muntolongo babe ukoya mulyaangilwe abo. Amubatweluke babo bapenzhewa mube ukoya amwe mulyaabo mu mubili. ⁴ Kutwalana kube kwa bulemu ku muntu woonse, alimwi bulo bwabo batwalene butasofwaazhiwa, kaambo Leza u lakabeteka bantu bahwuule uba shimamambe. ⁵ Amulitantamune ku kuzandisha mali. Amulamwe ku shintu shesho nshimukwete, kaambo Leza lwakwe mwini wakaamba ati, "Nshikamushiyi nubeni, nikuba kumusula pe." ⁶ Atukwatishe kwaamba ati tutazuluzha tulozhe kwaamba ati, "Mwami ngumuyohwi wangu; ndiina nchinkonzha kutiya. Nchiinzhi muntu nchaakonzha kuchita kulyuume?" ⁷ Mutabaluba basololi benu, babo bakamuyiisha mazwi aka Leza, alimwi kamuzhibaluka bumi bobo mbubakapona. Amwiiye mbulubele lushomo lwabo. ⁸ Jeso Kilisito tachincha nikuba bwasunu, naa uzona alimwi ngwa lyoonse. ⁹ Mutabi nimuchengwa kunjiisho shishiyene shiyene shitazhibilwe kabotu. Kaambo chili kabotu kwaamba ati monzo ulyeelele kuzumishiwa kwiita mu luse, kutali kwiita mu shilyo shesho shalo shitabayohwa babo bayanwa muli shisho. ¹⁰ Tulikwete chipayililo checho balo babo basebeza mwitente bayina cheelelo chakulya. ¹¹ Kaambo bulowa banyama bayaye ba chibi baletwa u mupayizhi mukando mu busena busalala, amana mitunta ilatentelwa ansengwe lya munzhi. ¹² Mbubona Jeso aze wakapengela ansengwe lya munzhi mukando, kwaamba ati asalazhe bantu kwiita mu bulowa bwakwe mwini. ¹³ Ubobo atuye aswe kwakwe ansengwe lya munzhi, tukapenge mbubona mbwaakapenga. ¹⁴ U kuti uswe twiina munzhi mukando u kalilila. Pele, uswe tulikwete wezo walo ngutulangila u zhiza. ¹⁵ Uninzho, kwiita mwakwe, atupe shipo shakutembaula Leza, kulumba nji michelo ya milomo yezho ii shoma mwizhina lyakwe. ¹⁶ Tutabi nituluba kuchita kabotu alimwi u kwaabana shintu, kaambo ku shipo shili bolya Leza shilamubotela. ¹⁷ Amubachilile alimwi u kubamanina milimo basololi benu, kaambo mbubeembela myoza yenu ukoya babo baya kwiizhiminina. Chilila kwaamba ati basololi bako bachite bobo chakubotelwa, alimwi kutali chakutongauka, ati chilakaba cha bulyo nkumubele. ¹⁸ Kamutukombela, twazhibisha kwaamba ati tulikwete mizeezo mibotu alimwi tulazandisha kupona bululeme mu shintu shoonse. ¹⁹ Ndamulomba kwaamba ati muchite bobo chakubaazha, kwaamba ambweni ndazholwa chakufwambaana nkumubele. ²⁰ Inzho Leza wa luumuno, wezo wakabusha kuhwa ku bafwu mweembezhi mukando wa mbelele, Mwami wesu Jeso , kwiita mu bulowa bwa chihwuminano cha lyoonse, ²¹ amupe insana shakuchita shintu shakwe kabotu mukuchita luzando lwakwe, tusebeze checho chimubotezha walo, kwiita mwa Jeso Kilisito, kwakwe kube bulemu kwa lyoonse u lyoonse. Ameni. ²² Inzho Ume ndamuzumya zumya, nubakwesu, mukwatishe mazwi a kumuzumya zumya azo ngundamulembela. ²³ Amuzhibe ati munyokwesu Timoti wakaangululwa, walo ngutukakazhiza aze kwiza kumubona azhiza chakufwambaana. ²⁴ Amubaanzhe basololi benu boonse alimwi u bantu boonse baka Leza basalala. Babo bali kwi Itali balamwaanzha. ²⁵ Luse alube amwe noonse.