¹ Koya na i vola i Paula e dua na i apositolo i Karisito Jisu me vaka na lewa ni Kalou. Kivi ira na tamata lotu mai Efeso, era sa yalodina tiko vi Karisito Jisu. ² Me nomuni na loloma ki na vacegu mai vua na Kalou o Tamada ki na Turaga ko Jisu Karisito. ³ Me vavinavinakatakia na Kalou na Tama ni noda Turaga ko Jisu Karisito, o koya ka sa vakalougatataki ita ena ka ni vivakalougatataki vayalo kece lia, mai na viyasana valomalagi ena vuku i Karisito. ⁴ Me vaka sa digitaki ita e liu ena vukuna, sa qai tauyavutakia e muri ko vuravura, me da yalo savasava ka yali ni cala e matana ena loloma; ⁵ Ni sa lesi ita e liu me da vakabautia me da luvena e na vukui Jisu Karisito, me vaka na nona lewa vayalo vinaka; ⁶ Me dokai kinia na kena vinaka ni nona loloma; o koya sa lomani ita kinia ko koya e na vukuna na dau lomani; ⁷ O koya e da sa rawatia kinia na bula sa voli ena nona dra, io, na vakabokoci ni valavala ca, me vaka voki lia na nona lololoma levu; ⁸ o koya sa valevutakia sara vei ita ko koya ena vuku kei na yalomatua kece lia; ⁹ Ni sa vatakila vei ita na nona lewa ka vuni tu, me vaka na e vinaka vua, ka sa nakitia vaikoya lia; ¹⁰ Me yaco kinia na ka sa lewa ko koya ni sa oti kece lia na gauna sa lokucia me soqona vata na ka kece lia vi Karisito, me vaka vokij lia mai lomalagi, kei na vi ka e vuravura; ¹¹ E da sa caka voki lia kinia me nonai votavota, ni da sa lesi e liu me vaka sa nakitia ko koya sa cakavia na ka kece lia me vaka na nona lewa; ¹² me dokai kinia na nona vinaka ena vukui ita, o ita sa vararavi taumada vei Karisito; ¹³ Oi kodou voki lia, ni dou sa rogocia e liu na vosa ni vavuvuli dina, nai tukutuku vinaka ni nomudou bula, sai koya ni dou sa vabautia ni dou sa dregati kinia, ena yalo tabu ka yalataki, ¹⁴ o koya nai matai ni nodai votavota me yaco mada na gauna ena rawa dina kinia ko ira na nona sa voli tu, me dokai kinia na nona vinaka. ¹⁵ Ena vuku ni ka koya oi au voki lia, ena gauna lia au rogocia kinia na nomuni vabautia na Turaga ko Jisu, ki na nomuni loloma vi ira na tamata lotu, ¹⁶ au sa yali ni mudu ni vavinavinaka ena vukumudou, niu sa cavuti kemudou tiko ena noqu masu; ¹⁷ Vua na Kalou ni noda Turaga ko Jisu Karisito, a vuni ka e vaiukuukutakia, me solia vei ikodou na yalo ni vuku kei nai vavuvuli matata, mo dou kilai koya kinia; ¹⁸ Ni sa vararamataki na mata ni yalomudou; mo dou kila kinia nai nuinui sa kacivi ikodou kinia ko koya, ki na kena levu ni ukuuku sa taukeinia ko koya vei ira sa lotu. ¹⁹ Ki na kena levu sara ni nona kaukauwa vei ita sa vabautia me vaka sa dau caka yaco ena nona kaukauwa vakaidina, ²⁰ sa qisi Karisito kinia ko koya ni sa vaturi koya cake voki mai na mate, ka vatikori koya ena ligana i matau ena viyasana valomalagi. ²¹ Sa cecere cake kinia ko Karisito vi ira kece lia sa liu, ki ira sa nodra na lewa, ki ira era sa kaukauwa ka qaqa, ka sa cecere cake mai na viyaca sa dau cavuti ena gauna koya ki na vigauna e muri. ²² A sa vamalumalumutakia na kece lia me tu e ruku ni yavana, a sa lesi koya me lewa na ka kece lia, ena vuku ni soqosoqo lewe ni lotu, ²³ O koya na yagona, sa sinai sara vua sa vasinaitakia na ka kece lia ena ka kece lia.