23 ¹ A sa vakaraici ira matua na mataveilewai ko Paula, ka tukunia, "Oi kemunu na veiwekani, au sa muria ka yacovia na siga koya na ka ka'u a nanumia sa dodonu ena mata ni Kalou. " ² A sa tukunia ko Ananaiasa na bete levu vei ira sa tu voleka vua me ra tavia na gusuna. ³ Sa qai tukunia vua ko Paula, "Ena tavi iko na Kalou, ko iko na lalaga sa boro vulavula: ko sa tiko beka mo lewai au me vaka na vunau ka sa tukunia me'u tavi, ia ka sa yali ni vaka na vunau?" ⁴ Sa qai tarogia ko ira sa tu voleka, "O sa vosavakacacatakia li na bete levu ni Kalou?" ⁵ Sa qai tukunia ko Paula, Au sa yali ni kila, koi kemunu lia na veiwekani ni sa bete levu ko koya: ni sa volai, "Mo kakua ni vosavakacacataki koya sa lewai ira na kai nomu." ⁶ Ia ni sa kunea ko Paula, ni sai tokani i Setoki eso vei ira, ka so voki lia era Farisi, sa kaci ko koya ena matadra na mataveilewai, "Oi kemunu na veiwekani koi au na Farisi, a luve ni Farisi: ena vuku ni'u sa vakadinata ni na tu cake voki na mate ka'u sa tarogia kinia." ⁷ Ia ni sa vosa oti vakakoya ko koya, sa tubu na veileti vei ira na Farisi, kei ira nai tokani i Setoki; a sa tawase rua kinia na lewe vuqa. ⁸ Ni sa dau tukunia ko ira nai tokani i Setoki sa yali na tucake voki mai na mate, se agilose, se yalo: a sa dau tukunia ko ira na Farisi sa dina ruarua. ⁹ A sa levu na qoqolou, a sa qai tucake ko ira na vu-ni-vola era nodrai tokani na Farisi; a ra sa gumatua, ka tukunia, Keitou sa yali ni kunea e dua na ka ca vua na tamata koya; ia ka vakaevei kevaka sa vosa vua e dua na agilose se na yalo? ¹⁰ Ni sa qai tubu na veileti levu, sa rere na turaga levu ni valu, de ra basuraki Paula, a sa tukunia vei ira na sotia, me ra qai sobu, me ra kalirakia vakaukauwa mai vei ira ka me ra yadia ki na bure ni valu. ¹¹ Ia ena bogi sa muri sa tu voleka vua ko koya na Turaga, ka tukunia, "Mo vakacegu lia, Paula: ni sa kilikili mo tukuni au mai Roma vokilia, me vaka ko sa tukuni au e Jeruisalemi." ¹² Ia ni sa savulaci mai, sa buki veretakia ko ira na Jiu eso, a ra sa veivakadreti ena bubului, ka tukunia me ra kakua ni kana se gunu me rawa mada na nodra vakamatei Paula. ¹³ A ra lewe vasagavulu ka mani vakacaca era sa bukia na vere koya. ¹⁴ A ra sa qai mai vei ira na bete levu kei ira na qase, ka tukunia, "Keitou sa veivakadreti ena bubului levu, me keitou kakua ni kania e dua na ka, me sa rawa mada na neitou vakamatei Paula:" ¹⁵ ia koi kodou kei ira vokilia na mataveilewai, dou tukunia vua na turaga levu ni valu me yadi koya sobu mai vei kodou, me vaka dou sa via tarogia vakadodonu ena vukuna, ia koi keitou, ni sa bera ni yaco ko koya, keitou sa vakarau tu me vakamatea. ^{16 17} Ia ni sa rogocia na vere koya na luvena tagane na ganei Paula, ka sa qai ka curu ki na bure ni valu, ka tukunia vei Paula. Sa qai kacivia e dua vei ira na turaga ni valu ko Paula, ka tukunia "Yadia na cauravou koya vua na turaga levu ni valu; sa dua na ka sa tu vua me tukunia vei koya.: ¹⁸ Sa qai yadia me rau qai vua na turaga levu-ni-valu, a sa tukunia, "Sa kacivi au ko Paula na tamata ka vesu tu, ka tukunia me'u yadia mai vei iko na cauravou koya, ni sa dua na ka sa tu vua me tukunia vei iko." ¹⁹ Sa qai tauria na ligana na turaga levu ni valu a rau sa qai vakatikitiki vakairau; a sa tarogia, "A cava beka, na ka sa tu vei iko ko sa via tukunia vei au?" ²⁰ Sa qai tukunia ko koya, sa lomavata ko ira na Jiu me ra masuti iko mo yadi Paula sobu ena savulaci vei ira na mata-veilewai, me vaka ko sa via tarogia vakadodonu e so na ka ena vukuna: ²¹ ia mo kakua ni vakarogocia na nodra vakamamasu; ni ra sa le vasagavulu ka mani vakacaca era sa lawakitakia, a ra sa veivakadreti vakai ira ena bubului, me ra kakua ni kana se gunu me ra vakamatei koya mada e liu: a ra sa qai vakarau tu, a ra sa warakia lia mo yalata vei ira." ²² Sa qai vakalaiva na cauravou na turaga levu ni valu me qai yani, a sa vakarotakia, "Mo kakua ni tukunia vua e dua ni ko sa mai vakatakilatakia vei au na ka koya." ²³ A sa kacivi rau e lewe rua na turaga ni valu ko koya ka tukunia, vakarautakia na sotia e lewe rua na drau, kei na tamata e le vitusagavulu era vodo ose, kei na tamata e le rua na drau sa vakaiyaragi ena moto, me ra qai ki Sisaria ka tolu na tiki ni bogi; ²⁴ ka vakarautakia vokilia eso na ose, me vodo kinia ko Paula, me kau vakavinaka ki Sisaria vei Filikesa na Kovana. ²⁵ A sa volai nai vola ko koya ka vakakoya: ²⁶ "Koi au ko Kilotiu Laisiasa vua na turaga vinaka sara ko Filikesa sa loloma. ²⁷ A tamata koya era a tauria na Jiu, a sa voleka ni ra vakamatea; au sa qai yadi ira na sotia, ka vakabulai koya, ni ka'u sa kila e kai Roma ko koya. ²⁸ Ia ni'u sa via kila se cava era sa beitaki koya kinia, au sa yadia ki na nodra mataveilewai: ²⁹ ia ka'u sa kunea ni sa beitaki ko koya ena ka eso e veiletitakia ena nodra vunau, ia ka yali na ka sa beitaki vua sa dodonu me mate kinia se me vesu. ³⁰ Ia ni sa tukuni mai vei au era sa lawavaki koya ko ira na Jiu, au sa vakariri me'u vakatala yani vei iko au sa vosa vokilia vei ira era beitakia me ra tukunia e matamu na veika sa beitaki kinia ko koya sa loloma. ³¹ Sa qai yadi Paula ko ira na sotia, me vaka sa vakaroti vei ira, a ra sa yadia ena bogi ki Adipatiri. ³² Ia ena savulaci era sa daini ira sa vodo ose me ra qai vata kaya, a ra sa lesu voki ki na bure ni valu. ³³ Ia ni sa yaco ki Sisaria ko ira oqori, era sa solia nai vola vua na turaga, ka vakaraitaki Paula vokilia vua: ³⁴ ia ni sa wiliki oti na turaga, sa tarogia se ko cei na nona vanua. Ni sa qai kila sa kai Sisilia, ³⁵ sa tukunia "Au na rogoci iko ni ra sa yaco mai ko ira era sa beitaki iko.: A sa vakarotakia me vakataiwai ena vale ni veilewai nei Eroti.