Sa vavinavinaka vua na Kalou ko Paula e na vukudra na lewe ni lotu mai Efeso, a sa vatakila na ka era sa kalougata valevu sara kinia ni ra sa qai vabauti Jisu, 1-14. Sa tukunia ni sa masulaki ira tiko, me ra vuku valevu sara, ka kalougata vaidina, 15-23.
1
Koya na i vola i Paula e dua na i apositolo i Karisito Jisu me vaka na lewa ni Kalou. Kivi ira na tamata lotu mai Efeso, era sa yalodina tiko vi Karisito Jisu.
2
Me nomuni na loloma ki na vacegu mai vua na Kalou o Tamada ki na Turaga ko Jisu Karisito.
3
Me vavinavinakatakia na Kalou na Tama ni noda Turaga ko Jisu Karisito, o koya ka sa vakalougatataki ita ena ka ni vivakalougatataki vayalo kece lia, mai na viyasana valomalagi ena vuku i Karisito.
4
Ni sa bera ni tauyavutakia o vuravura, sa digitaki ita tu na Kalou me da nona ena vuku i Karisito, me da savasava ka yali ni cala e matana.
5
A sa lesi ita o koya ena nona loloma meda vabau meda luvena ena vuku i Jisu, me vaka na i naki ni lomana.
6
Me da vacaucautakia kinia na Kalou ena uasivi ni nona lolomasavu, ena i loloma soli loa vi ita ena vukuna na Luvena lomani!
7
Ni da sa sereki ena vuku ni nona mate ka sa bokoci na noda i valavala ca me vaka na levu ni nona lolomasavu,
8
sa sovarakia vayauyau mai vi ita.
9
Ni sa vatakila mai vi ita na Kalou na nona i naki vuni, na nona i naki vinaka sa varautakia me caka na Karisito.
10
Na i naki ni Kalou, sai koya ena vataucokotakia ena gauna sa lokucia, me vaduavatatakia na veika kece lia mai lomalagi ka va voki lia kinia na veika e vuravura vi Karisito.
11
Ni sa caka na ka kece lia me vaka na i naki ki na lewa ni Kalou; ka sa digitaki ikonu na Kalou mo ni nona tamata ena vuku i Karisito me vaka na nona i naki, ka sa yavutakia na i naki koya mai na veika sa vatulewatakia mai na i vatekivu.
12
O koya koya me da qai vacaucautakia kinia na lagilagi ni Kalou, oi ita na i sevu ni tamata ka vanuinui taumada vi Karisito.
13
Ena vuku i Karisito, koi ikodou voki lia, ni dou sa rogocia eliu na vosa ni vavuvuli dina, nai tukutuku-vinaka ni nomudou bula, sai koya ni dou sa vabautia dou sa dregatia kinia, e na Yalo Tabu sa yalataki,
14
o koya nai matai ni nodai votavota me yaco mada na gauna ena rawa dina kinia ko ira na nona sa voli tu, me dokai kinia na nona vinaka.
15
Ena vuku ni ka koya, ena gauna lia au rogocia kinia na nomuni vabautia na Turaga ko Jisu ki na nomuni loloma vi ira na tamata lotu,
16
au sa yali ni mudu ni vavinavinaka tiko vua na Kalou ena vukumuni. Au sa dau nanumi ikonu voki lia ena noqu masu.
17
Au sa masu voki lia vua na Kalou ni noda Turaga ko Jisu Karisito, na Tamada lagilagi me solia vei ikonu na Yalo ni vuku, ka vatakila ni nomu kilai koya kinia.
18
Au sa masu voki lia me vararamatakia voki lia na mata ni yalomudou, mo dou kila kinia na ka sa nuitakia ka sa kacivi ikonu kinia o koya, na nona vivakalougatataki lagilagi me baleti ira na nona tamata lotu.
19
Ki na kena levu ni nona kaukauwa sa cakacaka tiko vi ita eda vabautia, me vaka na cakacaka ni nona kaukauwa
20
sa vayagatakia ena nona vakaturi Karisito cake voki mai na mate, ka vatikori koya ena ligana i matau ena viyasana valomalagi.
21
Sa cecere cake kinia ko Karisito vi ira kece lia sa liu, ki ira sa nodra na lewa, ki ira era sa kaukauwa ka qaqa, ka sa cecere cake mai na viyaca sa dau cavuti ena gauna koya ki na vigauna e muri.
22
A sa vamalumalumutakia na veika kece lia na Kalou ka dainia ena ruku ni yava i Karisito, ka sa lesi koya me lewa na veika kece lia ena vuku ni soqosoqo lotu.
23
Na i soqosoqo lotu sai koya na yago i Karisito, ka sa vataucokotaki mai vi Karisito, o koya sa vataucokotakia na ka kece lia.