22 ¹ "Oi konu na veiwekani, kei na qase, ni vakarorogo mai ni ka'u sa tukuni au vei konu.' ² Ia ni sa rogocia sa tukunia ko koya vei ira ena vosa vaka-Iperiu, era sa tiko lo sara, a sa tukunia ko koya: ³ "Oi au dina na Jiu, au a sucu mai Tarisu mai Sisilia, ia ka'u a susugi ena koro koya, ka sa vakatavulici au vakadodonu ko Kamalieli me vaka na nodra vunau na qase, ia ka'u a gumatua ena vuku ni Kalou, me vakataki konu kece lia ena siga koya: ⁴ ia ka'u a vakacacani ira sa Lotu vakakoya me ra mate, ia ka'u a vesukia ka dainia ki na vale ni veivesu na tagane eso ka so na yalewa. ⁵ A sa noqui vakadinadina na bete levu, ke ira kece lia na qase: ni ka'u a tauria na nodrai vola vei ira na veiwekani, ka qai ki Tamasiko, me'u yadi ira era sa tiko kinia ki Jerusalemi, ni ra sa vesuki me ra cudruvi. ⁶ Ia sa yaco, ni ka'u sa qai yani ka toro voleka ki Tamasiko ena siga levu tutu, sa dua na rarama levu sa cila vakasauri mai lomalagi ka vakavolivoliti au. ⁷ Au sa qai bale ki na qele, ka rogocia e dua na vosa sa tukunia vei au, 'I Saula, i Saula, ko sa vakacacani au ena vuku ni cava?' ⁸ Au sa qai tarogia, 'O cei beka koi konu na Turaga?' A sa tukunia vei au ko koya, 'oi au ko Jisu na kai Nasareci, ko koya ko sa vakacacana.' ⁹ A ra sa raicia dina na rarama ko ira sa qai vata kei au, a ra se yali ni rogocia na vosa i koya sa vosa mai vei au. ¹⁰ Au sa qai tarogia, A cava me'u kitakia noqu Turaga? Cavu tu, ka qai ki Tamasiko: ia ena tukuni kinia vei iko na ka kecelia sa lesi vei iko mo kitakia. ¹¹ Ia ni ka'u sa yali ni rai rawa ena vuku ni kena remoremo na rarama koya, era sa tuberi au ko ira sa qai vata kei au, kau sa yaco kinia ki Tamasiko. ¹² A sa dua ko Ananaiasa, a tamata lotu dina, me vaka na vunau, a sa rogo vinaka vei ira kecelia na Jiu era sa tiko mai kinia, ¹³ sa qai mai vei au, a sa tu, ka tukunia vei au, 'Na wekaqu Saula, mo rai vinaka mai.' Ia, ena tiki-ni-siga koya, ka'u sa rai cake vua. ¹⁴ A sa tukunia ko koya, 'Sa digitaki iko na nodra Kalou na noda qase, mo kila na lomana, ka raici koya na Yalododonu, ka rogocia na vosa ni gusuna: ¹⁵ ni ko na dautukuni koya vei ira na tamata kecelia ena ka ko sa raicia ka rogocia. ¹⁶ Ko sa qai vakaberabera voki ena vuni cava? tu cake, mo papitaisotaki, ka vuya laivi na nomui valavala ca, ni ko sa masutia na yaca ni turaga.' ^{17 18} Ia ka yacovia, ni kau sa lesu voki mai ki Jeruisalemi: ni kau sa masu tiko ena vale-ni-soro, au sa raicia na raivotu: ia ka'u sa raici koya ni sa tukunia vei au 'kusarawa mo qai tani e Jeruisalemi: ni ra na yali ni vakabautia na nomui tukutuku ena vukuqu.' ¹⁹ Au sa qai tukunia 'Konu na Turaga, era sa kila ni ka'u a daini ira ki na vale ni veivesu era sa vakabauti konu ka vakanakuitataki ira ena vale ni lotu kecelia: ²⁰ ia ni sa vakadavei na dra kei Sitiveni ko koya sa dau tukuni konu, au a tu voleka vokilia kinia, ka vinakatia na nona mate, ka maroroya na nodrai sulu era sa vakamatea. ²¹ Sa qai tukunia vei au ko koya, 'Qai tani yani: ni ka'u na talai iko vakayawa vei ira na veimatanitu tani.'" ²² Ia era sa rogoci koya ka yacovia mada na vosa koya, era sa qai tabalakia cake na domodra, ka tukunia, 'Me yadi tani e vuravura na tamata sa vakakoya: ni sa yali ni dodonu me bula.' ²³ Ia ni sa qoqolou ka veibiuyakia na nodraisulu, ka dainia na kuvu-ni-soso ki na cabi. ²⁴ Sa tukunia na turaga levu ni vale me ra yadi koya ki na bure ni valu, a sa tukunia me tarogi ni sa vakanakuitataki, me kila ko koya se cava era sa qolouvaki koya kinia vakakoya. ²⁵ Ia ni ra sa vesukia tiko ena wa, sa tarogia ko Paula vua na turaga sa tu kinia, "E tara beka vei kodou mo dou vakanakuitatakia na kai Roma, ka yali mada ni lewai?' ²⁶ Ia ni sa rogocia na turaga ko ya, sa laki tukunia vua na turaga levu ni valu, ka tukunia, "mo lewai iko vinaka ena ka ko kitakia: ni sa kai Roma na tamata koya." ²⁷ Sa qai qai mai na turaga levu ni valu ka tukunia vua, Tukunia mai vei au, se ko sa kai Roma se yali?" Sa tukunia ko koya, "Io." ²⁸ Sa qai tukunia ko Paula, "ia koi au, ka'u a sucu kinia." ²⁹ Era sa qai qai tani sara ko ira sa lesi me ra tarogi koya; a sa rerevakia vokilia na turaga levu, ni sa kila e kai Roma ko koya, e na vuku voki lia ni nona vesuki koya. ³⁰ Ia ena savulaci ni sa via kila ko koya na kena dina ni ka era sa beitaki koya kinia ko ira na kai Jiu, sa serekia na kenai vesu ko koya, a sa tukunia vei ira na bete levu kei na nodra mataveilewai kecelia me ra qai mai; a sa qai yadi Paula sobu, ka vakatura e matadra.