¹ A sa vabulai ikodou, oi ikodou ka mate tu e na caka cala kei nai valavala ca; ² dou a muria tiko eliu me vaka nai valavala kei vuravura koya, ni dou a muria tiko na nodra turaga era sa kaukauwa e na macawa, a yalo sa cakacaka tiko e lomadra era sa dautalaidredre; ³ ko ira eda sai valavala vata kaya koi ita kece e na gauna eliu, e na gagadre ca ni yagoda, ni da sa muria tiko na dodomo ni yagoda kei na yaloda; ia na nodai tovo me da cudruvi kinia, me vataki ira voki lia na tani: ⁴ ia, na Kalou, sa vutu ni loloma, e na vuku ni nona loloma levu sa lomani ita kinia, ⁵ io ni da a mate tu e na caka cala, sa vabulai ita vata kei Karisito, (a loloma loa lia dou sa vabulai tu kinia;) ⁶ a sa vaturi ita cake vata, ka vatikori ita vata kei Karisito Jisu e na veiyasana valomalagi: ⁷ me vatakila kinia e na gauna ena muri mai na nona loloma levu sa uasivi sara ni sa lomavinaka vei ita e na vuku i Karisito Jisu: ⁸ ni sa loloma loa lia dou sa vabulai kinia e na vuku ni vabauta; ia sa yali ni vuna koi ikodou; ai solisoli lia ni Kalou: ⁹ sa yali e na vuku ni cakacaka, me kakua kinia e dua me dokai koya: ¹⁰ ni da sa nona cakacaka, sa caka me da tu vata kinia ki Karisito Jisu me ia nai valavala vinaka, o koya sa varautakia eliu na Kalou me da caka vakinia. ¹¹ O koya mo dou nanumia, ni dou a yali ni lotu eliu ni dou sa sucu va kinia, ia dou a vakatokai na Tawacili vei ira sa vatokai na Cili sa caka na liga e na yago; ¹² ni sa yali vei ikodou na Karisito e na gauna ko ya, dou sa yali ni matanitu vata vei ira na Isireli, a sa yali ni nomudou na ka sa yalataki e na viyalayalati, a sa yali vi ikodou nai nuinui; ka sa yali ni nomudou na Kalou, e vuravura: ¹³ ia e na gauna koya ni dou sa tu vata kei Karisito, oi ikodou ka yawa eliu dou sa qai voleka mai e na vuku ni dra i Karisito. ¹⁴ Ni sai koya na vu ni noda veivinakati voki, o koya sa qisia na rua me dua loa lia, a sa basukia na bai sa ia kinia na vitawasei; ¹⁵ ni sa vaotia e na yagona na ka eda a veicati kinia, o koya na vunau sa varotia nai valavala ni lotu: me ia kinia na veivinakati, ka qisi rau me rau tamata vou e dua loa lia ni rau tu vata kaya; ¹⁶ me vameyautaki rau voki lia kei na Kalou me vaka ni sa dua loa lia na tamata e na vuku ni kauveilatai, ni sa vaotia kinia na veicati: ¹⁷ a sa qai mai ka vunautakia na viivinakati vii ikodou sa yawa, vii ira voki lia era sa voleka: ¹⁸ ni sai koya eda sa torovia rawa kinia na Tamada koi ita ruarua e na Yalo e dua loa lia. ¹⁹ O koya koya dou sa qai yali tiko ni vulagi kinia se kai tani, dou sa koro vata lia kei ira era sa lotu, ka dou sa lewe ni vale ni Kalou; ²⁰ ka dou sa tara cake e na nodra yavu nai apositolo kei ira na parofita, ia sai koya ko Jisu Karisito sa kenai vadei e na tutu-ni-vale: ²¹ o koya sa sema vata kinia na vale taucoko, a sa tubu cake kinia me vale tabu ni sa tu vata kei na Turaga: ²² o koya dou sa vatataki vata voki lia kinia me vale ni Kalou ni sa tiko kinia na Yalo Tabu.